Remarya 11
11
O Devel moukas gar o Israeleskre menshen
1Me poučau t'mendar kanna: Čivas o Devel kol menshen infam, kay yob peske vin rodas? Na-a! Kova hi gar yaake. Me hom ninna i Israelitari, i čavo o Abrahamestar, oun mire menshe hi Benyaminarya. 2Glan rah tsiro rodas o Devel i Israelitaryen vin, te venn le leskre menshe. Doleske čivell lo len gar infam. Djinenn t'mer gar, hoy an o Debleskro lab pral o Eliya činlo vas? Yob vas glan o Debleste, oun rakras leha pral o čilačepen, hoy i Israelitarya kran. 3Mo ray, penas lo, yon maran tire rakepangren. Oun i barra, hoy van touke pre tardo, kran le paash. Me kokres ačom djido, oun man kamenn le ninna te marell.#11:3 dik: 1. Rayengro liil 19:10
4Hoy penas o Devel leske? Yob penas: Efta zerya morsha ačan mange pral. Kolla čivan pen gar tele ap i čanga glan o Baal.#11:4 dik: 1. Rayengro liil 19:18
5Yaake djal ninna kanna an kava tsiro. Hi menshe koy, kay o Debleske pral ačan. Kolen rodas o Devel vin dran peskro kamlepen. 6Kran yon lačo koova? Oun doleske rodas lo len vin? Na-a! Te krals lo kova, vals peskro kamlepen gar o čačo kamlepen.
7Hoy kanna? Kova, hoy kaman i Israelitarya te lell, kova lan le gar. Kolen kokres, kay o Devel peske vin rodas, kolla lan kova. I tsele vavaren hi i dji dran bar. 8Yaake hi činlo an o Debleskro lab: O Devel bičras i sopaskro dourho ap lende, kay kras len khino. Pengre yakentsa dikenn le les gar, oun pengre kandentsa shounenn le les gar. Kova hi yaake bis ap kava dives.#11:8 dik: Yesaya 29:10-14; 5. Mose 29:3
9Oun o baro ray David penas lendar: Yon rhačrenn firhen o Debleske oun patsenn, te dikell o Devel lačes ap lende. Yaake hi kova gar. O Devel dikell gar lačes ap lende. Na-a. Vell o dives, kay lenn le pengri phagi.
10 Korelo venn lengre yaka, te dikenn le bouder či. Lengro troupo hounte vell bango hako tsiro. # 11:10 dik:
Debleskri gili 69:23-24
Kolla, kay kek bibolde hi, van o Debleskre čave
11Me poučau t'mendar kanna: Peran yon o Debleskro dromestar tele, te nay stenn le bouder gar pre? Na-a. Kova hi gar yaake. Har peran yon o Debleskro dromestar tele, vas o Debleskri barht pash kolende, kay hi kek bibolde, yaake te zilverenn i bibolde ap kolende. 12Har i bibolde peran o Debleskro dromestar tele, vas o Debleskri barht pash i tsele menshende ap i phoub. Oun kova, hoy i biboldenge gar mishto hi, vas i barht kolenge, kay kek bibolde hi. Te hi kova yaake, har boud bareder hi koy barht, te venn i tsele bibolde pale ap o Debleskro drom!
13T'mer han kek bibolde. Oun t'menge penau me: Man hi o Yezouseskro vast. Yob bičras man pash t'mende. Oun me parkrau man pash leste, te nay sikrap t'mende leskro drom. 14Me kamaus, te zilverenn mire menshe ap t'mende, te anap nay kolendar ninna ap o Yezouseskro drom. 15Har yon ap i rig čiddo van, nay van i vavar menshe ap i phoub pash o Debleste. Yaake vas dran i čilačo koova i lačo koova. Har boud shoukeder vell kova, te venn i bibolde pale pash o Debleste. Kova hi yaake shoukar, har te vans le moulo oun palle djido.
I bibolde hi har i djeteskro rouk
16Hako bersh vell o djob činlo, oun dell nevo maro. Te denn le i kotar nevo maro o Debleste, hi kova yaake, har te vell o tselo maro o Debleste dino.
Yaake hi ninna pash o rouk. Te vas leskro drab#11:16 drab vurtsla o Debleste dino, palle hi ninna leskre kashta o Debleske. 17I bibolde hi har i lačo djeteskro rouk. Ko lačo djeteskro roukestar van kashta tele činlo. T'mer han har i kasht o divyo roukestar. Oun t'mer van ap ko djeteskro rouk dren čiddo, oun djivenn lestar, oun lenn i zoor lestar.
