YUDA 1
1
1Phoo, Mangsoo jheddab da" ziyo' Mangsoo khe: yu to" lho: Aseing Yesu lhoug zung" nyid mo, Mangsoo khe: yu shau" mo, dangain" bang: jhang khyoo:-
Aseing Yesu da" dei zoo: yo' Yaku da" nya: no, Ngoo Yuda mo wigi-moug soug" lhid" foin: kaid'.
2Nanu" gi nheig khyeig go" khyoo: myenjham" yug yo khyoo: yo' jhed goo" kang: go" khyoo: ri joeb, joeb, byeung" byeung" shau" kham: yu nyid goo" baja" o".
Mhau' Da" Sara yi
3Jheddab, da" bidnoem yi we"- nanu" dangain" mo, bain' loem" jeung" kham: yu ci: bye: da" khyoid yu khyoo: ri ngoo gi nanu" jhang khyoo: lhid" kaid' wa shid' re" yoem: kaid' nyid uri Mangsoo gi dalheing: dam nya: da" byumyu" yi ri bain' nyeing byid: too" bye: da" loem" jeung" khyoo: geung: teung jo, baja" ga- loem: zain: oung: myid boem wa shid re" nanu" jhang khyoo: mougsoug" myab, myab, lhid" lho: wigi yoem: byid: ca" khyoo: shau" nyid. 4Khasu" wim ga: ri tarha" aci: da" byu dayham" bang: gi aboin: aso" shoid' khyo" lo vang loung" jo, boem bye- nyangnu" gi yha" phoo Mangso da" jeju" mungdang: ri nyangnu" da" akhyeung" khyoo: ri nghoeb, pyam' byid: wa shid re" ci: yhoung: zoore"-dayug kyeung" ngoonu" da" khyoid yu Aseing Yesu Khristu rigi ngeug pyam' bye. Houg: bang: kham' zoo: wa da" yoobo dam gi jhoem: mungdang: moo goo" nham, mo tid lheom: too" bye.
5Mangsoo gi Israela byumyu" yi ri khyoid yu lho: Egutu meing: mo wigi shu" thu' lo thang: ri nyang: ri aloem khoug: aloem" jeung" da" bang: ri byo, yoin" joem: thang loo" nhang: ziri nanu" nyang: se' deing gu nghoid loug we'-nanu" ri hau: khyoo: ngoo deom tid poin" nau. 6Nyang: nyang: yo" jo, da" amyeing" akhang" ri ci: lid' lo" lho: wigi nyang: nya: da" joyoo ri she: pyam' kho' da" moug: lagyoo: yi da" khyoo: ri we' myid' boin: yu" ge'. Mangsoo gi nya: tarha" dang: phyed' wa da" bidnyid zeing moo houg: bang: ri yoobo dam kaid' wa shid re" moug: coid' thung: khoug: moo apyaid' ato: da" joto' jangcoo" yo' datei" to. 7Sodom voo yo' Gomora voo eig loem: ri we' hau: eig vo da" ayam, aqei: moo jo, da" voogung joem ri we' myid; boin: yu" ge'. Hau: voo mo voobyu mung" byu yi koem gi akhang: tid da" moug: lagyoo: yi yhang: ti"- youg: shoo: go" lho: yug gi nyang: cang" we' aved, avhu; da" moo" ri koid nyid boem. nyangnu" gi apyaid' atoo: dadab nyid da" mi myi: khyoem, moo-yoobo dam ri shau" kham' zo: boem khyoo:- byu dangain" mo, ri bang bang nyang: zid" lhid' nhang: kaid.
8Houg: yhang: ti"- hau: byu hid: bang: we' myo, myang aja: ja: myang ziyo' nyang: nya: da" gung du: moo yooboo koid wa Mangsoo ri ci: asoin:- aphoug" agyug lo: tho' mo phung" yoeb, boo bang: ri we' rue" pyam' boem bye. 9Mouglagyoo: moo" Mikhaela nyang: lang" hid: yhang: ti" akoid yu"- Moshe mang ri hang" yu eung: ga: yu zoug: moo" ri rue" da" dang: yo' yooboo foin: da" khyoo: avoem" koid' loo za: nang ri Mangso wigi gyikoid baja" ga: date: tid. 10Nghoid loug we' byu hid: bang: gi nyangnu" asi ashug" gyo: yu" da" khyoo: dangain" ri rue" ziyo' yooboo foin: pyam' boem. Kyang: da" gougnyhoug joem yhang: ti"- nyangnu" nya: da" nheigloem: khoug: moo akhang: re boo gu ri te: se' gyo: da" khyoo: joem gi nyangnu" lhu: phyo' lhu: shoin' loo" nhang: da" myid' nyain, za: nghoid. 11Nyang: nu" shid' re" khayhi' gyoug pho" zi nghoid lha". nyangnu" gi Ka-in so" da: khyoo: moo cang lo" boem bye. ngei yoomo Balam shoid vhang: da" yooboo ri bo bain' shoid pyam abye: go- Ko" ra, yhang: ti" thoung" shau" yoomo byo, yoin" loo" nhang: bye. 12Nyang: nu" gi sho' asi ngei yid' thu: boem lho: zoo: pyoo: shug pyo: zoorre"- nanu' da" zoem" khau, myen" xoin: zo: pui" moo aco' ajhoid' bui" nhang: bye. Nyang: nu" gi nyang: nya: da" akyu" ri te: sho: nyid mo, nghoid boem ago". Nyang: nu" gi moug: gyid' abo da" lid wigi hau' tang" lo" da" jhoem" moug" yo' date: du nyid boem. Nyang: nu" gi; xung" kain" thoin" moo ashi" azei: yoomo agyi: mo wigi poid' said' to" da" seig kyug gam yo' du nyid ago". 13Nyang: nu" gi gye" thain: da" panglai being: mhoid' yhang: ti" du nyid wigi nyangnu" koid da" asho, ashid: moozoo" we' panglai gyid nyoeb, yang: ti" thu' nyid. Nyang: nu" gi akhyoo" acang da" kyimeing: lam" kyi: joem yo' we' du nyid nyangnu" shid' re" Mangsoo gi apyaid' ato: joyoo daloem: ri no, athang da" moug: coid' khoug: moo nyheung too" bye.
