मरकुस 14
14
इसुहेङ सेअ्लि खाङका
(मत्ति २६:१-५; लुका २२:१-२; युहन्ना ११:४५-५३)
1साउरि माह्वाअ्का तोले चाका लाअ्पिका पारबाखान्तेङ लाम्फा इसु यरुसलेमता लोहि। मुल धामिगेलाइ रो धरम मास्टरगेलाइ इसुहेङ सिकापा रिम्तेङ सेअ्लि दाउ भोदोङघाखे।#दामालाअ्का १२:१-२७ 2हाइदोनु एम्बालाइ दोअ्का हिघाहि, “पारबाको पहरता माको, माकुनुते द्याङगेलाइता हुलदाङगा जेनावा।”
इसुको पुरिङता बेबाल आतर हुपिका
(मत्ति २६:६-१३; युहन्ना १२:१-८)
3इसु बेथानियाता रोग्याखोअ्का सिमोनको साअ्ता हानिहि। वा चाकाताङ पालाउ एअ्मि बेबाल रेम्का उन्ठुइको सिसिता हेन्जा जाङका आतर चुमतेङ लोहि। इङको हाइदोङ मामिसालाइन्हाका हेन्जाङ जाङका आतर जटामसि दोअ्का सिङसो बान्हाइका हिघाहि। वा इङको सिसि दोङ भोइतेङ इसुको पुरिङता हुपिहि।#लुका ७:३७-३८ 4कालाउबुङ आधिमि चेरताम्पातेङ ताताइमिता दोअ्लि तेङहि, “इदोइ जाङका मालामालाका आतर हाइपालि एसापा नास पाखे? 5भुरुङ इदोइ आतर सुमसाइ रुपाको टाकाखान्तेङ हेन्जाता पिअ्तेङ इङको टाका गरिबगेलाइहेङ पिलि दोधाङ।” कालाउ एम्बालाइ इङको बेबालहेङ हाकाराइहि।
6कालाउबुङ इसु दोअ्हि, “जेङहोइ, हाइपालि नेलाइ यासेहेङ सानताइसुकेना? या काङको भाअ्सिङ एलोङ रेम्काङ काम पाका हि। 7हाइदोनु गरिबगेलाइ ते नेलाइदोफा जेलाउ ह्यावा कालाउ नेलाइ ओबालाइको जेलाउ बुङ भलो पालि दोअ्स्वाना। कालाउबुङ काते दिनाङ नेलाइदोसा माह्याङका।#न्याम १५:११ 8इदोइ बेबाल जेदोङ पालि दोधाङ, इङकोङ पाका हि। या काङको जिउहेङ लिअ्लिको भाअ्सिङ लाम्फासोङ मालामालाका आतर लागाइपितेङ त्यार पाका हि।#१४:८ पाप मापासिङ सिकालाइहेङ यहुदिगेलाइ गोताङ सिकाजिउगेलाइता जाङका आतर लागाइ पिघाखे। 9जातिङको, का नेलाइहेङ दोअ्खा, गोताङ दुनियाता जेता जेता इदोइ रेम्काबानाल पारचार पावा, इदोइ बेबाल हाइ पाका हि याको फोमपालिको भाअ्सिङ इदोइ कामको बाखिनावा।”
यहुदा इसुहेङ रिम्पालि राजि जेङका
(मत्ति २६:१४-१६; लुका २२:३-६)
10इसुको तेन्हे चात्यागेलाइता एअ्मि यहुदा इस्करियोतचाहिँ इसुहेङ रिमपातेङ एम्बालाइको खुरता पिलिको भाअ्सिङ मुल धामिगेलाइकोता हानिहि। 11एम्बालाइ इदोइ हिङतेङ लेङचाहि रो इङकोहेङ टाका पिलि राजि जेङहि। कालाउ यहुदा इसुहेङ हेसापा रिम्पालि दोअ्तेङ दाउ भोलि तेङहि।
इसु चात्यागेलाइदोफा आखिरि भतेर चाका
(मत्ति २६:१७-३०; लुका २२:७-२३; युहन्ना १३:२१-३०; १ कोरिन्थि ११:२३-२५)
12साउरि मामिसालाइका तोले चाका पारबाको लाङ दिनाता, जेलाउ एम्बालाइ लाअ्पिका पारबाको पान्ठा भोक पिघाखे। कालाउ इसुको चात्यागेलाइ वासेहेङ हिअ्हि, “नाङको इछा हाइ हि? केलाइ हिता हानितेङ नाङको भाअ्सिङ लाअ्पिका पारबाको भतेर त्यार पालि?”
