Zakarie 14
14
O Debleskro baro dives vella
1I dives o baro Debleske vella: Kolla, kay kouran pen touha, Yerusalem, čorenn ap ko dives tiro bravlepen. Oun glan t'mare yaka denn le hakenes pendar peskro kotar. 2Me lau i lourden dran i tsele themma khetne, te kourenn le pen o foreha Yerusalem. Yon lenn o fores dren, čorenn i khera vin, oun taprenn zoryah i djouvyenge an. Kol menshendar an o foro vell i paash pandles krik anlo. Kolla, kay pral ačan, ačenn nay an o foro.
3Palle djal o baro Devel vin, te kourell yob pes yaake kol lourdentsa dran i vavar themma, har kouras lo pes peskre menshenge an i phoure tsirya. 4Yob hi tardo ap o djeteskri berga, hoy glan o foro Yerusalem čiddo hi, kote kay o kham pre djala. Oun koy berga phagell mashkral an douy kotya, foun kotar kay o kham pre djal bis kote, kay o kham tele djal. Yek kotar djal ap i servi rig#14:4 I servi rig hi i nordetikri rig., o vavar kotar ap i čači rig#14:4 I čači rig hi koy rig, kay o kham pralstounes hi.. Oun mank kol douy berge hi i bourhli tala. 5Koy tala djal yaake dour har Azel. An koy tala mank o baro Debleskre berge nashenn t'mer t'menge yaake, har t'mare phoure nashan penge, har i berge trissan an ko tsiro, kay o Usiya o baro ray pral o them Youda his. Oun palle vell miro baro Devel. Oun leskre tsele bolepangre venn khetne leha.
6Ap ko dives dell bouder kek shilapen oun kek djayepen#14:6 djayepen gel . 7Hi yek dives, – o baro Devel prindjrell les. Pal o dives vell kek rat. An ko tsiro, kay rati hounte vals, vell gar tamlo.
8An ko tsiro nashenn djide panya dran o foro Yerusalem vin. Ko yek paash nashell an o baro pani, hoy kote hi, kay o kham pre djal. Ko vavar paash nashell an o baro pani, hoy kote hi, kay o kham tele djal. Ko pani nashell an i niyal har an o vend.
9Palle hi o baro Devel o ray pral i tsele themma ap i phoub. An ko tsiro hi yob kokres o Devel. Les kokres mangenn le an. 10O tselo them Youda vell i bourhlo telstouno them mank o foro Geba oun o foro Rimmon, hoy hi čačes#14:10 čačes, kate: au sud o forestar Yerusalem čiddo. O foro Yerusalem ačell pralstounes čiddo, oun djal o voudarestar Benyamin bis kote, kay o ersto voudar his, oun kotar doureder bis pash o voudar, kay i rigya khetne venna, oun foun o turmo Hananel bis kote, kay i mool dran i drake o baro rayeske kerdo vas. 11Kote, an o foro Yerusalem djivenn boud menshe. Kek vella, te dell lo o foro paash. I menshe kote nay djivenn kek daryah.
12Oun kova hi ko pharo nasslepen, hoy o baro Devel ap kolende čivell, kay djan an o kourepen o foreha Yerusalem: Lengro mass merell tele, har le gomme ap lengre pire tardo hi, lengre yaka an o shero oun lengri čip an o mouy merenn tele oun perenn vin. 13An ko dives krell len o baro Devel yaake daar, te djinenn le bouder gar, hoy le krenn. Hakeno taprell o vavares. Oun yon djan yek ap o vavareste pre. 14Ninna i menshe dran Youda djan ap kolende an Yerusalem pre. Palle lenn i menshe dran Yerusalem ko kouč koova khetne, hoy kol vavar menshen dran i themma troul lende trouyel pash pende hi: Kova hi boud sonakay, roup oun kouč ripya. 15Oun kava pharo nasslepen, hoy vas ap i menshende, vell ninna ap i graya, i maultikre bourike, khamele, bourike oun pral i tsele firhende, kay pash i lourdende hi.
16Oun kolla, kay djides ačan kol menshendar dran i themma, kay his an o kourepen o foreha Yerusalem, kolla venna hako bersh an Yerusalem, te sharenn le o baro rayes an Yerusalem. Yob hi o baro Devel, ko ray pral o bolepen oun i phoub. Kote an Yerusalem kamenn le ninna kol bare divessa te rikrell, kay i menshe an patyengre khera djivenn. 17Te hi yek them ap kay phoub, dran koleste venn le gar an Yerusalem, te sharenn le o baro Debles, ko rayes pral o bolepen oun i phoub, palle dell kek brishin ap ko them. 18Ninna te hi kolla i Egiptarya, kay djan gar pre an Yerusalem glan o baro Debleste, lenn le koy phagi, hoy dell o baro Devel i menshenge an i tsele themma, kay venn gar pre an Yerusalem, te rikrenn le kol bare divessa, kay i menshe an patyengre khera djivenna. 19Te rikrenn le gar kal divessa, kol Egiptarya oun kol tsele vavar menshe, lenn le pengri phagi.
20An ko tsiro hi činlo ap i tikne bashepangre, hoy hi pandlo troul i grayengre menya: o baro Debleske! I pirya an o Debleskro kheer hi o Debleske yaake boud moldo har i bare čare glan o Debleskri rhačepaskri#14:20 Debleskri rhačepaskri: altaro. 21I tsele pirya an Yerusalem oun an o them Youda hi o Debleste dino; i menshe, kay an o Debleskro baro kheer venna, nay lenn len oun nay kerenn o mass koy dren. Oun an ko tsiro dell bouder kek parepaskro an o kheer o baro Deblestar, ko rayestar pral o bolepen oun i phoub.
Currently Selected:
Zakarie 14: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
