7
1Oun o baro Devel penas ap o Moseste: “Shoun, me krom, te vess har o Devel o Faraeske. Oun tiro phraal Aron rakrell touke. Yob rakrell, hoy leske peneh. 2Tou peness o Aroneske lauter, hoy me touke penau. Oun yob penell les ap o Farao, te moukell yob i Israelitaryen dran peskro them te djal. 3Me kamau leskro dji har i bar te krell, yaake te nay krap boud baro koova an o tselo them Egiptia, te sikrap miri bari zoor. 4Oun o Farao shounella gar ap t'mende, ninna te vell miri rholi boud kope pral leste oun leskro them. Oun palle lau mire menshen, i Israelitarya, vin dran o them Egiptia. 5Oun kol Egiptarya dikenn oun hayvenn, kay hom me o baro Devel, te hadau me miro vast pral o them Egiptia oun lau i Israelitarya mashkral lende vin.”
6Oun o Mose oun o Aron kran yaake, har o baro Devel lenge penas. 7Oun o Mose his 80 (orhta-deesh) bersha oun o Aron 83 (orhta-deesh-te-triin) bersha phouro, har yon ap o Farao rakran.
O Aroneskro kasht vell i sap
8Oun o baro Devel penas ap o Mose oun ap o Aron: 9“Te rakrell o Farao ap t'mende oun penell: Krenn yek baro koova an o Debleskri zoor, yaake te patsap t'men, palle peness tou ap o Aron: Le tiro kasht oun vitse les glan o Farao! Palle vell o kasht i sap.”
10Kote djan o Mose oun o Aron pash o Farao dren, oun kran les yaake, har o baro Devel lenge penas. Oun o Aron vitsras peskro kasht ap i phoub glan o Farao oun glan kol pralstunende an o rayeskro kheer. Oun o kasht vas i sap.
11Kote moukas o Farao i goseve morshen oun i dourkepangren gole te dell. Oun kol egiptikre dourkepangre kran emligo koova an pengri zoor. 12Yon vitsran ninna pengre kashta ap i phoub. Oun ninna lendar van sapa. O Aroneskro kasht rhas ko vavar kashta pre. 13Har dikas o Farao kova, ačas leskro dji pandlo, oun yob shounas gar ap lende. Yaake vas, hoy o baro Devel penas.
I ersti phagi: O pani vell rat
14Oun o baro Devel penas ap o Mose: “O Faraeskro dji hi har dran bar. Yob moukell gar i Israelitaryen te djal. 15Dja taysarlakro pash o Farao! Yob djala tele pash o pani Nil. Le ko kasht an tiro vast, kolestar i sap vas. 16Oun pen ap leste: O baro Devel, o Devel pral i Hebrearya, bičras man pash toute, oun moukell touke te penell: Mouk mire menshen te djal, te mangenn le man an an o moulo tato them. O tselo tsiro shounal tou gar. 17Doleske penell o baro Devel: Dikess oun hayvess, te hom me o baro Devel. Dik, me dau o kashteha, hoy an miro vast hi, ap o pani Nil. Oun ko pani vell rat. 18Palle merenn i tsele mače dren. Oun o Nil khandella yaake djoungeles, te nay piyell kek Egiptari o pani bouder.”
19Oun o baro Devel penas ap o Mose: “Pen ap o Aron: Le tiro kasht oun rike tiro vast pral i panya an o them Egiptia: pral i panya, hoy nashenna oun pral o pani, hoy tardo hi. Yaake te vell o tselo pani rat an o tselo them Egiptia. Ninna an i khore dran kasht oun bar hi palle rat dren.”
20Oun o Mose oun o Aron kran yaake, har o baro Devel lenge penas. Oun yob hadas o kasht oun das ap o pani Nil. Oun o Farao oun i pralstoune an leskro kheer dikan kova. Oun o tselo pani an o Nil vas rat. 21Oun i mače an o Nil meran. Oun o Nil vas khandlo oun khandas yaake zoreles, te nay piyas kek Egiptari o pani dran o Nil. Oun o rat his an o tselo them Egiptia.
22Oun i dourkepangre an o them Egiptia kran ninna yaake an pengri zoor. Oun o Faraeskro dji ačas pale pandlo, oun yob shounas gar ap lende. Yaake vas, hoy o baro Devel penas. 23Oun o Farao rissras pes trouyel oun djas pale an peskro kheer oun moukas peske kova gar an o dji te djal. 24I tsele Egiptarya hadan i phoub vin pash o pani Nil, te hatsenn le pani te piyell. O pani dran o Nil nay piyan le gar.
I douyti phagi: I djambe venn pral o them
25Oun efta divessa djan trouyel pal ko dives, kay o baro Devel ap o pani Nil das. 26Koy rakras o baro Devel ap o Mose: “Dja pash o Farao dren, oun pen ap leste: Kava penell o baro Devel: Mouk mire menshen te djal, te nay mangenn le man an. 27Te moukeh tou len gar te djal, palle dau me o tselo them yaake, te vell lo pherdo djambe. 28O tselo Nil vell pherdo djambe. Oun yon venn pre an tiro kheer, an tiri isema, kay soveh, oun an tiro čiben, ninna an i khera, kay i pralstoune djivenna, ninna an i tsele khera, kay i Egiptarya djivenna, an lengre boba, oun an i čare, kay yon o maro dren krenn. 29Ava, i djambe venna pre ap toute oun ap i tsele Egiptarya, ninna ap i tsele pralstunende.”