2. Mose 19
19
I Israelitarya venn pash i berga Sinay
1-2Oun i Israelitarya djan penge dran Refidim oun van an o moulo tato them Sinay. Ap kova dives his triin čonna, har nashan le dran o them Egiptia. Oun yon ačan glan i berga.
3Oun o Mose djas pre ap i berga pash o Debleste. Kote das o baro Devel ap leste gole: “Kava peness tou ap i Israelitarya, kol menshende, kay venna pal o Yakob: 4T'mer dikan, hoy krom me halauter ap kol Egiptarya, oun har anom t'men pash mande yaake har i baro čirklo hidjrell peskre čaven ap peskro doumo. 5Kanna shounenn: Te rikrenn t'mer lauter, hoy me t'menge penau, oun shounenn ap mire tsele laba, palle han t'mer mange koučeder har i tsele vavar menshe ap kay phoub. Ninna te hi i tseli phoub miro, han t'mer kokres mire menshe, 6oun han vi-rodedo, te venn bare raya oun rashaya, kay hi mange koy. Kal laba peness tou ap i tsele Israelitarya.”
7Koy djas o Mose pale oun das i tsele phoureden gole oun penas lenge kal laba, hoy o baro Devel leske penas. 8Oun i tsele menshe penan har dran yek mouy: “Lauter kova, hoy o baro Devel penas, kova kamah te krell.”
Oun o Mose penas o baro Debleske, hoy i tsele Israelitarya penan.
9Kote penas o baro Devel ap o Mose: “Shoun, an i pessi folka khatemen vau me pash toute. Yaake te nay shounenn i tsele Israelitarya, hoy me touke penau, yaake te patsenn le tout hako tsireske.”
Oun o Mose penas o baro Debleske, hoy i Israelitarya penan.
10Oun o baro Devel penas ap o Mose: “Dja pash lende oun pen lenge, te krenn le pen djoudjo mange kava dives oun taysar, te thovenn le pengre koola. 11Yaake te venn le djoudjes mange koy tardo o triinto dives. Ap o triinto dives vau me, o baro Devel, glan i tsele menshende tele ap i berga Sinay. 12Pen lenge, har dour nay djan le, te denn le yak, te djal kek lendar ap koy berga. Kek čivell peskri heri ap i berga! Hakeno, koon kova krella, hounte merell. 13Koles hounte taprell kek an. Vitsrenn les moulo i barrentsa! T'mer nay denn les ninna tele karye. Krenn kova ninna i firheske, hoy čivas peskre herya ap koy berga. Kova ačell gar djido.
Te vell ko tsiro, kay shounenn, har phourdell yek ap i phourdepaskri, palle venn pre ap i berga!”
14Koy djas o Mose i berga tele oun penas i menshenge, te krenn le pen djoudjo o Debleske. Oun hakeno thovas peskre koola. 15Oun yob penas: “Rikrenn t'men djoudjo o triinto diveske! Oun kek morsh taprell an kava tsiro peskri romyat an!”
O baro Devel vell ap i berga tele
16Ap o triinto dives taysarlake das o bolepen bari gole, oun yag das tele karye, oun i pessi folka his pral i tseli berga, oun i phourdepaskri das bari gole. Oun i tsele Israelitarya lan i bari traash, te trissan lengre kokale. 17O Mose anas len pash i berga, kay o Devel hi. Oun yon ačan tardo tele glan i berga.
18Oun troul koy tseli berga Sinay his yagakro dourho, har vas o baro Devel an i yag tele ap i berga. Oun i yagakro dourho djas pre dran i berga yaake har dran i baro bob. Oun koy tseli berga trissas zoreles. 19Oun koy phourdepaskri das zorleder oun zorleder gole. Oun o Mose rakras o Debleha. Oun o Devel rakras pale ap leste yaake zoreles, har o bolepen gole della.
20Oun o baro Devel vas tele ap i berga Sinay, oun das o Mose pre gole. Oun kova djas pre ap i berga. 21O baro Devel penas ap o Mose: “Dja tele oun pen lenge, te venn le gar doureder pre, te dikenn le man. Te venn le pre, hounte merenn boud lendar. 22Ninna i rashaya, hoy venn glan mande, hounte krenn pen djoudjo mange, te merenn le gar!”
23O Mose penas ap o baro Debleste: “I menshe nay venn gar pre ap i berga. Tou penal menge, te hi kay berga touke, oun penal mange, te sikrom len, har dour nay djan le.”
24O baro Devel penas: “Dja tele! Oun ab pale kay pre! Oun an o Arones touha! Kek rashay oun kek vavar Israelitari hounte vell doureder har vas lenge penlo, te merenn le gar.” 25Yaake djas o Mose pale tele oun penas i menshenge, hoy o baro Devel penas.
Currently Selected:
2. Mose 19: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