13कालाउ इसु ताइको चात्यागेलाइता न्हेमिहेङ एसा दोअ्तेङ दिङगिल्हि, “पुरता हानिसु, इन्ता नेलाइ घाइलाता चि फातेङ एअ्मि द्याङ हानितेङपाका दुसुस्वाना। वासेहेङ पिताइतेङ हानिसु। 14इङको द्याङ जेता दुलावा इङको साअ्को मालिकहेङ दोअ्सु, ‘मास्टर दोअ्खे, काङको चात्यागेलाइदोफा लाअ्पिका पारबाको भतेर चाका काङको बानसालाइ कोठा हिता हि?’ 15वा नेलाइहेङ साजाइतेङ ताअ्का र्हुताको तालाता एलोङ फाराका बारका कोठा तिम्पावा। इन्ता नेलाइ केलाइको भाअ्सिङ भतेर त्यार पासु।” 16कालाउ इङको चात्यागेलाइ हानिहि रो पुरता दुल्हि। कालाउ इसु एम्बालाइहेङ दोअ्का भाइपाङ निङहि। इङकोन्हुअ्सो एम्बालाइ लाअ्पिका पारबाको भतेर त्यार पाहि।
17बेल्हालाउ इसु ताइको चात्यागेलाइदोफा थुकालिलोहि। 18ओबालाइ चाकाताङ पालाउ इसु दोअ्हि, “जातिङको का नेलाइहेङ दोअ्ताङका, नेलाइता कादोफा चाका एअ्मि कासेहेङ रिम्पावा।”#ले ४१:९ 19इदोइ हिङतेङ एम्बालाइ मन तु:पातेङ पालापातेङ इसुहेङ हिअ्लि तेङहि, “हाइ इङको का हिघा?”
20वा एम्बालाइहेङ दोअ्हि, “तेन्हेता एअ्मि, जाइ कादोफा थालिता तोले चादोङखे। 21हाइपानु का द्याङको चानहेङ वाको बारेता लेखिकाभाइपाङ ज्यावा, कालाउबुङ धिकार इङको द्याङहेङ जाइसो का द्याङको चानहेङ रिम्पावा। इङकोते भुरुङ जोलोम माजेङलाउ बुङ रेम्का जेङधाङ।”
22चाकाताङपाका पहरता इसु तोले र्हुहि, च्याबास पितेङ तोले पेङहि रो चात्यागेलाइहेङ पितेङ दोअ्हि, “र्हुसु, इदोइ काङको जिउ।” 23कालाउ इसु बाति र्हुतेङ च्याबास पिकान्हुअ्सो चात्यागेलाइहेङ पिहि रो एम्बालाइ झाराङ इङकोसो आम्हि। 24आरोङ इसु एम्बालाइहेङ दोअ्हि, “इदोइ नावा केराको काङको हिति, जाइ हेन्जाङको भाअ्सिङ झोपावा।#दामालाअ्का २४:८; यरमिया ३१:३१-३४ 25जातिङको, का नेलाइहेङ दोअ्खा, का आङगुरको निघारसो इङको दिनाथिकापा माआमाङका, जेलाउथिकापा स्वरगको सारभिता इङको नावा माआमाङका।” 26कालाउ एम्बालाइ एलोङ ले लेतेङ जाइतुन आरदाङभारि हानिहि।#१४:२६ सिकासाजाइ निङका यहुदिगेलाइ दिलिमाको उम चातेङ लेगेलाइ लेघाखे।
पत्रुस इसुहेङ इन्कार पाका
(मत्ति २६:३१-३५; लुका २२:३१-३४; युहन्ना १३:३६-३८)
27इसु चात्यागेलाइहेङ दोअ्हि, “नेलाइ झाराङ कासेहेङ लाअ्तेङ खाअ्स्वाना, हाइपानु इस्का लेखिका हि:
‘का घोकालाइहेङ दान्हायाङका,
भेरागेलाइ इसोओसो जेङतेङ खाअ्तावा।’ #
जकरिया १३:७
