Filiparya 2
2
Djivenn yaake, har o Yezous djivas!
1Me djinau, t'mer rakrenn i menshenge o Yezouseskre laba an o dji. T'mare laba venna dran o kamlepen, oun krenn lengre djia zoreles. O Debleskro Dourho rikrell t'men khetne, oun t'men hi i baro dji i vavarenge. 2Kova lauter krell man barhtelo. Krenn man gomme barhtleder, te vell t'men yek dji oun yek djipen, oun te kamell hakeno o vavares o djiyestar! Rikrenn khetne oun čingrenn t'men gar! 3Kek te krell čomone, hoy leske kokres mishto hi, vitar či, te vell lo sharedo pash i menshende! Kek te krell, har te vals lo feteder har ko vavar! Na-a, ap hakeneste penau: Dik yaake ap o vavareste, har te vals lo bareder har tou! 4Kek te dikell ap peste kokres, te djal leske mishto! Yob te dikell ninna ap ko vavareste, te djal koleske ninna mishto!
5Djivenn yaake, har o Yezous Kristo djivas! 6Ninna te his lo o Devel, moukas lo peskro raylepen oun peskri zoor, hoy les an o bolepen his. 7Yob das kova lauter pre, oun vas i mensho, oun djivas har i menshe. Yob vas i boudepaskro o Debleske, 8oun shounas ap leste, oun moukas, te van i menshe ray pral leste, oun maran les, oun dan les ap o troushel. 9Doleske kras o Devel, te vell yob bareder har hako vavar ray. 10Oun hakeno an o bolepen oun ap i phoub oun tel i phoub hounte perell glan leste tele ap i čanga#2:10 čanga genoux . 11Oun lauter hounte penenna: “O Yezous Kristo hi o ray pral lauter!” Oun yaake sharenn le o Debles, maro dades an o bolepen.
O Debleskre čave hi har momlia mank i menshende
12Mire kamle phrala oun phenya, t'mer shounan hako tsiro ap kova, hoy me t'menge penom, har pash t'mende homs, ninna kanna, kay gar pash t'mende hom. Me penau t'menge: Krenn lauter, te ačenn ap o Debleskro drom, bis te han pash leste! Shounenn ap o Debleste, oun trashenn lestar! 13Yob sikrell t'men, hoy yob kamella. Ninna krell lo an t'mende, te kamenn t'mer kova, hoy yob kamella, oun te nay krenn kova ninna. 14Lauter kova, hoy t'mer krenna, krenn les i barhtelo djiyestar, oun čingrenn gar!
15Yaake djivenn t'mer, har mishto hi. Oun kek hatsell i doosh ap t'mende. T'mer han o Debleskre čave, oun djivenn mashkral kol menshende, kay hi čilačo oun nashran pen an boud dinelo koova. Mashkral kolende han t'mer har i momlia an i rati, 16te rikrenn t'mer ap o Debleskro lačo lab, hoy o djipen della. Te krenn t'mer kova lauter, palle hom me barhtelo ap ko dives, kay o Yezous Kristo pale vella. Yaake his miri boudi pash t'mende gar čičeske. 17Me anom t'men ap o Debleskro drom. Doleske hom me glan leste tardo har i rashay, kay anell leske t'maro patsepen. Ninna te meroms pash miri boudi o Yezous Kristeske, hom me kanna barhtelo t'mentsa khetne pral t'maro patsepen. 18Avenn t'mer ninna barhtelo koy pral! Ava, avenn barhtelo mantsa!
O Timoteo oun o Epafrodito
19Kamau te bičrap o Timotes sik pash t'mende, oun patsau, te krell maro ray Yezous i drom, te bičrap les. O Timoteo, te vell lo pale pash mande, nay penell lo mange, har t'menge djala, te vap barhtelo pral t'mende. 20Man hi kek vavar har yob, koles savo baro dji hi t'menge, oun yob kamell, te djal t'menge mishto. 21Kol vavar krenn lauter, hoy lenge mishto hi. Yon krenn gar, hoy o Yezous Kristo kamella. 22T'mer prindjrenn o Timotes oun djinenn, har mishto leskri boudi hi. Har me i menshende o Yezouseskro drom sikrom, his lo mange koy, har hi i čavo peskro dadeske koy. 23Koles kamau me pash t'mende bičrell, yaake sik har djinau, hoy kate mantsa djala. 24Me patsau te moukell man o ray Yezous sik pash t'mende te vell.
25Kanna bičrau maro phrales, o Epafrodito, pash t'mende pale. Koles bičran t'mer pash mande, te anas lo man kova, hoy man hounte vell djipaske. Peskri tseli zoryah kras lo mantsa o Debleskri boudi. 26T'mer shounan, kay yob nasselo vas. Har yob shounas, kay t'mer djinenn kova, rovas leskro dji, oun yob kamas pash t'mende te vell. 27Yob his čačepah ap o merepen čiddo. O Devel his leske lačes, oun rikras peskro vast pral leste. Gar kokres leske his lo lačes, ninna mange his lo lačes, te vell mange gar boudeder ropaske. 28Doleske bičrau les sik pash t'mende, te dikenn les t'mer, te venn barhtelo, oun te vell ninna mange bouder gar ropaske. 29Lenn les o djiyestar pash t'mende pre! Yob hi maro phraal an o patsepen ap o rayeste, o Yezouseste. Save phrala har yob hi t'menge boud moldo. 30Har t'mer van nay gar pash mande, his yob mange koy, oun leskro djipen his leske gar boud moldo. Leskri boudi o Yezous Kristeske anas les pash o merepen.
Currently Selected:
Filiparya 2: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
