2. Mose 40
40
O Debleskro plarhteno kheer vell pre tardo
1O baro Devel rakras o Moseha oun penas: 2Čip o Debleskro plarhteno kheer pre ap o ersto dives an o ersto čon. 3Oun čip ko morhton dren, kay o Debleskre deesh laba dren hi. Glan o morhton pande ko kouč kotar than pre! 4An ninna koy rhapaskri dren oun čip i Debleskre mare pre! Ninna koy momelengri čip an o kheer, oun čip i momlia pre. 5Glan o morhton, kay o Debleskre deesh laba dren hi, čip o sonakaskro bob, kay soungepaskro koova rhačedo vella! Oun an o voudar pande koy bari plarhta pre!
6Glan o Debleskro plarhteno kheer čip i sasterni rhačepaskri#40:6 sasterni rhačepaskri: sasterno altaro , kay i firhe o Debleske rhačedo venna. 7Mank o kheer oun i sasterni rhačepaskri čip o thopaskro čaro oun čore pani dren! 8Troul i platsa glan o kheer čip i pesse kashta pre, oun pande kol layntikre kotya mank lende! Oun an o voudar glan i platsa pande koy bari plarhta pre!
9Le ko makepaskro djet oun mak leha o kheer oun lauter, hoy koy dren hi, te vell lo o Debleske! 10Mak ninna i sasterni rhačepaskri oun lakre tsele koola, te vell li o Debleske oun leske kokres! 11Mak ninna o thopaskro čaro oun kol herya, ap kolende o čaro tardo hi, te vell lauter o Debleske.
12Pen o Aroneske oun leskre čavenge, te venn le glan o Debleskro plarhteno kheer, oun thob len! 13Rib o Aroneske o rashayeskre ripya an, mak les o djeteha, te vell lo miro rashay. 14An ninna leskre čave koy oun rib lenge i rashayengre gada an! 15Oun mak len o djeteha yaake har makal lengro dad, te venn le mire rashaya. Yon oun lengre čave pal lende te venn le maklo o djeteha, te venn le mire rashaya hako tsireske.
16O Mose kras lauter har o baro Devel leske penas. 17Yaake vas o Debleskro kheer pre tardo an o douyto bersh ap o ersto dives an o ersto čon.
18O Mose čivas i činle kashta ap herya oun pandas len i pandepangre kashtentsa khetne. Palle van i pesse kashta pre tardo. 19Oun koy pral čivas lo kol douy ledertikre plarhte, hoy čakrenn o kheer. Lauter kras lo yaake har o baro Devel leske penas.
20Oun yob las i barra, kay o Debleskre deesh laba dren činlo hi, oun čivas len an o sonakaskro morhton, oun čivas i hidjepaskre kashta an i goustria ap o morhton. Oun pral ap o sonakaskro morhton čivas lo o pralstouno kotar, hoy sikrella, kay o baro Devel peskre menshenge lačo hi. 21Oun yob anas o morhton an o kheer oun pandas ko kouč kotar than glan o morhton, te vell lo gar diklo. Yob kras kova yaake, har o baro Devel leske penas.
22Oun yob anas i rhapaskri an o kheer oun čivas lat glan o kouč kotar than ap i servi rig, 23oun čivas o Debleskre mare pre glan o baro Debleste. Yob kras kova yaake har o baro Devel leske penas.
24Ap i čači rig an o kheer, vergel i rhapaskri, čivas lo i momelengri, 25oun čivas i momlia pre yaake har o baro Devel leske penas.
26Glan o kouč kotar than čivas lo o sonakaskro bob, 27oun rhačras ap leste kouč soungepaskro koova. Yob kras les yaake har o baro Devel leske penas.
28An o khereskro voudar pandas lo koy bari plarhta.
29Vin glan o khereskro voudar čivas lo i sasterni rhačepaskri#40:29 sasterni rhačepaskri: sasterno altaro , oun ap leste rhačras lo firhen oun rhapen o baro Debleske, yaake har yob leske penas.
30Mank o kheer oun i sasterni rhačepaskri čivas lo o thopaskro čaro oun čoras pani dren thopaske. 31Oun o Mose, o Aron oun leskre čave thovan pengre vasta oun herya koy dren. 32Yon hounte thovenn pen hako kopo, kay djan le an o Debleskro plarhteno kheer oun pash i sasterni rhačepaskri. Yaake penas kova o baro Devel o Moseske.
33Oun troul o kheer oun i sasterni rhačepaskri čivas lo i pesse kashta pre oun pandas kol layntikre kotya mank lende, te vas i platsa. Oun an o voudar glan i platsa čivas lo koy bari plarhta. Yaake kras o Mose koy tseli boudi.
O baro Devel vell an peskro kheer
34Koy vas i folka ap o Debleskro plarhteno kheer. Oun o kheer vas pherdo raylepen o baro Deblestar. 35Oun har i folka pral o kheer ačas oun o kheer pherdo raylepen o baro Deblestar his, nay djas o Mose gar dren.
36Hako kopo, kay hadas pes i folka, djan i Israelitarya doureder yaake rah, har his le ap pengro drom an o moulo tato them. 37Te ačas i folka pral o Debleskro kheer, ačan le kote oun djan gar doureder yaake rah bis te hadas li pes. 38Oun i tsele Israelitarya dikan koy folka. Ap o dives his li pral o Debleskro kheer, ap i rat his li pherdi yag yaake rah har i Israelitarya ap o drom his.
Currently Selected:
2. Mose 40: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
