4. Mose 8
8
I sonakaskri momelengri
1Oun o baro Devel rakras o Moseha oun penas: 2Rake o Aroneha oun pen leske: Te čiveh tou i momlia ap koy momelengri pre, hounte čivess len yaake, te dikenn hake efta momlia glan.
3O Aron kras kova, oun čivas kol momlia yaake ap i momelengri, te dikan le glan i momelengri, yaake har o baro Devel ap o Moseste penas. 4Koy momelengri his dran yek kotar lačo sonakay, leskro mashkralstouno kotar oun kol blumtikre moussya. Yaake har o baro Devel les o Moseste sikras, kran le koy momelengri.
I Levitarya venn o Debleske djoudjo kerdo oun lenn pengri boudi
5Oun o baro Devel rakras o Moseha oun penas: 6Rode i Levitarya dran i Israelitarya vin, oun kre len erligo mange! 7Yaake hounte kress tou lentsa, te kreh tou len erligo: Tou čivess pani ap lende, te vell lengri doosh krik lino. Oun yon hounte činenn halauter pengre balla tele, oun thovenn pengre koola, oun krenn pen yaake djoudjo oun erligo.
8Tou less i terno gouroum#8:8 gouroum stiro , oun koy pashel rhapen o Debleske: yarro, kay djet mashkral hi. Oun i vavar terno gouroum less tou rhačepaske o Debleske, te vell i doosh krik lino. 9Oun aness kol Levitaryen glan o Debleskro kheer. Oun koy hounte venn i tsele Israelitarya khetne. 10-11Oun tou aness kol Levitaryen glan o baro Debleste. Oun kol Israelitarya hounte čivenn pengre vasta ap lende, te sikrenn le, yon hi kolla, kolen i Israelitarya o baro Debleste denna, te krenn yon i boudi an leskro kheer. Oun o Aron anell i Levitaryen glan o baro Debleste.
12Oun kol Levitarya hounte čivenn pengre vasta ap kol terne gourmengre shere. Ko yek vell rhačedo, te vell i doosh krik lino. Ko vavar vell tseles rhačedo o baro Debleske. Yaake vell i doosh i Levitarendar krik lino. 13Oun tou aness kol Levitaryen glan o Aroneste oun leskre čavende, oun yaake glan o baro Debleste, te venn le leske koy. 14Yaake less tou kol Levitaryen dran kol Israelitaryen ap i rig, te venn le miro.
15-16Pal kova nay djan yon koy, te krenn le pengri boudi an o Debleskro kheer. I Israelitarya dan len mande. Doleske hounte kress len djoudjo mange oun aness len glan mande. Kolen lom mange oun gar i vavar morsh čaven an Israel, kay hi i phoureder čave pengre dayendar. 17Hakeno, kay hi o phoureder morsh čavo peskri datar mashkral kol Israelitarya hi mange, hako mensho oun hako firho. Ap ko dives, kay marom i tsele morshen, kay his i phoureder čave pengre dayendar an o them Egiptia, penom: Hako morsh, kay hi i phoureder čavo peskri datar, hi miro. 18Oun kanna lom i Levitaryen oun gar kol vavar morshen, kay hi i phoureder čave pengre dayendar an Israel. 19Oun me dom kol Levitaryen o Aroneste oun leskre čavende, te krenn le koy boudi an o Debleskro kheer. Yaake krenn le, hoy i boudi lauterendar an Israel vals. Oun yaake vell kek bibarht ap i Israelitarya, hoy hounte vals ap lende, te vans yon ap i Debleskri platsa.
20O Mose, o Aron, ninna kol tsele menshe an o Israel kran kolentsa dran o kheer Levi halauter yaake, har o baro Devel kova ap o Moseste penas. 21Oun kol Levitarya moukan pani ap pende te čorell, te vell lengri doosh tele thodo, oun thovan pengre koola. Oun o Aron anas kol Levitaryen glan o baro Debleste oun rhačras kol firhen o baro Debleske, te vell i doosh i Levitarendar krik lino, te venn yon erligo glan o Debleste. 22Koy pal djan yon kote, te krenn yon pengri boudi an o Debleskro kheer glan o Aroneste oun leskre čavende. Lauter vas yaake kerdo, har o baro Devel o Moseske penas, te krenn le kolentsa dran o kheer Levi.
O tsiro, hoy i Levitarya hounte boudrenna
23Oun o baro Devel rakras o Moseha oun penas: 24“I Levitarya, kay hi 25 (biish-te-panč) bersh phouro oun phoureder, hounte venn boudepaske, te krenn le pengri boudi ap o Debleskro kheer. 25Te venn yon paash-sheel bersh, hounte boudrenn le bouder gar. 26Yon nay venn ap i rig pengre phralenge, kay boudrenn ap o Debleskro kheer. Koy boudi, hoy yon kran, hounte krenn yon bouder gar. Yaake hounte kress tou kolentsa dran o kheer Levi, te krell hakeno peskri boudi.”
Currently Selected:
4. Mose 8: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
