3. Mose 20
20
I phagi i bari doshake
1O baro Devel penas ap o Mose: 2Pen ap i Israelitarya: Koon t'mendar yek peskre čavendar o rhorheno debleste, o Molok, das, kova hounte merell. I tsele menshe hounte vitsrenn les i barrentsa moulo. Kova hi ninna yaake, te krell sau koova i vi-themari, kay pash t'mende djivell. 3Me dikau čilačes ap hakeneste, kay kova krell, oun me moukau les bouder gar te djivell mank peskre menshende. Yob das yek peskre čavendar o Molokeste, oun kras yaake miro kheer pale-čiddo, oun kras mantsa, har te voms gar kokres o čačo Devel.
4Te pandan i Israelitarya pengre yaka glan kova, hoy ko morsh kras, oun denn les gar moulo, 5palle dau me kokres ko morshes peskri phagi, ninna leskre menshen. Me moukau les oun hakenes, kay ko debles Molok pal nashas, bouder gar mank pengre menshende te djivell.
6Miri rholi vell ninna ap koleste, kay djal pash i dourkepangre oun pash kolende, kay i moulen poučenn, te poučell lo lendar, hoy te krell lo. Me moukau les bouder gar mank peskre menshende te djivell.
7Me, o baro Devel, hom t'maro Devel. Doleske avenn mange kokres koy. Či hounte vell tardo mank mande oun t'mende! 8Krenn, hoy me t'mendar kamau! Rikrenn t'men ap kova! Me, o baro Devel, rodom t'men vin, te venn mire menshe.
9Te rakrell yek pral peskro dadeste oder peskri date bibarht vin, palle hounte vell lo moulo dino. Koon savo koova krell, ap koleste vell leskro rat. 10Te sovell yek i romyah i vavarestar, hounte venn kol douy maredo.
11Te sovell i morsh i romyah peskro dadestar, anell lo ladj ap peskro dadeste. Yob oun koy djouvel hounte hidjrenn pengri phagi, oun hounte venn maredo. 12Te sovell i morsh peskro čaveskri romyah, hounte hidjrenn le pengri phagi oun hounte venn maredo. I baro vi-ladjedo koova kran le. 13Te sovell i morsh i vavar morsheha, krenn le i baro pale-čiddo koova. Kol douy hounte hidjrenn le pengri phagi oun hounte venn maredo. 14Te lell i morsh i romyat oun lakri dat gomme pashel, hi kova i vi-ladjedo koova. Yob hounte vell an i yag rhačedo, oun kol douy djouvya ninna. Kamau te vell kek vi-ladjedo koova mank t'mende.
15Te sovell i morsh i firheha, palle hounte vell lo moulo dino. Oun ko firho vell ninna maredo. 16Te sovell i djouvel i firheha, palle dess tou koy djouvyat oun ko firhes moulo. Yon hounte hidjrenn pengri phagi, oun hounte merenn.
17Te sovell i morsh peskri penyah, i čay leskro dadestar oder leskri datar, hi kova i bari ladj. Kol douy hounte venn moulo dino glan i tsele menshende. Ko morsh sovas peskri phenyah, oun hounte hidjrell peskri doosh.
18Te sovell i morsh i djouvyah, kolat peskri djouvyakro koova hi, krenn pen kol douy pale-čiddo, oun nay djivenn bouder gar mank pengre menshende.
19Kek te sovell i phenyah peskri datar oder peskro dadestar. Koon savo koova krell, anell ladj ap peskri bibi. Yon hounte hidjrenn pengri doosh. 20Koon i romyah peskro kakestar sovell, anell ladj ap peskro kakeste. Kol douy hounte hidjrenn pengri doosh. Yon merenn kek čaventsa. 21Te sovell i morsh i romyah peskro phralestar, hi kova i pale-čiddo koova. Yob anas ladj ap peskro phraleste. Kek čave vell len.
22Krenn kova, hoy me t'mendar kamau oun rikrenn t'men ap miro čačepen, te venn gar vin tradedo dran ko them, an kova me t'men anau, te djivenn koy dren.
23Ma djivenn pal ko koova, pal kova i vavar menshe djivenn, kolen me glan t'mende vin tradau. Yon kran kava tselo pale-čiddo koova, oun van infam glan mire yaka. 24T'menge penau: Lengro them dau t'mende, te vell lo t'maro. Kova hi i them, kay boud thoud oun gvin hi. Me, o baro Devel, hom t'maro Devel, oun rodom t'men mange dran i vavar themma vin.
25Doleske ma rhan save firhen oun čirklen, hoy čivom ap i rig, te venn le t'menge pale-čiddo. T'mer hounte djinenn, have firhen nay rhan oun haven nay rhan gar, ninna have čirklen nay rhan oun haven nay rhan gar. Ma krenn t'men pale-čiddo kol firhentsa oun čirklentsa oun tikne firhentsa, hoy djan pral i phoub, hoy hi t'menge pale-čiddo. Te rhan t'mer save firhen, venn t'mer ninna pale-čiddo. 26Me hom o baro Devel. Kek vavar hi har me. An mande hi kek čilačepen. Oun t'men rodom vin dran i vavar themma, te venn t'mer miro. Doleske hounte venn kokres mange oun djivenn har i Debleskre menshe djivenn.
27Hako morsh oun haki djouvel, kay dourkrell oder poučell i moulen, hounte hidjrell peskri phagi oun merell. T'mer hounte vitsrenn len moulo i barrentsa.
Currently Selected:
3. Mose 20: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
