2. Mose 12
12
O baro rhapen, hoy kharella Passa#12:1 Dik an o labengro liil ko lab: Passa.
1Oun o baro Devel penas ap o Mose oun ap o Aron an o them Egiptia: 2“Kava čon vell t'menge o ersto čon an o bersh. 3Rakrenn ap i tsele Israelitarya oun penenn: Ap o deshto dives an kava čon lell peske hako dad i terno bakro peskre menshenge an peskro kheer. 4Te hi gar doha menshe an leskro kheer, te rhan le ko tselo bakro, palle rhan le les khetne kol menshentsa, kay langs lende djivenna. Hakenes te vell i kotar mass. 5Lenn yek firho, hoy sasto hi, i morsh, hoy yek bersh phouro hi, nay vell i bakrendar, nay vell i bouzyendar#12:5 bouzni tsiga . 6Oun rikrenn les pash t'mende bis ap o deesh-te-starto dives. Rati ap ko dives, hounte marell haki Israeltikri familya peskro bakro. 7Palle lenn le ko rat oun makenn les ap kol kashta, hoy čačes oun serves pash o voudar hi, oun pral o voudar ninna, an ko kheer, kay rhan le o bakro. 8Ko mass vell peklo pral i yag. Oun yon hounte rhan les an koy rat khetne o maro, kay kek shoutlo yarro dren hi. Oun shoutlo zenlepen rhan le pashel. 9Ma rhan ko mass yales, vitar gar keredo an o pani! Pral i yag vell o tselo bakro peklo, o shero, i herya, ninna i bouke. 10Či kolestar ačell pral bis ap o vavar dives. Te ačas čomone pral, hounte rhačrenn kova. 11Yaake hounte rhan les: troul t'maro per i dori pandlo, i kirrha ap t'mare herya, oun i kasht an t'maro vast. Rhan o rhapen sik! Ko rhapen kharell Passa. T'mer rhan les, te sharenn man, t'maro baro Debles.
12Oun me djau an kaya rat mashkral o tselo them Egiptia, oun dau i tsele morsh čaven temerl, kay hi i phoureder čave pengre dayendar, kolla, kay i menshestar, ninna i firhestar boldo van. Yaake dau me kolende lauterende i phagi, kay kharenn pen devel, oun kolen i Egiptarya an-mangenna. Me hom o baro Devel.
13O rat ap i khera sikrell mande, kay t'mer han. Oun dikau me o rat, djau me doureder, te djal t'menge či. Oun ko merepen, hoy anau ap o them Egiptia, vell gar ap t'mende.
14Bistrenn kava dives gar! Krenn lestar i baro dives, kay sharenn o baro Debles, t'mer oun t'mare čave, kay venna pal t'mende! Hako bersh vell kava yaake pash t'mende kerdo kanna oun hako tsiro.
15Efta divessa rhan t'mer maro, kay kek shoutlo yarro dren hi. Ap o ersto dives čivenn t'mer o shoutlo yarro krik. Kova, kay an kol efta divessa maro rhal, kay shoutlo yarro dren hi, kova vell pale-čiddo, oun hounte djivell bouder gar mank i Israelitarya.
16Ap o ersto dives avenn khetne, te mangenn man an. Ninna ap o eftato dives krenn kova! Ma boudrenn ap kol douy divessa! Kokres o rhapen, hoy hakeno rhala, nay krenn t'mer.
17Rikrenn t'men ap kal laba: An kol efta divessa rhan t'mer maro, kay kek shoutlo yarro dren hi. Ap kava dives lom me t'men lauteren dran o them Egiptia vin. Doleske rikrenn t'men ap kava, oun krenn kova hako bersh, t'mer oun t'mare čave, kay venna pal t'mende hako tsiro. 18An o ersto čon ap o deesh-te-starto dives ap i rat rhan t'mer maro, kay kek shoutlo yarro dren hi, bis ap o biish-te-yekto dives ap i rat. 19Efta divessa hounte vell kek shoutlo yarro an t'mare khera hatslo. Hakeno, kay maro rhala, kay shoutlo yarro dren hi, vell pale-čiddo, oun hounte djivell bouder gar mashkral i Israelitarya. Kova nay vell i vi-themari, ninna i Israelitari. 20Ma rhan shoutlo maro, kay t'mer ninna djivenn! Rhan kokres maro, kay kek shoutlo yarro dren hi!”
21Oun o Mose moukas i tsele phoureden i menshendar Israel pash peste te vell, oun penas ap lende: “Lenn t'menge t'mare familyenge bakre vin ko rhapaske, hoy kharella Passa! Marenn len! 22Palle lenn patria kol kashtestar, hoy kharella Hysop, oun rikrenn len an ko čaro, hoy o rat dren hi! Oun makenn lentsa o rat vin pral o voudar oun ap kol douy kashta, hoy čačes oun serves pash o voudar hi! Oun kek t'mendar djal dran o voudar vin koy tseli rati. 23Oun o baro Devel djala mashkral o them, te dell lo i Egiptarya temerl. Te dikell lo o rat pral ap o voudar oun ap kol douy kashta, hoy čačes oun serves pash o voudar hi, palle djal yob doureder oun moukell koles, kay anell o merepen, gar pash t'mende dren te djal, te dell lo yekes t'mendar temerl. 24Doleske rikrenn t'men ap kal laba, t'mer oun t'mare čave, kay venna pal t'mende, kanna oun hako tsiro.