14Adam: mo xo' gyo" lo da" nyid' xeig ein: jang" mo E-nug gi hid: bang: khyoo: yo' sen: lho: goo" nham, mo lapi: pe: too" bye- hau: zigi Aseing: ginghab, loo atho' da" gyeungshang: mau: lagyo; yi yo' doem gyoo" loo wa nghoid. 15Byu yug khang" moo" ri we' Mangsoo ci: phyoug pyam da: dang: tid mo, ri we' yoobo dam kaid' wa shid re" ju" ri" wa zi nghoid.
16He: da" byu phung: yi gi khanham we' kyiyang myeung zoore"- byen, cang" ri yooboo za: te: se' foin: nyid bang: nghoid- nyang: nya: da" anyhoin: athoung" akhyeing: ashoeb da" nheigloem: khyo" cang lho: te: se' koid mo, nghoid. Nyang: nya: da" khyoo: ri phau: khuang se' nyid nyang: nya: da" akyu" yo" yu wa jang" moo yen, gi byen, cang" rimhau, coung" byid: se' nyid boem.
Lhed' Zed" Khyoo: Yo' Jhau" Shed' Khyoo:
17Nhgoid sho' loug we' jheddab da" bidnoem yi we"- ngoonu" da" Aseing Yesu Khristu lagyoo: yi - shid' phyang" khasu" ga: tid too" khare" khyoo: ri myid' boin: nyid ge'. 18Khasu" wim ga: ri lo" thang da" bidnyid moo nanu" ri juang" yi lho: wigi nyang: nya: vhoo: boo: myo, no, da" nheigloem: axoug" ri cang mo gyeungshang: da" Venyi ri ayo" yu mo 19Houg: bang: gi phung ri byo, yoin" loo" nhang: mo nyang: nya: da" nheigloem: axoug" ri cang mo gyeungshang: da" Venyi ri ayo" yu mo nghoid nyid boem. 20Nghoid loug we' bidnoem yi we"- nanu" gi nanu" nya: da" gye" yung" lho' gyeungshang: da" loem" jeung" khyoo; moo ayang: zug jo, lho: nanu" da" kangso' dei khyoo; ri gyi: sheung: loo nhang: ge'. Gyeungshang: da" venyi yoem: vhoo: ri nghe: khau: lho: akyu"- mho' nyid ge'. 21Mangso da" jheddab khoug: moo daloung" jo, ge'- Hougsu" Aseing Yesu Khristu gi-nya: nheig khyeig shoo" myen: da" khoug: moo nanu" ri byid: wa da" apyaid' ato: kangso' ri dalang" nyid ge'. 22Loem gyam khau: gyam; nyid mo, ri nheig khyeug nheigloem: toin" shid' nyid ge'. 23Dayham" ri myi: khyoem, mo xue: yu ge'. dayham" bang: rigi gyoug nheigloem: yo' nheig khyeug nheigloem: toin" shid' nyid ge'. Nghoid loug we' nyang: bang: vhoo: boo myo, no, da" moo" yo' aco' ajhoid da" byimi ri co, ngheung" nyid ge'.
Coung" Nghei Dang: Yo' Main' Kadid' Dang:
24Nanu" ri ajhoid leung nhang: sho' zung" lhug byid: su: yo' ce: yooboo we' aboo nhang: loo: za: gau, yi ngei pyo: ziyo' myonhoo: phung: yoeb, doug bang da" Aseung: shid' khoin" khyoo: - yo" shu" vang yi su. 25Aseing Yesu Khristu moo ngoonu" ri yo" khyoid yu da" dayug kyeung" da" Mangsoo gi moug; thu' xang: poin: mo wigi he: yam: he: pyaid yo' thang: phyang" apyaid' atoo: moo ju" sho' myonhoo: phung" yoeb, yoem: moo" so' zeing- amyeing" akhang" gi nyang: moo za: dabo jo, baja" o"- A men.
Currently Selected:
YUDA 1: LCL
Highlight
Share
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.