Amos 8
8
O starto dikepen: i korba, kay roukengre dren hi
1O baro Devel, maro ray, moukas man i korba te dikell, kay roukengre dren hi, kolenge o tsiro vas, te venn le tele činlo i roukendar. 2Oun yob poučas mandar: “Hoy dikeh, Amos?”
Me penom: “I korba, kay roukengre dren hi, kolenge o tsiro vas, te venn le tele činlo i roukendar.”
Koy penas o baro Devel:
Yaake vas mire menshenge Israel o tsiro,
te venn le tele činlo.
Yon khaytenn man bouder gar.
3An ko dives givenn i gipangre an o rayeskro kheer ropaskre gilya.
An i tsele gaba oun forya hi moule menshe čiddo.
Kolen vitsran le pokones koy.
Kova penau me, o baro Devel.
O Devel bistrell gar i bravelengri doosh
4Shounenn kova, t'mer parepangre,
kay rikrenn i čorvelen tele,
te ačell len bouder či djipaske!
5T'mer penenn t'menge: Mou djal o Debleskro dives sik trouyel,
ninna ko baro dives, hoy sikrell, kay o nevo čon vas!
Palle nay krah maro djobeskro kheer pale pre, te bikras djob!
O bikepaske lah mer i tikneder piri,
te kras lat pherdo djob,
oun boudeder love har čačo hi,
oun čivah save barra ap i vaga, te rhorhas mer i ginepangre.
6Ninna ko phouss, hoy o djobestar pral ačas,
bikrah, har te vals lo djob.
I čorvele, kay nay playsrenn gar pengri siyaan,
kolen ginah menge, te boudrenn le menge,
ninna te hi lengri siyaan gar bareder har douy kirrha.
7O baro Devel, koles i Israelitarya sharenn,
yob das pes sovel oun penas:
An kek tsiro bistrau kava čilačo koova, hoy le kran.
8Doleske krau, te trissell i phoub,
oun hakeno an o them trashell.
O tselo them hadell pes oun djal pale tele har o lengsto pani Nil an o them Egiptia.
9O baro Devel, maro ray, penell:
An ko dives djal o kham tele mashkral o dives.
Oun mashkral o dives vell i rati pral o them.
10T'mare bare divessa, kay hans barhtelo,
venn kanna divessa, kay denn gole i bibarhtyatar.
Oun t'mare gilya venna ropangre gilya.
T'mer rivenn t'men an gone,
oun činenn t'mare tsele balla ap o shero tele.
Oun han yaake har i dad oun i day,
kay pral pengro čaveste rovenn, kay meras,
oun len hi kek vavar čave.
Oun lauter, hoy djal an ko dives,
krell i menshenge bari daar.
11I tsiro vella, penell o baro Devel, maro ray,
koy bičrau i bok an o them.
Kaya hi kek bok pal maro
oun kek troush pal pani.
Na-a, kaya hi i bok pal o lab o baro Deblestar, te shounenn le les.
12I menshe djan trouyel pash o Moulo Baro Pani,
oun kotar doureder pash o Mashkralstouno Baro Pani#8:12 Mashkralstouno Baro Pani mer Méditerranée ,
oun kotar doureder ap koy rig, kay norden hi,
oun palle kote, kay o kham pre djal.
Oun yon rodenn yekes, kay nay penell lenge o baro Debleskro lab,
oun hatsenn kekes.
13An ko dives perenn ninna saste terne morsha oun djouvya khetne i troushatar.
14Oun kolla, kay denn pen sovel pash o rhorheno devel an Samaria,
oun penenn: pash ko devel, koles o kheer Dan an-mangell,
oun pash o devel o forestar Beersheba,
kal menshe perenn oun stenn bouder gar pre.
Currently Selected:
Amos 8: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