28 “कालाउ का सिन्हुतेङ ल्होकान्हुसो का नेलाइखान्तेङ लाम्फा गालिलता हानाङका।” #
मत्ति २८:१६
29पत्रुस इसुहेङ दोअ्हि, “झाराङ लाअ्तेङ खाअ्लाउ बुङ का नासेहेङ हेअ्लाउ बुङ मालाअ्ताङका।”
30इसु पत्रुसहेङ दोअ्हि, “जातिङको, का नासेहेङ दोअ्ताङका, नानिकोङ दिलिमा न्हेखे धाङगाइ ओका लाम्फा ना कासेहेङ सुम्खे मानाल्खा दोअ्ताना।” 31कालाउबुङ पत्रुस बल पितेङ दोअ्हि, “नादोफा सिलिगोइलाउ बुङ का नासेहेङ मानाल्खा मादोअ्ताङका।” कालाउ बो झाराङ चात्यागेलाइ बुङ एन्साङ दोअ्हि।
गेतसमनि बागाइचाता इसुको पारथाना
(मत्ति २६:३६-४६; लुका २२:३९-४६)
32इङकोन्हुअ्सो ओबालाइ गेतसमनि दोअ्का थामेता हानिहि रो इसु ताइको चात्यागेलाइहेङ दोअ्हि, “का पारथाना पापाधाउ नेलाइ इताङ हिसु।” 33कालाउबुङ वा पत्रुस, याकुब रो युहन्नाहेङ दोफाङ चुमपुहि। कालाउ वाको मन तु:तेङ हेन्जाङ छिटपिटाइलि तेङहि। 34इसु एम्बालाइहेङ दोअ्हि, “काङको कोन्धाङ सिकाथिकापाङ पिरसो दुखि जेङका हि। नेलाइ इताङ हिसु रो नाङघातेङ हिसु।” 35कालाउ इसु आसा ओसो हानितेङ भोनोता तिर्हो थोहि रो एसा दोअ्तेङ पारथाना पालि तेङहि, “जेङलि दोनु इङको तु:को पहर कासो हानाको।” 36आरोङ वा दोअ्हि, “काङको आबा, ना गोताङ काथा पालि दोखेना। इदोइ तु:को बाति कासो लाअ्पापि। कालाउ का इछा पाकाभाइपा माको, ना इछा पाकाभाइपा ज्याको।”
37इसु लोलाउ एम्बालाइ निन्धातेङ हिका तिङहि रो वा पत्रुसहेङ दोअ्हि, “सिमोन हाइ ना निन्धातेङ हिन्हा? हाइ एअ् घान्टा बुङ मानिन्धासिङ हिलि मादोन्हा? 38मानिन्धासिङ हिसु, कालाउ पारथाना पासु रो नेलाइ जाचता मापरेसु। हाङसा ते जातिङको त्यार हि, कालाउबुङ जिउ खिनिङ बल मान्थुका हि।”
39आरोङ हानितेङ इसु दोर्हाइतेङ इन्ताङ पारथाना पाहि। 40आरोङ लोतेङ वा एम्बालाइहेङ निन्धातेङ हिका तिङहि, हाइदोनु एम्बालाइको मिँ निन्धासो हेलिङ मादोहि रो वासेहेङ हाइ दोअ्लि इङको मागिहि।
41इसु सुम्खे लोतेङ एम्बालाइहेङ दोअ्हि, “हाइ नेलाइ आरोङ बुङ जिम्तेङ निन्धाङसुखेना? एला जेङहोइ, पहर थुकालिलोहोइ। खाङसु, का द्याङको चान पापिगेलाइको खुरता रिम निङचालि तोम्काहि। 42ल्होसु, हानाइने। खाङसु, कासेहेङ रिमपाका भेरपाङ हि।”
इसु रिमनिङचाका
(मत्ति २६:४७-५६; लुका २२:४७-५३; युहन्ना १८:३-१२)
