Mateo 4
4
O beng rakrell o Yezouseha
1Pal kova anas o Debleskro Dourho o Yezouses an o moulo them, kay kamas les o beng o Debleskro dromestar tele te anell. 2Oun star-deesh (40) divessa oun ratsya rhas o Yezous či. Oun palle vas les i bari bok.
3Koy vas o beng pash leste, oun penas: “Te hal tou o Debleskro čavo, rake ap kol barra, te vell lendar maro!”
4Penas o Yezous: “An o Debleskro lab hi činlo: O maro kokres rikrell i menshes gar djido. Yob djivell dran hako lab, hoy o Devel rakrella.#4:4 dik: 5. Mose 8:3”
5Pal kova anas les o beng an o Debleskro foro. Kova hi o foro Yerusalem. Oun o beng čivas les ap o Debleskro baro kheer pral pre, 6oun penas ap leste: “Te hal tou o Debleskro čavo, mouk tout tele te perell! An o Debleskro lab hi činlo: O Devel penas ap peskre bolepangre, te hidjrenn le tout lengre vastentsa, te doukreh tou tire pire gar ap i barra.#4:6 dik: Debleskri gili 91:11-12”
7Penas o Yezous: “Ninna hi an o Debleskro lab činlo: Rike o Debles gar dineleske, te sikrell lo tout har zorelo yob hi.#4:7 dik: 5. Mose 6:16”
8Pal kova anas les o beng ap i bari berga pre, oun sikras les i tsele themma ap i phoub oun lengro bravlepen, 9oun penas: “Kava lauter kamau tout te dell, te pereh tou glan mande tele, oun mangeh man an.”
10Koy penas o Yezous ap leste: “Dja touke mandar, tou beng! An o Debleskro lab hi činlo: Tou mangess o Debles an, – yob hi tiro ray, – oun vess leske kokres koy!#4:10 dik: 5. Mose 6:13”
11Koy djas peske o beng. Oun bolepangre#4:11 bolepangre engle van pash o Yezouseste, oun his leske koy.
An o them Galilea
12Oun har o Yezous shounas, te vas o Yohanni stildo, djas lo dran o them Youdea vin, oun djas pale an o them Galilea. 13Kote ačas lo gar an o foro Nazaret. Yob djas doureder oun djivas an o foro Kapernaum, hoy pash o baro pani Genezaret čiddo hi. Kova hi an i themma Zabulon oun Naftali čiddo.
14Yaake vas kova čačo, hoy o Debleskro rakepaskro, o Yesaya, glan i rah tsiro penas: 15T'mer menshe an i themma Zabulon oun Naftali, t'mer, kay djivenna pash o baro pani, an o them vergel o pani Yordan, t'mer djivenn kote, kay kolla djivenna, kay prindjrenn o Debles gar. 16T'menge hi ko lab, hoy o Debleskro rakepaskro penas: T'mer djivenna an i rati, oun dikenna i bari momeli. Yaake har o kham pre djala, vella i momeli pash kolende, kay hi len traash o merepastar.#4:16 dik: Yesaya 9:1
17Ap ko tsiro penas o Yezous ap i menshende: “Moukenn t'maro čilačo drom, oun djan ap o Debleskro drom! O tsiro vell sik, kay lell o Devel i menshen dran o čilačepen vin.”
O Yezouseskre mala
18Oun har yob pash o baro pani an o them Galilea djas, dikas lo kote douy phralen: O Simon, kay kharella ninna Petro,#4:18 O lab Petros his o grichtikro lab. O lab Petro hi o lab ap Romanes. oun leskro phrales, o Andreas. Kolla his mačepangre, oun vitsran pengre mačengre gone an o pani, te taprenn le mačen. 19Oun yob penas ap lende: “Avenn mantsa! Me krau t'mendar menshen, kay anenn vavaren pash mande.” 20Har yon kova shounan, moukan le pengre mačengre gone, oun djan leha.
21Oun yob djas doureder, oun dikas douy vavar phralen: O Yakobo oun o Yohanni. Kolengro dad hi o Zebedeo. Yon his pash pengro dadeste an o bero#4:21 bero barque beshdo, oun kran i mačengre gone tseles. Oun yob das len gole. 22Oun sik stan le pre, moukan o bero oun pengro dades, oun djan leha.
O Yezous krell boud nasselen sasto
23Oun yob djas an o tselo them Galilea trouyel, oun rakras an i biboldengre kangria, oun penas i menshenge ko lačo lab, kay o Devel kamell len dran o čilačepen te lell, oun kamell lengro ray te vell. Oun yob kras lauteren sasto, kay mank lende nasselo hi. 24Oun ninna an o tselo them Syria shounan le lestar. Oun yon anan lauteren pash leste, kay nasselo hi. Mashkral lende his kolla, kay hi len bare douka, oun kolla, kay hi an lende benga, oun kolla, kay hi nasselo an pengro shero, oun kolla, kay hi bango. Oun yob kras len sasto. 25Oun boud menshe djan leske palla. Yon van dran o them Galilea, oun dran ko them, kay i deesh forya čiddo hi. Yon van ninna dran o them Youdea, oun dran o foro Yerusalem, oun dran o them, hoy ap i vavar rig o panyestar Yordan čiddo hi.
Currently Selected:
Mateo 4: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
