1. Korintarya 5
5
I čilačo koova mank i patslende
1Me shounom, te hi pash t'mende i morsh, kay peskri dadeskri romyah sovella. Savo čilačo koova shounom me gomme gar pash kolende, kay gar patslo hi.
2T'mer han pre-phourdo. T'mer hounte rovans pral ko koova, oun hounte čivans koles pale, kay kras ko koova. 3Ninna te hom me gar pash t'mende, hi miro dji pash t'mende. Oun yaake, har te voms pash t'mende, rakrom me i phagi pral koleste vin, kay savo koova kras: 4Te han t'mer lauter khetne an o lab maro rayestar, o Yezousestar, oun me hom miro djiyeha pash t'mende, palle krenn kova yaake: An i zoor maro rayestar, o Yezousestar, denn ko morshes an o bengeskre vasta, 5te merell leskro phouro djipen an leste, yaake te djal ko mensho gar nashedo ap ko dives, kay vell maro ray Yezous pale.
6T'mer sharenn t'men. Oun kova hi gar mishto. Djinenn t'mer gar, te krell i tikno kotar shoutlo yarro ko tselo vavar yarro shoutlo? 7Čivenn ko shoutlo yarro#5:7 O čilačepen hi har o shoutlo yarro. t'mendar krik, te venn t'mer har i nevo maro, kay kek shoutlo yarro dren hi! Oun čačepah t'mer han har i nevo maro! O Yezous Kristo vas menge maredo, te lell lo mari doosh mendar krik, yaake har i bibolde maran i bakro ap pengro baro dives, kay Passa kharella. 8Oun yaake har čivan yon ko shoutlo yarro krik oun rhan sau maro, kay kek shoutlo yarro dren his, yaake hounte djivas mer maro nevo djipen an o djoudjepen oun an o čačepen. Mer hounte moukas maro phouro djipen, oun djivas bouder gar an o čilačepen.
9Glan i tsiro činom me t'menge i liil. Oun an ko liil penom t'menge, te venn t'mer gar mala kol menshendar, kay krenn vi-ladjedo koova. 10An ko liil rakrom me i patslendar oun gar lauterendar ap kay phoub, kay krenna vi-ladjedo koova, kay hi boklo pal i love, kay hi čorepangre, oun kay mangenn vavar koova an har o Debles. Kolendar rakrau me kate gar. Te rakroms kolendar, hounte moukans t'mer kay phoub. 11An ko liil činom t'menge, te venn t'mer kek mala kolendar, kay penenn pendar: “Me hom patslo” oun krenn vi-ladjedo koova, hi boklo pal i love, mangenn vavar koova an har o Debles, praasenn i vavaren, hi pipangre oun čorepangre. Te hi yek mashkral t'mende, kay krell savo koova, koleha rhan gar khetne! 12-13Kova hi gar maro koova, te rakras o čačepen pral kolende vin, kay gar patslo hi. Kova krell o Devel. T'mer hounte rakrenn o čačepen pral kolende vin, kay patsle hi. Vitsrenn koles dran t'mende vin, kay krell ko čilačo koova!
Currently Selected:
1. Korintarya 5: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
