Tito 2
2
Rike i tsele patslen ap o čačo drom!
1Tou, Tito, sike i patslende o Debleskro drom yaake, har kova čačo hi!
2Pen i phoure morshenge,
te penenn le kek dinelo koova,
te djivenn le lačes glan i menshende,
te denn le yak, hoy yon rakrenna,
te ačenn le an o čačo patsepen,
te kamenn le i menshen o tselo djiyestar,
oun te venn le gar khino an o patsepen!
3Pen i phoure djouvyenge,
te djivenn le yaake, har o Debleskre čave djivenna,
te rakrenn le gar djoungeles pral i vavarende,
te piyenn le pen gar mato!
Yon hounte sikrenn i vavaren, hoy lačo hi.
4I terne djouvyenge hounte penenn le,
te kamell hakeni peskro romes oun pengre čaven o djiyestar,
5te denn le pen yak, hoy yon rakrenna,
te krenn le kek vi-ladjedo koova,
te krenn le pengri boudi mishto an pengro kheer,
te venn le lačes,
oun te shounell hakeni ap peskro romeste!
Yon te krenn kova lauter, palle rakrell nay kek mensho djoungeles pral o Debleskro lab.
6Pen i terne morshenge zoreles, te denn le yak, hoy yon rakrenna oun krenna! 7An hako koova sike lende, har tou kova kreh, te krenn le ninna lačo koova!
Pen o Debleskro lab an o čačepen, te djal les hakeneske an o dji! 8Pen les lenge yaake, te nay penell kek, kay kova gar čačo hi, hoy tou peneh! Palle nay rakrenn kolla gar djoungeles pral mende, kay hi rhoyemen ap mende. Na-a, yon ladjenn pen.
9Pen kolenge, kay hounte boudrenn i rayeske,
te shounenn le hako tsiro ap leste,
te krenn le kova, hoy yob kamella,
te rakrenn le leske gar pale,
10te čorenn le či lestar!
I boudepangre hounte krenn pengri boudi mishto oun čačo. Yaake sikrenn le an hako koova, har mishto o Debleskro drom hi, hoy lende siklo vas. Oun yaake sharenn le o Debles, kay las men vin dran o čilačepen.
O Debleskro lačepen rikrell men ap o čačo drom
11Yaake sikras o Devel, har baro peskro lačepen i tsele menshenge hi. Yob kras i drom, te lell lo len dran o čilačepen oun o merepen vin. 12An peskro lačepen penell lo menge, te penas “na-a” ap lauter, hoy yob gar kamella, te kras mer ko djoungelo koova gar, hoy kol vavar kate ap i phoub krenna. Mer das yak, hoy krah, te djas ap o čačo drom, oun te kras, hoy o Devel kamella, yaake rah har mer djivah ap kay phoub. 13Oun mer dikah ap ko barhtelo dives, kay vell o Yezous Kristo pale an o shoukar raylepen. Yob hi maro baro Devel, kay las men dran o čilačepen vin. 14Yob das peskro djipen an o merepen, te las lo mari tseli doosh ap peste, oun te kras lo maro dji djoudjo, te vas mer leskre menshe, oun te kamas i tseli zoryah lačo koova te krell.
15Pen kava lauter i patslenge! Rake an lengre djia! Te krenn le čomone, hoy gar mishto hi, pen les lenge an o Debleskri zoor! Hakeno hounte shounell ap toute.
Currently Selected:
Tito 2: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