43इसु धुइकाताङ पालाउ तेन्हे चात्यागेलाइता एअ्मि यहुदा ओदोङघरि इन्ता देखाल पिहि। वाकोदोफा लाठि रो काति चुमका द्याङगेलाइ बुङ हिघाखे। एम्बालाइहेङ मुल धामिगेलाइ, धरम मास्टरगेलाइ रो आगुवागेलाइ दिङगिल्का हिघाखे। 44इसुहेङ रिम्पाका यहुदा इङको द्याङगेलाइहेङ एसा दोअ्का हिघाहि, “जाइहेङ का चुमायाङका, वादोङ इसु, इङकोहेङ रिम्सु रो घेराइतेङ चुमपुसु।” 45कालाउ यहुदा सारासरपा इसुकोता हानितेङ, “मास्टर सेउपाखा” दोअ्तेङ वासेहेङ चुमाइहि। 46कालाउ एम्बालाइ इसुहेङ रिम्हि। 47इन्ता भेरपा जाअ्तेङ हिकालाइता एअ्मि काति होअ्तेङ मुल धामिको कामत्याको न्हातोङ पुक्कापापिहि।
48इसु एम्बालाइहेङ दोअ्हि, “हाइ नेलाइ एलोङ डाकुहेङ भाइपाङ काति रो लाठिसुदाङ चुमतेङ कासेहेङ रिम्लि लोका हिसुन्हा? 49दिनाङ थानता धिरपातेङ का नेलाइदोफा हिघाखा, नेलाइ कासेहेङ मारिम्सुन्हा? कालाउबुङ धरमकिताबता लेखिका काथा पोङघाको।”#लुका १९:४७; २१:३७ 50इदोङघरि झाराङ चात्यागेलाइ इसुहेङ लाअ्तेङ खाअ्हि।
51एलोङखिनिङ धाबा गुअ्का एअ्मि धाना इसुहेङ पिताइहि कालाउ एम्बालाइ वासेहेङ बुङ रिम्हि। 52कालाउ वा ताइको धाबाङ लाअ्तेङ धाअ्हि।
इसु बाराकचहरिको आगाता
(मत्ति २६:५७-६८; लुका २२:५४-५५,६३-७१; युहन्ना १८:१३-१४,१९-२४)
53कालाउ एम्बालाइ इसुहेङ बारका धामिकोता चुमपुहि रो इन्ता झाराङ मुल धामिगेलाइ, धरम मास्टरगेलाइ रो आगुवागेलाइ जोम्तेङ हिघाहि। 54पत्रुसचाहिँ दुरेसोङ बारका धामिको सालेङता इसुहेङ पिताइहि रो इन्ता पलटनदोफा योम्तेङ वा मे एम्लि तेङहि।
55एला मुल धामिगेलाइ रो बारासभाको झाराङ सदस्यगेलाइ इसुहेङ सेअ्लिको भाअ्सिङ वाको दासि भोहि, कालाउबुङ हाइदोङ मानिङहि। 56हेन्जाङ द्याङगेलाइ इसुको खिलापता आसत्ते दासि पिहि। कालाउबुङ एम्बालाइको पिका दासि मामिलिहि। 57आधिमि ल्होतेङ इसुको खिलापता एसा दोअ्तेङ दासि पिहि, 58“या एसा दोअ्का केलाइ हिङन्हाहि, ‘द्याङको खुरहोइ बान्हाइका इदोइ थान र्हाअ्ताङका रो खुरमाकोसिङ बानाह्याङका भेनेङ थान का सुम्निता बान्हायाङका।’”#युहन्ना २:१९ 59कालाउबुङ इदोइता बुङ एम्बालाइको दासि एअ् खालको मान्थुघाहि।
60कालाउ बारका धामि माझाता जाअ्तेङ इसुहेङ हिअ्हि, “हाइ नादोफा हाइदोङ जाबाफ मान्थु? इदोइ द्याङगेलाइ नाङको खिलापता दासि पिका हाइ कुनु?” 61कालाउबुङ इसु सिकापा हि रो हाइदोङ जाबाफ मापिहि। आरोङ बारका धामि वासेहेङ हिअ्हि, “हाइ ना जातिङकोङ परमेस्वरको चान ख्रिस्ट हिना?” 