Habakuk 3
3
I gili, hoy o Habakuk givell
1Kava hi ko mangepen, hoy o Debleskro rakepaskro, o Habakuk, o Deblestar mangas.#3:1 An o hebretikro rakepen hi kote i lab tardo, hoy penell har givenn le kava mangepen.
2Baro Devel, me shounom, hoy tou lauter kral,
Har baro hal tou, baro Devel!
Kre savo koova pale an maro tsiro,
savo baro koova, mouk les men ninna te dikell an maro tsiro!
An tiri rholi biste gar tiro kamlepen!
3O Devel vell dran o them Teman,
dran kol berge, hoy kharenn Paran.#3:3 Kate hi tardo o hebretikro lab Sela. Kova kamell te penell pausa.
O bolepen hi pherdo leskro raylepen.
Oun ap i tseli phoub sharenn les i menshe.
4Leskro shoukapen hi har o kham, hoy pre djal.
Har khameskri momeli djal dran leskre vasta vin.
Kote dren hi leskri zoor khatedo.
5I djoungelo nasslepen djal glan leste.
Oun pal leste vell vavar i nasslepen, hoy rhal i menshen pre.
6Čivell yob peskro piro ap i phoub,
palle trissell li.
Lell yob i vavar themma an o yak,
trashenn i tsele menshe.
Kol bare phoure berge phagenn an kotya,
oun kol tikne phoure berge perenn khetne,
te nashell yob – har an o phouro tsiro – pral i phoub.
7Me dikom, har daran kol menshe,
kay djivenn an plarhtene khera an o them Koushan,
oun har trissan i menshe an o them Midian.
8Baro Devel, his tout i rholi ap i zorele panya?
Val tou rhoyedo pral o baro pani,
har klissal tou vin tire grayentsa,
oun tire kourepangre vourdya zorleder his har hake vavar?
9Tou lal tiro bogo vin,
oun lal tire fayle dran lengri possita.
Tou phagal i phoub pre,
oun lengste panya nashan vin.
10I berge dikan tout oun trissan.
Zorelo brishin peras tele dran o bolepen.
O baro pani das bari gole.
O kham bistras te djal lo pre.
11Oun o čon ačas tardo,
har dal tire fayle karye.
Tiri sasterno vitsepaskro čouri vas diklo har i yag.
12I rholyah stakral tou ap i phoub,
an tiri rholi dal tou i menshen an vavar themma.
13Tou djal vin, te vess ap i rig tire menshenge,
oun o rayeske, koles tou vin rodal.
I dacha ap o kheer o čilačestar dal tou khetne.
Oun leskro kheer rissral trouyel bis ap i telstoune barra.
14Tou dal leskre fayle an leskro shero.
Leskre tsele lourde nashan penge kate te kote.
An pengro pre-phourdepen kaman le men krik te tradell.
Kolen kay kek zoor hi, kaman le pre te rhal an pengro khatepen.
15Tou stakral ap o baro pani tire grayentsa,
oun o pani hadas pes zoryah.
16Har sikras man o Devel kova lauter,
trissom me.
Har shounom leskro rakepen,
trissas miro mouy.
I traash djas mange an i kokale,
oun nashte homs bouder gar ap mire herya tardo.
Me kamau ap ko dives te dikell,
kay vell koy bibarht pral kol menshende,
kay djan ap mende pre.
17O faygetikro rouk hi gomme gar zenelo,
oun ap i drakengre rouka hi kek drake.
O djeteskro rouk hidjrell kek djeteskre drake.
oun ap i harhetikri phoub vell kek djob baro.
Kek bakre hi vin,
oun kek groumya hi tarde an i stanya#3:17 stanya stalla .
18Miro dji hi barhtelo pral o baro Debleste,
Miro dji givell oun djinell:
Miro Devel lell man vin dran o merepen.
19O baro Devel krell man zoreles.
Yob krell mire pire har i pire o tserfestar,
te nay stap pral i berge oun perau gar.
Pash kay gili vell bashedo ap doryengre bashepangre.
Currently Selected:
Habakuk 3: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
