Апэрэ Самуел 28

ЯтӀокӀэнэрэ ирэ шъхьэр

1ЕтӀанэ фылистхэм Израилым зао дашӀыным пае дзэхэр къаугъоигъэх, Ахыщ Даут риӀуагъ: «Ори уицӀыфхэри шъусигъусэхэу заом тызэрэкӀощтым ущэсэгъэгъуазэ». 2Арти Даут Ахыщ риӀуагъ: «Хъунба адэ, уиӀумэт джы ышӀэщтыр къэплъэгъущт». Ахыщ Даут риӀуагъ: «Дэгъу, джащ пае сэпсэуфэ ренэу усиухъумэкӀонэу осэгъэнафэ».

Саул удыгъэхэр зезыхьэрэм дэжь зэрэкӀуагъэр

3Самуел зэлӀэм зэкӀэ израил цӀыфхэм ар агъэежьи, икъалэу Рамэ щагъэтӀылъыжьыгъагъ. Удыгъэхэр зезыхьэхэрэмрэ джэнчыдзхэмрэ Саул хэгъэгум рифыгъагъэх. 4ЕтӀанэ фылистхэр къэзэрэугъойхи къежьагъэх, Шыунэм нэс къакӀохи къыщыуцугъэх; Саули израил цӀыфхэр зэкӀэ къызэӀуигъакӀэхи къушъхьэу ГъылбэуаӀ дэжь къыщыуцугъэх. 5Саул фылистхэм ядзэ зелъэгъум къэщтагъ, ыгуи лъэшэу къыгъэкӀэзэзыгъ. 6Арти Саул Зиусхьаным еупчӀыгъ, ау Зиусхьаным джэуап къыритыжьыгъэп, пкӀыхьапӀэкӀи зыкъыригъэлъэгъугъэп, мыжъо лъапӀэу уримыр зырарегъадзэми, джэуапыр къылъигъэӀэсыгъэп, тхьэлӀыкӀохэмкӀи къэбарыр къыригъэшӀагъэп. 7ЕтӀанэ Саул иунэӀутмэ ариӀуагъ: «Удыгъэхэр зезыхьэрэ бзылъфыгъэ горэ къысфэжъугъоти, ыдэжь сыкӀонышъ сеупчӀыщт». ИунэӀутмэ джэуап къыратыжьыгъ: «Удыгъэхэр зэрихьэу бзылъфыгъэ горэ Ӏэндор дэс».

8Ащ ыуж Саул ищыгъынхэр зыщиххи, нэмыкӀхэр зыщилъэхи, нэбгыритӀу игъусэу чэщым къежьэхи бзылъфыгъэм дэжь къэкӀуагъэх. Саул ащ риӀуагъ: «СыолъэӀу джэнч къысфэбдзынэу, зыцӀэ къесӀорэр къысфычӀэпщынэу, зигугъу къыпфэсшӀырэр къэпщэнэу». 9Ау бзылъфыгъэм къыриӀожьыгъ: «Саул ышӀагъэм, удыгъэхэр зезыхьэхэмрэ джэнчыдзхэмрэ хэгъэгум зэрэрифыгъэхэм ущыгъуазэба; сыд пае сытекӀодэнэу спсэ хъытыу къыфэбгъэуцура?» 10Арти Саул тхьэлъанэ ышӀи риӀуагъ: «Зиусхьаныр зэрэщыӀэр сэӀо! Мы Ӏофым пшъэдэкӀыжь рыпхьыщтэп». 11ЕтӀанэ бзылъфыгъэр къеупчӀыгъ: «Хэта къыпфычӀэсщыщтыр?» Адрэм къыриӀожьыгъ: «Самуел къысфычӀэщ». 12Бзылъфыгъэм Самуел зелъэгъум лъэшэу къэкууагъ; Саул зыкъыфигъази, къеупчӀыгъ: «Сыда сызкӀэбгъэпцӀагъэр? О у Саул». 13Арти пачъыхьэм ащ риӀуагъ: «Умыщын, сыда плъэгъурэр?» Бзылъфыгъэм Саул къыриӀожьыгъ: «Джынэм фэдэу зыгорэ чӀы чӀэгъым къычӀэкӀэу сэлъэгъу». 14«Сыд теплъа ащ иӀэр?» – Саул ащ еупчӀыгъ. Адрэм къыриӀуагъ: «Зы лӀыжъ горэ чӀы чӀэгъым къычӀэкӀы, джэнэ кӀыхьэ щыгъэу». Ар зэрэ-Самуелыр Саул къышӀагъэти, ыӀу егъэзыхыгъэу чӀыгум зытыридзи, шъхьащэ фишӀыгъ.