62इसु वासेहेङ जाबाफ पिहि, “का हिघा, कालाउ एअ्नि नेलाइ का द्याङको चानहेङ सरबङ हिका परमेस्वरको दाम्पाहा सिंहासनता हिका रो स्वरगसो आकासको बादेलता लोकाताङपाका तिङस्वाना।”#दानिएल ७:१३ 63इदोइ हिङतेङ बारका धामि ताइको धाबा थेअ्तेङ दोअ्हि, “एला केलाइहेङ बो दासिगेलाइको हाइ दरकार जेङहि कुनु? 64नेलाइ परमेस्वरहेङ बादानामि पाका ते हिङसुहोइना। ते दोसु, नेलाइको हाइ बिचार हि?” एम्बालाइ दोअ्हि, “या आपाराधिहेङ सेअ्लिदोङ गोयाङ।”#लेबि २४:१६ 65कालाउ आधिमि इसुहेङ थोअ्लि तेङहि रो वाको नुइ थुम्तेङ चाउर्हितेङ दोअ्हि, “आगमबानि धुइ।” इङकोन्हुअ्सो पालेगेलाइ वासेहेङ ताइको जिम्माता र्हुहि रो दान्हाइकाताङ चुमपुहि।
पत्रुस इसुहेङ मानाल्खा दोअ्का
(मत्ति २६:६९-७५; लुका २२:५६-६२; युहन्ना १८:१५-१८,२५-२७)
66पत्रुस लेता सालेङता हिलाउ बारका धामिको कामत्या कामत्याइनिगेलाइता एअ्मि इन्ता लोहि। 67पत्रुसहेङ मे एम्तेङहिका तिङतेङ वासेहेङ रेसितेङ खाङहि रो दोअ्हि, “ना बुङ नासरतको इसुदोफाङ हिघान्हा।”
68कालाउबुङ वा माको दोअ्तेङ एसा दोअ्हि, “ना हाइ दोअ्खेना काते हाइदोङ माबुझिघा।” कालाउ पत्रुस बाहारको मुल फिनु भारि हानिहि रो इङको दोङ घरि धाङगाइ ओहि।
69पत्रुसहेङ फिनु भेरपा जाअ्तेङ हिका तिङतेङ कामत्याइनि इन्ता हिका द्याङगेलाइहेङ दोअ्लि तेङहि, “या बुङ एम्बालाइता एअ्मि हिघाहि।”
70पत्रुस आरोङ माको दोअ्हि। इघुरिङन्हुअ्सो इन्ता जाअ्का द्याङगेलाइ आरोङ पत्रुसहेङ दोअ्हि, “पाक्काङ, ना एम्बालाइता एअ्मि हिन्हा, हाइपानु ना बुङ गालिलि हिन्हा रो वाकोङ चात्या हिन्हा।”
71आरोङ बुङ पत्रुस केरा चातेङ दोअ्लि तेङहि, “जाइको बारेता नेलाइ दोअ्सुखेना इङको द्याङहेङ का मानाल्खा।”
72एन्सा दोअ्तेङसाङ न्हेखे धाङगाइ ओहि रो पत्रुसहेङ इसुको दोअ्का काथा फोम लोहि, “धाङगाइ न्हेखे ओकाखान्तेङ लाम्फा ना कासेहेङ सुमखे मानाल्खा दोअ्ताना।” कालाइ वा इङको काथा फोमपातेङ घोनोघोपा खारहि।
Currently Selected:
मरकुस 14: DHIM
Highlight
Copy
Compare
Share
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
मरकुस 14
14
इसुहेङ सेअ्लि खाङका
(मत्ति २६:१-५; लुका २२:१-२; युहन्ना ११:४५-५३)
1साउरि माह्वाअ्का तोले चाका लाअ्पिका पारबाखान्तेङ लाम्फा इसु यरुसलेमता लोहि। मुल धामिगेलाइ रो धरम मास्टरगेलाइ इसुहेङ सिकापा रिम्तेङ सेअ्लि दाउ भोदोङघाखे।#दामालाअ्का १२:१-२७ 2हाइदोनु एम्बालाइ दोअ्का हिघाहि, “पारबाको पहरता माको, माकुनुते द्याङगेलाइता हुलदाङगा जेनावा।”
