1. Korintarya 2
2
O Menshengro gosvepen oun o Debleskro gosvepen
1Mire phrala, har vom pash t'mende, te sikrap t'mende o Debleskro drom, hoy t'mer gar prindjran, krom me kova gar bare oun goseve labentsa. 2Yaake rah, har homs pash t'mende, kamom me pral kek vavar koova te rakrell, har o Yezous Kristestar oun pral leskro merepen ap o troushel. 3Oun har me pash t'mende homs, his kek zoor an mande, oun man his traash.
4Me rakrom t'mentsa gar zorele oun goseve labentsa, te anap t'men ap o Debleskro drom. Na-a, o Debleskro Dourho rakras zoreles ap t'mende, 5yaake te vas t'maro patsepen dran o Debleskri zoor oun gar dran i menshengro gosvepen. 6Kova, hoy mer penah i patslenge, hi o Debleskro gosvepen. Kava gosvepen hi gar har ko gosvepen, kay vell kol menshendar, kay prindjrenn o Debles gar, vitar gar har o gosvepen kolendar, kay hi raya ap kay phoub. Kolla hounte merenn. 7Mer rakrah pral o Debleskro gosvepen, hoy i menshe gomme gar prindjrenna.
O Debleskro raylepen
O bolepen oun i phoub his gomme gar koy, har his o Debles an o dji, te djivas mer leha khetne an leskro raylepen. 8Kova prindjran i raya ap kay phoub gar. Te nay dikans le an o Debleskro dji, dans le o Yezouses, ko rayes pral i tsele rayende, gar ap o troushel.
9An o Debleskro lab hi činlo: Ko lačo koova, hoy kek yak dikas, oun hoy kek kand shounas, oun hoy an kek mensheskro dji dren vas, kova lauter dell o Devel kolen, kay les o djiyestar kamenna.#2:9 dik: Yesaya 64:3
10Men das o Devel peskro Dourho. Oun o Dourho sikrell men kova, hoy hi o Debles an o dji. O Debleskro Dourho dikell an halauter, ninna an o Debleskro dji. 11Hoy an o mensheste hi, djinell kokres leskro dji. Hoy an o Debleste hi, kova djinell kokres o Debleskro Dourho. 12An maro shero hi bouder gar ko koova, hoy hi kol menshen an pengro shero, kay prindjrenn o Debles gar. Mer lam o Debleskro Dourho. Doleske djinah, hoy o Devel menge kras. 13Kava koova penah i menshenge. Kova krah mer gar labentsa, hoy venna dran o menshengro gosvepen. Na-a, mer rakrah kova, hoy o Debleskro Dourho menge penella. Yob krell, te hayvas mer o Debleskro koova, oun sikrah kova kolende, kolen ninna o Debleskro Dourho hi. 14I mensho, koles o Debleskro Dourho gar hi, hayvell gar, hoy o Debleskro Dourho penella. O Debleskro koova hi leske dinlepen. Ko mensho nay dikell gar, har o Devel kova dikella. 15I mensho, koles o Debleskro Dourho hi, kova dikell ap lauter yaake, har o Devel kova dikella. Kol menshen, kay o Debleskro Dourho gar hi, kolla nay hayvenn kol menshen gar, kolen o Debleskro Dourho hi. 16Kova hi yaake, har an o Debleskro lab činlo hi: Kek djinella, hoy an o Debleskro dji hi. Kek nay vell leskro sikepaskro.#2:16 dik: Yesaya 40:13
Mer, kay patsle ham, men hi o Yezouseskro Dourho.
Currently Selected:
1. Korintarya 2: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
