Filiparya 4
4
Avenn barhtelo hako tsiro!
1Mire kamle phrala, me kamau o tselo djiyestar pash t'mende te vell. T'mer han miri barht oun miro raylepen. Doleske ačenn zoreles pash maro rayeste, o Yezouseste!
2Me mangau t'men, t'mer phenya Evodia oun Sinticha, čingrenn bouder gar khetne! T'mer han phenya an o patsepen ap maro rayeste, o Yezouseste. 3Me mangau ninna tout, miro lačo males, ab lenge ap i rig! Har sikrom i menshenge o Yezouseskro drom, boudran le khetne mantsa oun o phraleha, o Klemens, oun kol vavarentsa, kolengre laba hi činlo an o Debleskro liil, kay halauter dren činlo hi, kay lenn o Debleskro djipen.
4Avenn barhtelo hako tsiro! T'mari barht vell o Yezousestar, maro rayestar. Ava, avenn barhtelo! 5Sikrenn hakeneste t'maro lačepen! O ray Yezous vella an i tikno tsiro pale. 6Ma darenn či! Hako tsiro mangenn o Deblestar, hoy t'men hounte vell, oun penenn leske lauter, hoy ap t'maro dji hi! Oun parkrenn t'men pash leste! 7Palle dell o Devel t'men peskri barht an o dji. Leskri barht hi yaake baro, kay nay hayvah kova gar. Oun o Yezous Kristo rikrell t'maro dji, oun lell t'mari daar krik.
8Pale penau t'menge, mire phrala, rakrenn pral kova, hoy lačo oun čačo hi, hoy djoudjo hi, hoy kamlo hi, hoy mishto hi pash i menshende! Ava, rakrenn pral lauter kova, hoy shoukar hi oun vell sharedo! 9Oun djivenn yaake, har me t'menge penom oun sikrom, yaake har t'mer kova mandar shounan oun ap mande dikan! Oun o Devel, kay kras i drom, te nay djivah an o lačepen khetne, hi t'mentsa!
O Paulo parkrell pes pash i patslende
10Me homs o djiyestar barhtelo, oun parkrom man pash maro rayeste, o Yezouseste, har dikom, kay t'mer bistran man gar, oun bičran man kova, hoy man hounte vell djipaske. Ninna te kaman t'mer kova i rah tsiro mange te krell, djas kova gar.
11Kova penau gar, te sikrap t'men, kay man gar doha his. Na-a. An miro djipen hayvom, te hi mange kova doha, hoy man hi. 12Me nay hom čorvelo, oun me nay hom bravelo. Kova lauter prindjrau. Me nay bokau. Oun me nay hom čalo. Me djinau har kova hi, te hi man boudeder har doha djipaske. Oun me djinau, har kova hi, te hi man gar doha djipaske. 13O Yezous Kristo dell man i zoor, te djivap yaake te yaake.
14Ninna te rakrau yaake, his kova shoukar t'mendar, kay van mange ap i rig, har djas mange gar mishto. 15T'mer patsle, kay an o foro Filipi djivenna, t'mer djinenna, har krom man ap o drom, te penap i menshenge o lačo lab o Yezous Kristestar, oun djom dran o them Macedonia vin. An ko tsiro dan t'mer man lauter, hoy man hounte vas djipaske. Kek vavar patsle, pash kolende homs, kran kova, har t'mer kokres. 16Ninna har homs an o foro Tessalonika, bičran t'mer mange douy kope čomone. 17Me penau kova gar, te denn mange čomone. Na-a, kamau, te denn t'mer o Debleske čomone, te sharell yob t'men.
18Kanna hi man lauter, hoy man hounte vell djipaske, oun boudeder har doha. O Epafrodito anas mange kova lauter, hoy t'mer mange bičran. Kova hi yaake, har te anans t'mer o Debleske lačo koova, hoy soungell mishto, oun kay dikell lo lačes pre oun hi barhtelo pral kova. 19Miro Devel dell ninna t'men lauter, hoy t'men hounte vell djipaske. Les hi i baro bravlepen an o bolepen. Kova dell lo kolen, kay djan ap o Yezous Kristeskro drom. 20Sharas o Debles, maro dades an o bolepen, kanna oun hako tsiro! Amen.
Ačenn o Debleha!
21-22Penenn ap kol tsele patslende, kay djan ap o Yezous Kristeskro drom: “Ačenn maro Debleha!” Kova penenn t'menge ninna kol phrala, kay pash mande hi, ninna i tsele patsle, kay kate an o foro Rom hi. Kolla, kay boudrenn an o kheer o baro rayestar an o foro Rom, kamenn t'men o tselo djiyestar. 23O lačepen maro rayestar, o Yezous Kristestar, vell pral t'mende!
Currently Selected:
Filiparya 4: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