25Ninna an ko tsiro, kay venn t'mer an ko them, hoy o baro Devel t'menge peskro lab das, te anell yob t'men koy dren, krenn pal kal laba! 26Oun te poučenna t'mare čave t'mendar: Hoske krah mer kova? 27Palle penenn lenge: Kava bakro, hoy maram ap ko dives, hoy kharella Passa, kava bakro maram o baro Debleske. Har das yob an o them Egiptia i Egiptarya temerl, djas yob gar an i khera, kay i Israelitarya djivan. Yob djas doureder. I menshe an mare khera moukas lo te djivell.”
Kote vitsran pen i Israelitarya tele oun mangan o Debles an. 28Palle djan le oun kran yaake, har o baro Devel o Moseske oun o Aroneske penas.
O Farao moukell i Israelitaryen te djal
29Oun mashkral an i rat maras o baro Devel i tsele morsh čaven, kay his i phoureder čave pengre dayendar, an o tselo them Egiptia: o Faraeskro phoureder čaves, kay ap o rayeskri beshepaskri beshdo hi, oun ninna i phoureder čaven kolendar, kay stilde hi. Ava, ninna i morsh firhe, hoy his i phoureder čave pengre dayendar, van temerl dino. 30Koy rati stas o Farao pre, ninna i tsele pralstoune oun i tsele Egiptarya, oun kote djas i ropaskri gole an, hoy o dji činella. O merepen his an hako kheer.
31Oun o Farao moukas an kaya rat o Moses oun o Arones gole te dell oun penas ap lende: “Sik, moukenn kava them, t'mer oun i vavar Israelitarya! Djan t'menge mire menshendar krik! Djan oun mangenn t'maro baro Debles an, yaake har t'mer kaman. 32Lenn t'mare bakre oun bouzya oun t'mare groumya, yaake har t'mer kaman! Oun djan oun mangenn t'maro baro Debles, te vell lo mange lačes.”
33Oun i tsele Egiptarya mangan len, te djan le yaake sik har djala, oun tradan len dran o them. Yon penan penge: “Te djan le gar sik, hounte meras mer lauter.” 34Yaake lan i Israelitarya i čare, kay ko maro dren hi, hoy gomme gar peklo vas, oun kay kek shoutlo yarro dren his, oun čivan kol čare an pengre koola, oun hidjran len ap pengro phik.
35Oun i Israelitarya kran pal i laba, hoy o Mose ap lende penas, oun djan pash i Egiptarya oun moukan pen lendar roupeno oun sonakaskro koova te dell, ninna shoukar ripya. 36Oun o baro Devel das i Egiptaryen an o dji, te venn le kamles ap i Israelitarya, yaake te nay mangens le, hoy yon kaman. Oun i Egiptarya dan len lauter. Yaake lan i Israelitarya kolendar lengro bravlepen krik oun lan les lentsa.
37Oun i Israelitarya djan vin dran o foro Ramses oun djan pash o foro Soukot. Kokres i morsha his 600.000 (shob-sheel-zerya). Ninna lengre romya oun čave his pashel. 38Lentsa djan ninna boud menshe, kay his kek Israelitarya, ninna boud boud bakre, bouzya oun groumya. 39I Israelitarya moukan o them Egiptia yaake sik, te nay čivan le kek rhapen penge khetne, te lan le les lentsa ap o drom. Kokres kol mare, hoy gar peklo his, lan le peha. Kolla mare, kay kek shoutlo yarro dren hi, pekan le kanna.
40Ko tsiro, kay i Israelitarya an o them Egiptia djivan, his 430 (star-sheel-te-triyanda) bersha. 41Oun har kal bersha trouyel his, ap ko dives, djan o baro Debleskre menshe vin dran o them Egiptia.
42Koya rat, kay o baro Devel kokres ap lende garda das, te lell lo len vin dran o them Egiptia, kaya rat hounte vell o baro Debleske an hako bersh. An kaya rat hounte ačenn i Israelitarya pre, te sovenn le gar. Yaake sharenn le o baro Debles.
Koon nay rhal o Passa
43Oun o baro Devel rakras ap o Mose oun ap o Aron: “Hako kopo, kay rhan t'mer o rhapen, hoy kharella Passa, rikrenn t'men ap kal laba:
Kek vi-themari rhal kava rhapen.
44Hako ginlo boudepaskro vell činlo ap peskro mass. Palle nay rhal lo ko Passa.
45I vi-themari, kay djivell yek tsiro pash t'mende, kova hounte rhal gar ko Passa,
vitar kek boudepaskro, kay boudrell i lovenge t'menge.
46Ko tselo mass vell an o kheer rhalo. Kek kotar mass hidjress tou vin glan o voudar! Oun kek kokale phagess tou!
47I tsele Israelitarya hounte rhan ko Passa.
48Te djivell i vi-themari pash t'mende, kay kamell o baro Debleske o Passa te rhal, palle hounte vell hako morsh an leskri familya činlo ap peskro mass. Kova te kras lo, palle vell lo, oun nay rhal lo. Oun yob vell har yek t'mendar.
Kova, kay gar činlo hi ap peskro mass, kova rhal ko Passa gar.
49Ko lab hi t'menge oun kolenge dran vavar themma, kay mashkral t'mende djivenna.”
50Har i tsele Israelitarya shounan, hoy o baro Devel ap o Mose oun ap o Aron penas, kran le les yaake har yon lenge penan. 51Oun ap kava dives anas o baro Devel i tsele Israeleskre familyen vin dran o them Egiptia, yek familya pal i vavar.
Currently Selected:
2. Mose 12: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