इसुको पुरिङता बेबाल आतर हुपिका
(मत्ति २६:६-१३; युहन्ना १२:१-८)
3इसु बेथानियाता रोग्याखोअ्का सिमोनको साअ्ता हानिहि। वा चाकाताङ पालाउ एअ्मि बेबाल रेम्का उन्ठुइको सिसिता हेन्जा जाङका आतर चुमतेङ लोहि। इङको हाइदोङ मामिसालाइन्हाका हेन्जाङ जाङका आतर जटामसि दोअ्का सिङसो बान्हाइका हिघाहि। वा इङको सिसि दोङ भोइतेङ इसुको पुरिङता हुपिहि।#लुका ७:३७-३८ 4कालाउबुङ आधिमि चेरताम्पातेङ ताताइमिता दोअ्लि तेङहि, “इदोइ जाङका मालामालाका आतर हाइपालि एसापा नास पाखे? 5भुरुङ इदोइ आतर सुमसाइ रुपाको टाकाखान्तेङ हेन्जाता पिअ्तेङ इङको टाका गरिबगेलाइहेङ पिलि दोधाङ।” कालाउ एम्बालाइ इङको बेबालहेङ हाकाराइहि।
6कालाउबुङ इसु दोअ्हि, “जेङहोइ, हाइपालि नेलाइ यासेहेङ सानताइसुकेना? या काङको भाअ्सिङ एलोङ रेम्काङ काम पाका हि। 7हाइदोनु गरिबगेलाइ ते नेलाइदोफा जेलाउ ह्यावा कालाउ नेलाइ ओबालाइको जेलाउ बुङ भलो पालि दोअ्स्वाना। कालाउबुङ काते दिनाङ नेलाइदोसा माह्याङका।#न्याम १५:११ 8इदोइ बेबाल जेदोङ पालि दोधाङ, इङकोङ पाका हि। या काङको जिउहेङ लिअ्लिको भाअ्सिङ लाम्फासोङ मालामालाका आतर लागाइपितेङ त्यार पाका हि।#१४:८ पाप मापासिङ सिकालाइहेङ यहुदिगेलाइ गोताङ सिकाजिउगेलाइता जाङका आतर लागाइ पिघाखे। 9जातिङको, का नेलाइहेङ दोअ्खा, गोताङ दुनियाता जेता जेता इदोइ रेम्काबानाल पारचार पावा, इदोइ बेबाल हाइ पाका हि याको फोमपालिको भाअ्सिङ इदोइ कामको बाखिनावा।”
यहुदा इसुहेङ रिम्पालि राजि जेङका
(मत्ति २६:१४-१६; लुका २२:३-६)
10इसुको तेन्हे चात्यागेलाइता एअ्मि यहुदा इस्करियोतचाहिँ इसुहेङ रिमपातेङ एम्बालाइको खुरता पिलिको भाअ्सिङ मुल धामिगेलाइकोता हानिहि। 11एम्बालाइ इदोइ हिङतेङ लेङचाहि रो इङकोहेङ टाका पिलि राजि जेङहि। कालाउ यहुदा इसुहेङ हेसापा रिम्पालि दोअ्तेङ दाउ भोलि तेङहि।
इसु चात्यागेलाइदोफा आखिरि भतेर चाका
(मत्ति २६:१७-३०; लुका २२:७-२३; युहन्ना १३:२१-३०; १ कोरिन्थि ११:२३-२५)
12साउरि मामिसालाइका तोले चाका पारबाको लाङ दिनाता, जेलाउ एम्बालाइ लाअ्पिका पारबाको पान्ठा भोक पिघाखे। कालाउ इसुको चात्यागेलाइ वासेहेङ हिअ्हि, “नाङको इछा हाइ हि? केलाइ हिता हानितेङ नाङको भाअ्सिङ लाअ्पिका पारबाको भतेर त्यार पालि?”
