2. Mose 17
17
O baro Devel dell len pani te piyell
1Oun i tsele Israelitarya djan vin dran o moulo tato them, hoy kharella Sin, oun djan doureder hako kopo har o baro Devel les lenge penas. Oun yon van ap i platsa, hoy kharella Refidim. Kote his kek pani te piyell. 2Oun yon čingran ap o Moseste oun penan: “De men pani te piyell!”
Oun o Mose penas: “Hoske čingrenn t'mer ap mande? Hoske patsenn gar, te hi o baro Devel pash mende oun dell men kova, hoy men hounte vals?”
3Oun lengri troush vas yaake baro, te penan le i rholyatar ap leste: “Hoske lal tou men dran o them Egiptia vin? Kameh, te meras mer kate i troushatar, mer oun mare čave oun mare firhe?”
4Kote das o Mose ap o baro Debleste gole: “Hoy krap me kal menshentsa? An i tikno tsiro vitsrenn le man i barrentsa moules.”
5Oun o baro Devel penas ap leste: “Le morshen kol phourendar touha oun dja lentsa glan i Israelitarya! Le ninna ko kasht an tiro vast, hoy dal ap o pani Nil! 6Oun me čivau man glan toute tardo ap o baro bar pash i berga Horeb. Oun palle dess tou ap o baro bar, oun dran leste nashella pani, yaake te vell len te piyell.”
Oun o Mose kras kova yaake glan i yaka kol phourendar. 7Koy platsa, kay i menshe čingran ap leste oun kay yon gar patsan, te hi o baro Devel pash lende oun dell len kova, hoy len hounte vell, koy platsa das o Mose i laba Massa#17:7a Massa, ap hebretikes: či patsan oun Meriba#17:7b Meriba, ap hebretikes: čingepen .
I Israelitarya hi zorleder har i Amalekarya
8Har i Israelitarya an Refidim his, peran i Amalekarya pral lende. 9Oun o Mose penas ap o Yosua: “Rode menge morsha vin oun dja lentsa an o kourepen oun denn i Amalekarya! Taysar kamau me man ap koy berga tardo te čivell, o Debleskro kasht an miro vast.”
10Oun o Yosua kras, hoy o Mose leske penas, oun anas i Israelitarya an o kourepen. Oun yon kouran pen kol menshentsa Amalek. Oun o Mose djas pre ap i berga. Khetne leha djan o Aron oun o Hour. 11Oun yaake djas, te hidjrell o Mose peskre moussya pre, palle his o Israel zorleder har o Amalek. Te moukell lo i moussya tele, palle his o Amalek zorleder.
12Har o Moseskre moussya leske phares van, lan kol douy vavar i bar, te beshell lo pes. Oun yek čivas pes čačes oun yek serves pash leste tardo, oun yon rikran leskre moussya pre. Yaake kran le bis te o kham tele djas. 13Oun o Yosua das i Amalekarya temerl.
14Palle penas o baro Devel ap o Moseste: “Čin kava pre, te bistrenn le kova gar! Oun rake les o Yosua an o dji, te bistrell lo kava kourepen gar. Oun pen leske ninna, te kamau me te marap i tsele Amalekarya yaake, te venn le hakenestar bistedo ap kay phoub.”
15Oun o Mose kras i rhačepaskri#17:15 rhačepaskri altaro; Dik an o labengro liil ko lab: Debleskri rhačepaskri. o Debleske, te venn kote firhe rhačedo o Debleske, oun das koy rhačepaskri o lab O baro Devel krell man zoreles an o kourepen. 16Oun o Mose penas: “Kova vas, har hadom mire vasta pre ap o baro Debleste. An ko tsiro, hoy vella, dell o baro Devel i Amalekarya pale te pale.”
Currently Selected:
2. Mose 17: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
