Mika 3
3
I pralstoune an o them Youda hounte shounenn i zorelo lab
1Oun o Mika penas:
T'mer pralstoune an o kheer Yakob,
t'mer raya an o kheer Israel!
Shounenn, hoy t'menge penau!
T'mer hounte vans kolla, kay djinenn, hoy o čačepen hi.
2-3O lačepen kamenn t'mer gar!
O čilačepen, kova kamenn te krell.
Mire menshentsa djan t'mer trouyel,
har te vans le marede firhe,
kolenge i hauta tele tserdedo vell,
oun o mass tele činlo foun lengre kokale,
oun i kokale phagedo,
oun palle o mass an i piri činlo oun keredo.
Yaake rhan t'mer mire menshen.
4Doleske shounell o baro Devel gar ap t'mende
ap ko dives, kay denn t'mer gole ap leste.
Yob sikrell t'mende o doumo ko tselo čilačepaske, hoy kran.
5Kava penell o baro Devel ap i rakepangre, kay penenn,
te vell len i lab o baro Deblestar, oun kova hi gar yaake.
Yon rhorhenn i menshen oun penenn kolenge,
kay denn len rhapaske:
Halauter vell mishto t'mentsa!
Kolenge, kay denn len či te rhal, penenn le:
I čilačo tsiro vell pral t'mende.
6Doleske vell pral t'mende kali rati.
T'mer dikenn bouder kek dikepen#3:6 dikepen visiona.
Kek lab o Deblestar vell t'men.
O kham djal tele t'menge,
oun o dives hi t'menge har i rati.
7Oun i dikepangre hounte ladjenn pen,
oun i dourkepangre venn sapaske.
Kek lab o Deblestar hi pash lende.
I ladjatar hounte rikrenn le halauter i diklo glan pengro mouy.
8Man hi i bari zoor.
O baro Devel čivas peskro dourho an mande.
oun kras miro dji pherdi zoor,
te rakrap o čačepen vin,
te penap o Yakobeskre čavenge pengri doosh,
ava, te sikrap i Israelenge
kay le o Debleskro dromestar tele djan.
9Yaake shounenn kova, t'mer pralstoune an o kheer Yakob,
oun t'mer raya an o kheer Israel!
T'mer, kay stakrenn t'mare pirentsa ap o čačepen trouyel,
oun penenn foun kova, hoy čačo hi: Kova hi rhorhepen.
10T'mer krenn o Debleskro foro Yerusalem shoukar oun baro
kol loventsa, hoy anan khetne marepah oun rhorhepah.
11T'mare čačepangre morsha moukenn pen te makell.
T'mare rashaya lenn love koleske,
hoy le i menshenge penenn.
Oun i lovenge penenn o Debleskre rakepangre, glan-vi, hoy vella.
Oun t'mer penenn: “O baro Devel hi ap mari rig.
Kek bibarht nay vell pral mende.”
12Doleske vell o Debleskro foro trouyel vitsedo har i harhetikri phoub.
Oun an o foro Yerusalem ačell kek bar ap o vavar.
Ap i berga, kay o Debleskro kheer tardo hi, venn divye bourra baro.
Kova lauter vell yaake dran t'mari doosh.
Currently Selected:
Mika 3: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
