Yona 1
1
O Yona vell o baro Deblestar an o foro Ninive bičedo
1O baro Devel rakras o morsheha Yona, koleskro dad o Amitay his, oun penas: 2“Dja sik an o baro foro, hoy kharell Ninive, oun de lakri doosh vin gole. Lakro čilačepen vas glan mande.”
O Yona shounell gar oun nashell peske
3Oun o Yona stas pre oun kamas glan o baro Debleste an o foro Tarsis te nashell, oun vas tele an o foro Yafo. Oun har lo i shiffo hatsas, hoy kamas pash o foro Tarsis te oulerell, das lo love koy, oun stas dren, te nay oulerell lo lentsa pash o foro Tarsis, oun te vell lo glan o baro Debleskre yaka bouder gar diklo.
4Kote moukas o baro Devel i zorelo phourdepen pral o baro pani te vell, hoy yaake zorelo his, te kamas ko shiffo khetne te phagell. 5Oun i bari traash vas ap kol tsele morshende, kay ap ko shiffo boudran. Oun yon dan i bari gole hakeno ap peskro debleste. Oun yon vitsran ko koova, hoy ap ko shiffo čiddo his, an o baro pani, te vell ko shiffo bouder gar yaake pharo. Oun o Yona his tele an o shiffo, his koy čiddo, oun sovas zoreles.
6Kote vas ko ray pral kava shiffo pash leste oun poučas lestar: “Hoy hi kanna touha? Hoske soveh tou? Ste pre, oun khare tiro debles an! Nay vell, tiro devel dikell kamles ap mende, te meras gar!”
7Oun yek rakras o vavareha: “Avenn, mer kamah kashta te vitsrell, te djinas nay, dran koneste savi bibarht ap mende vas.”
Oun har yon kol kashta vitsran, sikran le ap o Yona. 8Kote penan yon ap leste: “Pen menge, koneskri doosh hi kova, te djal menge yaake čikles? Hoy hi tiri boudi, oun kay veh tou? Dran havo them hal tou, oun have menshendar veh tou?”
9Oun yob penas ap lende: “Me hom i Hebreari oun mangau o baro Debles an, ko Devel pral o bolepen, kova kay kras o baro pani oun ninna o them.”
10Ninna penas lo lenge, kay yob o baro Deblestar krik nashas. Kote trashan kol morsha boudeder, oun poučan lestar: “Hoske kral tou kova? 11Hoy te kras kanna touha, te vell ko baro pani pokones oun moukell mendar tele?” Ap ko tsiro vas o baro pani divyes oun divyeder.
12O Yona penas ap lende: “Lenn man oun vitsrenn man an o baro pani! Palle vell o baro pani pale pokones oun moukell t'mendar tele. Me djinau: Kova hi miri doosh, kay kava baro phourdepen pral t'mende vas.”
13Ninna har lan kol morsha pengri tseli zoor khetne, te anenn le ko shiffo pale ap o them, djas kova lenge gar. Ko baro pani vas divyeder oun divyeder. 14Kote dan le ap o baro Debleste gole oun penan: “Ah, baro Devel, ma mouk men te tassell dran kava morsheste. Ma mouk leskro rat pral mende te vell! Tou, baro Devel, kral, hoy an tire yaka mishto hi.”
15Oun yon lan o Yona oun vitsran les an o baro pani. Kote vas ko baro pani ap yek kopo pokones oun his bouder gar divyo. 16Kote lan i morsha bari traash glan o baro Debleste. Oun yon rhačran leske i firhes, te parkrenn le pen pash leste, yaake har yon pen sovel dan.
Currently Selected:
Yona 1: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