13कालाउ इसु ताइको चात्यागेलाइता न्हेमिहेङ एसा दोअ्तेङ दिङगिल्हि, “पुरता हानिसु, इन्ता नेलाइ घाइलाता चि फातेङ एअ्मि द्याङ हानितेङपाका दुसुस्वाना। वासेहेङ पिताइतेङ हानिसु। 14इङको द्याङ जेता दुलावा इङको साअ्को मालिकहेङ दोअ्सु, ‘मास्टर दोअ्खे, काङको चात्यागेलाइदोफा लाअ्पिका पारबाको भतेर चाका काङको बानसालाइ कोठा हिता हि?’ 15वा नेलाइहेङ साजाइतेङ ताअ्का र्हुताको तालाता एलोङ फाराका बारका कोठा तिम्पावा। इन्ता नेलाइ केलाइको भाअ्सिङ भतेर त्यार पासु।” 16कालाउ इङको चात्यागेलाइ हानिहि रो पुरता दुल्हि। कालाउ इसु एम्बालाइहेङ दोअ्का भाइपाङ निङहि। इङकोन्हुअ्सो एम्बालाइ लाअ्पिका पारबाको भतेर त्यार पाहि।
17बेल्हालाउ इसु ताइको चात्यागेलाइदोफा थुकालिलोहि। 18ओबालाइ चाकाताङ पालाउ इसु दोअ्हि, “जातिङको का नेलाइहेङ दोअ्ताङका, नेलाइता कादोफा चाका एअ्मि कासेहेङ रिम्पावा।”#ले ४१:९ 19इदोइ हिङतेङ एम्बालाइ मन तु:पातेङ पालापातेङ इसुहेङ हिअ्लि तेङहि, “हाइ इङको का हिघा?”
20वा एम्बालाइहेङ दोअ्हि, “तेन्हेता एअ्मि, जाइ कादोफा थालिता तोले चादोङखे। 21हाइपानु का द्याङको चानहेङ वाको बारेता लेखिकाभाइपाङ ज्यावा, कालाउबुङ धिकार इङको द्याङहेङ जाइसो का द्याङको चानहेङ रिम्पावा। इङकोते भुरुङ जोलोम माजेङलाउ बुङ रेम्का जेङधाङ।”
22चाकाताङपाका पहरता इसु तोले र्हुहि, च्याबास पितेङ तोले पेङहि रो चात्यागेलाइहेङ पितेङ दोअ्हि, “र्हुसु, इदोइ काङको जिउ।” 23कालाउ इसु बाति र्हुतेङ च्याबास पिकान्हुअ्सो चात्यागेलाइहेङ पिहि रो एम्बालाइ झाराङ इङकोसो आम्हि। 24आरोङ इसु एम्बालाइहेङ दोअ्हि, “इदोइ नावा केराको काङको हिति, जाइ हेन्जाङको भाअ्सिङ झोपावा।#दामालाअ्का २४:८; यरमिया ३१:३१-३४ 25जातिङको, का नेलाइहेङ दोअ्खा, का आङगुरको निघारसो इङको दिनाथिकापा माआमाङका, जेलाउथिकापा स्वरगको सारभिता इङको नावा माआमाङका।” 26कालाउ एम्बालाइ एलोङ ले लेतेङ जाइतुन आरदाङभारि हानिहि।#१४:२६ सिकासाजाइ निङका यहुदिगेलाइ दिलिमाको उम चातेङ लेगेलाइ लेघाखे।
पत्रुस इसुहेङ इन्कार पाका
(मत्ति २६:३१-३५; लुका २२:३१-३४; युहन्ना १३:३६-३८)
27इसु चात्यागेलाइहेङ दोअ्हि, “नेलाइ झाराङ कासेहेङ लाअ्तेङ खाअ्स्वाना, हाइपानु इस्का लेखिका हि:
‘का घोकालाइहेङ दान्हायाङका,
भेरागेलाइ इसोओसो जेङतेङ खाअ्तावा।’ #
जकरिया १३:७
28 “कालाउ का सिन्हुतेङ ल्होकान्हुसो का नेलाइखान्तेङ लाम्फा गालिलता हानाङका।” #
मत्ति २८:१६
29पत्रुस इसुहेङ दोअ्हि, “झाराङ लाअ्तेङ खाअ्लाउ बुङ का नासेहेङ हेअ्लाउ बुङ मालाअ्ताङका।”