18Dran kova penau t'menge: Ma sharenn t'men pral kol kashta, hoy tele činlo van. T'mer hidjrenn gar o djeteskro rouk. Na-a. O djeteskro rouk hidjrell t'men. 19Kanna nay penenn t'mer mange: Kol kashta činas o Devel tele, te vas mer dren čiddo kote, kay kol kashta his, hoy van tele činlo. 20Kova hi čačo. I bibolde patsan gar o Debles. Yaake hi le har kol kashta, hoy van tele činlo. T'mer han har vavar kashta, hoy van dren čiddo ap ko roukeste kokres dran t'maro patsepen. Doleske ma krenn t'men bares! Denn yak!
21Te činas o Devel i čače kashta ko djeteskro roukestar tele, palle nay činell lo t'men ninna tele.
22Yaake dikah, o Devel nay vell lačo, oun yob nay dell i phagi. Kolla, kay peran leskro dromestar tele, kolen dell lo i phagi. Lačo hi lo ap t'mende, kay djivenn dran leskro lačepen. Te djivenn t'mer bouder gar dran leskro lačepen, činell lo t'men ninna tele. 23Kol bibolde, kay venn pale ap o Debleskro drom, oun patsenn ap o Yezous Kristeste, hi har kashta, kay čivell o Devel pale dren an ko djeteskro rouk. O Devel hayvell te krell kova. 24Yob činas t'men o divyo roukestar tele, oun čivas t'men dren an ko lačo rouk, kolestar t'mer gar van. Kitse boudeder čivell lo kol čače kashta pale ap o djeteskro rouk, kolestar yon van.
O tsiro vella, kay venna i Israelitarya pale pash o Debleste
25Mire phrala, me kamau t'menge i baro čačepen te penell, hoy djinenn i menshe gar. Te djinenn t'mer kova, palle penenn t'mer gar: “Har gosevo ham mer!”
T'mer hounte djinenn, hoske hi boud bibolden i dji dran bar, oun patsenn gar ap o Yezous Kristeste. Kova ačella yaake rah, bis te van kol tsele menshe dran i vavar themma ap o Yezouseskro drom, kolendar o Devel kamell, te venn le pash leste. 26Pal kova venn i tsele bibolde ninna ap o Yezouseskro drom. An o Debleskro lab hi činlo: Dran o foro Sion vell kova, kay lell o tselo čilačepen o Yakobeskre čavendar krik. 27Ap ko tsiro, kay lau lengro čilačepen lendar krik, penell o Devel, hi kova kerdo, hoy me lenge penom, oun miro vast pre dom.#11:27 dik: Yesaya 59:20; Yeremia 31:34
28Te dikau, har patsenn i bibolde gar ap o lačo lab o Yezous Kristestar, hounte penap: Yon hi gar o Debleskre mala. Kova vas yaake, te nay venn t'mer pash o Debleste. Te dikau, har rodas o Devel lengre phouren an o phouro tsiro vin, hounte penap, kay leskro kamlepen lenge his. 29Kova, hoy yob della, lell lo gar pale, oun kones yob gole della, oun vin rodella, koles čivrell lo gar ap i rig.
30Glan i tsiro shounan t'mer gar ap o Debleste. Oun palle vas o Debleskro kamlepen ap t'mende. Kova vas an kava tsiro, kay i bibolde gar ap leste shounan.
31Kanna shounenn i bibolde gar ap o Debleste. Oun yaake, har o Debleskro kamlepen ap t'mende vas, yaake vell o Debleskro kamlepen ninna ap lende.
32O Devel moukas i tsele menshen i tsiro, kay shounan le gar ap leste, te nay vell lo lauterenge lačes.
O Debleskro gosvepen
33Har baro hi o Debleskro lačepen ap lauterende!
Har baro hi leskro gosvepen!
Yob djinell halauter,
hoy kek vavar nay djinella.
Kek nay djinell,
har yob rakrell o čačepen vin.
Kek nay hayvell leskre tsele dromma.
34Kek hayvell lauter kova,
hoy hi an o Debleskro dji.
Yob hi o ray.
Kek nay penell leske,
hoy yob hounte krella.
35Koon das les čomone,
hoy yob hounte dell pale? Kek.
36Lestar vas halauter.
Halauter djivell lestar,
oun halauter djal pale pash leste.
Sharas o Debles kanna oun hako tsiro!
Amen.
Currently Selected:
Remarya 11: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
