1. Mose 40
40
Douy pralstoune boudepangre denn souni
1Pal ko tsiro anan douy pralstoune boudepangre an o baro rayeskro kheer doosh ap pende. Kol douy his i pralstoune pral o pipen oun o pral o maro. 2Oun o baro ray vas an i bari rholi pral kol douyende, 3oun čivas len stildo an ko kheer o pralstunestar i lourdendar. An ko stilepen his ninna o Yosef. 4Oun ko pralstouno lourdo bičras lenge o Yosefes, te vell yob lenge koy. Oun yon his i tsiro an o stilepen.
5Yek rati dan kol douy souni, o pralstouno pral o pipen oun o pralstouno pral o maro. Hakeno das souni. Oun koy souni kamas lenge čomone te penell. 6Taysarlakro vas o Yosef pash lende oun dikas, kay djal lenge gar mishto. 7Koy poučas yob kol douyendar: “Hoske djal t'menge gar mishto?”
8Penan yon ap leste: “Mer dam souni. Oun kek hi koy, kay penell nashte, hoy mare sounya menge penenna.”
Penas o Yosef ap lende: “O Devel penell nay, hoy kol sounya penenna. Penenn t'mare sounya mange!”
9Koy penas o pralstouno pral o pipen peskri souni o Yosefeske oun penas: “An miri souni dikom i drakengro rouk glan mande tardo. 10Ap ko drakengro rouk his triin kashta. Kolla van zenelo oun lan bloume. Oun yaake sik har bloume koy his, djan le pre oun drake van baro ap lende. 11Man his o baro rayeskro khoro an miro vast, čivom i mool dran kol drake an o baro rayeskro khoro, oun dom les o baro rayeste te piyell.”
12Oun o Yosef penas ap leste: Kay souni penella: “Kol triin drakengre kashta hi triin divessa. 13An triin divessa moukell tout o baro ray dran o stilepen vin oun dell tout pale tiri boudi. Oun tou deh o baro rayeste pale te piyell, yaake har tou kral, har tou o pralstouno pral leskro pipen hals.” 14O Yosef penas doureder: “Te djal touke mishto, biste man gar! Rake mange lačo pash o baro rayeste! Oun an man dran kava kheer vin! 15Hom čoredo dran o them, kay djivenn i Hebrearya. Oun kate krom me vitar či, kay hounte djap an o stilepen.”
16Har o pralstouno pral o maro dikas, kay kova lačo his, hoy ko vavar souni das, penas yob ap o Yosefeste: “Me dom ninna souni: Ap miro shero his triin čare pherdo mare. 17An o pralstouno kashteno čaro his lauter lačo peklo koova o baro rayeske. Oun čirkle van oun rhan lauter dran o čaro ap miro shero krik.”
18Penas o Yosef: “Kay souni penell menge: Kol triin čare hi triin divessa. 19An triin divessa moukell tout o baro ray dran o stilepen vin oun bladell#40:19 bladell hengerell tout ap i kasht. Oun i čirkle rhan tiro mass toutar krik.”
20Ap o triinto dives his o dives, kay vas o baro ray i bersh phoureder. Oun yob kras i baro rhapen kol tsele pralstunenge, kay leske boudran, oun moukas kol douyen, ko pralstounes pral o pipen oun o pralstounes pral o maro, dran o stilepen vin. 21Oun yob das o pralstounes pral o pipen pale leskri boudi, te dell yob o baro rayes pale te piyell. 22Oun o pralstounes pral o maro moukas yob te bladell#40:22 bladell hengerell ap i kasht, yaake har o Yosef lenge glan-vi penas. 23Oun o pralstouno pral o pipen bistras o Yosefes. Oun yob vas leske bouder gar an o shero.
Currently Selected:
1. Mose 40: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