15Самуел Саул къыриӀуагъ: «Сыда сыкъычӀэмыкӀмэ мыхъунэу сызфэбгъэгумэкӀрэр?» Саул риӀожьыгъ: «СиӀофхэр дэй дэдэх; фылистхэр къысэзаох; Тхьэм сыкъыбгынагъ; тхьэлӀыкӀохэмкӀи пкӀыхьапӀэкӀи Тхьэм джэуап къыситыжьырэп. СшӀэщтымкӀэ сыоупчӀыжьынэу сыкъызкӀыоджагъэр джары». 16Самуел къыриӀуагъ: «Зиусхьаным укъыбгыни уипыеу хъугъэмэ, сыд пае сэ укъысэупчӀыжьра? 17Зиусхьаным сэ къысигъаӀощтыгъэр ары Зиусхьаным ышӀагъэр; Зиусхьаным пачъыхьагъур пӀэкӀихи, къыппэблэгъэ цӀыфым, Даут, ыӀэ рилъхьагъ. 18Зиусхьаным къыуиӀуагъэм узэремыдэӀугъэм, Ӏамалэкъхэм зафэгубжым ахэм яфэшъуашэ зэрямыгъэгъотыгъэм пае Зиусхьаным ар джы къыуешӀэ. 19Арышъ, Израили ори Зиусхьаным шъузэгъусэу фылистхэм аӀэ шъурилъхьащт: ори уикӀалэхэми неущ тызэгъусэщтых, Израилым идзэ Зиусхьаным фылистхэм аӀэ рилъхьащт».

20Самуел къыриӀуагъэм лъэшэу къыгъэщынагъэти, Саул ошӀэ-дэмышӀэу къызэхэфагъ, мэфэ ренэми чэщми фыгукӀэ Ӏуфэгъагъэпти, ар кӀочӀаджэ хъугъэ. 21А бзылъфыгъэр Саул къызекӀуалӀэм лъэшэу зэрэщынагъэр ылъэгъугъэти къыриӀуагъ: «Мары уиӀумэт, пӀорэм къедэӀуи, ыпсэ рыджэгужьзэ, унашъоу фэпшӀыгъэр ыгъэцэкӀагъ; 22джы сыолъэӀу уиӀумэт къыуиӀощтым къедэӀу; хьалыгъу такъыр къыостынышъ шхы, гъогум утехьажьмэ гъэрет уиӀэу хъущт». 23Ау шхэнэу фэягъэпти риӀуагъ: «Сышхэщтэп». Арти иунэӀутхэри бзылъфыгъэри къелъэӀухэ зэхъум, ахэм къыраӀорэм едэӀуи, къэтэджыжьи пӀэм хэтӀысхьагъ. 24Бзылъфыгъэм шкӀэкӀэ пщэр иӀагъэти, гузэжъогъукӀэ ар аригъэукӀи, хьаджыгъэ къышти тхьацу ыпшагъ, хьалыгъу мыкӀу-мыпш ыгъэжъагъ. 25ЕтӀанэ Саулрэ иунэӀутхэмрэ къафытыригъэуцуагъ, ахэр шхагъэх, къэтэджыжьхи а чэщ дэдэм къагъэзэжьыгъ.

Currently Selected:

Апэрэ Самуел 28: АдыТГ

Highlight

Copy