30इसु पत्रुसहेङ दोअ्हि, “जातिङको, का नासेहेङ दोअ्ताङका, नानिकोङ दिलिमा न्हेखे धाङगाइ ओका लाम्फा ना कासेहेङ सुम्खे मानाल्खा दोअ्ताना।” 31कालाउबुङ पत्रुस बल पितेङ दोअ्हि, “नादोफा सिलिगोइलाउ बुङ का नासेहेङ मानाल्खा मादोअ्ताङका।” कालाउ बो झाराङ चात्यागेलाइ बुङ एन्साङ दोअ्हि।
गेतसमनि बागाइचाता इसुको पारथाना
(मत्ति २६:३६-४६; लुका २२:३९-४६)
32इङकोन्हुअ्सो ओबालाइ गेतसमनि दोअ्का थामेता हानिहि रो इसु ताइको चात्यागेलाइहेङ दोअ्हि, “का पारथाना पापाधाउ नेलाइ इताङ हिसु।” 33कालाउबुङ वा पत्रुस, याकुब रो युहन्नाहेङ दोफाङ चुमपुहि। कालाउ वाको मन तु:तेङ हेन्जाङ छिटपिटाइलि तेङहि। 34इसु एम्बालाइहेङ दोअ्हि, “काङको कोन्धाङ सिकाथिकापाङ पिरसो दुखि जेङका हि। नेलाइ इताङ हिसु रो नाङघातेङ हिसु।” 35कालाउ इसु आसा ओसो हानितेङ भोनोता तिर्हो थोहि रो एसा दोअ्तेङ पारथाना पालि तेङहि, “जेङलि दोनु इङको तु:को पहर कासो हानाको।” 36आरोङ वा दोअ्हि, “काङको आबा, ना गोताङ काथा पालि दोखेना। इदोइ तु:को बाति कासो लाअ्पापि। कालाउ का इछा पाकाभाइपा माको, ना इछा पाकाभाइपा ज्याको।”
37इसु लोलाउ एम्बालाइ निन्धातेङ हिका तिङहि रो वा पत्रुसहेङ दोअ्हि, “सिमोन हाइ ना निन्धातेङ हिन्हा? हाइ एअ् घान्टा बुङ मानिन्धासिङ हिलि मादोन्हा? 38मानिन्धासिङ हिसु, कालाउ पारथाना पासु रो नेलाइ जाचता मापरेसु। हाङसा ते जातिङको त्यार हि, कालाउबुङ जिउ खिनिङ बल मान्थुका हि।”
39आरोङ हानितेङ इसु दोर्हाइतेङ इन्ताङ पारथाना पाहि। 40आरोङ लोतेङ वा एम्बालाइहेङ निन्धातेङ हिका तिङहि, हाइदोनु एम्बालाइको मिँ निन्धासो हेलिङ मादोहि रो वासेहेङ हाइ दोअ्लि इङको मागिहि।
41इसु सुम्खे लोतेङ एम्बालाइहेङ दोअ्हि, “हाइ नेलाइ आरोङ बुङ जिम्तेङ निन्धाङसुखेना? एला जेङहोइ, पहर थुकालिलोहोइ। खाङसु, का द्याङको चान पापिगेलाइको खुरता रिम निङचालि तोम्काहि। 42ल्होसु, हानाइने। खाङसु, कासेहेङ रिमपाका भेरपाङ हि।”
इसु रिमनिङचाका
(मत्ति २६:४७-५६; लुका २२:४७-५३; युहन्ना १८:३-१२)
43इसु धुइकाताङ पालाउ तेन्हे चात्यागेलाइता एअ्मि यहुदा ओदोङघरि इन्ता देखाल पिहि। वाकोदोफा लाठि रो काति चुमका द्याङगेलाइ बुङ हिघाखे। एम्बालाइहेङ मुल धामिगेलाइ, धरम मास्टरगेलाइ रो आगुवागेलाइ दिङगिल्का हिघाखे। 44इसुहेङ रिम्पाका यहुदा इङको द्याङगेलाइहेङ एसा दोअ्का हिघाहि, “जाइहेङ का चुमायाङका, वादोङ इसु, इङकोहेङ रिम्सु रो घेराइतेङ चुमपुसु।” 45कालाउ यहुदा सारासरपा इसुकोता हानितेङ, “मास्टर सेउपाखा” दोअ्तेङ वासेहेङ चुमाइहि। 46कालाउ एम्बालाइ इसुहेङ रिम्हि। 47इन्ता भेरपा जाअ्तेङ हिकालाइता एअ्मि काति होअ्तेङ मुल धामिको कामत्याको न्हातोङ पुक्कापापिहि।
48इसु एम्बालाइहेङ दोअ्हि, “हाइ नेलाइ एलोङ डाकुहेङ भाइपाङ काति रो लाठिसुदाङ चुमतेङ कासेहेङ रिम्लि लोका हिसुन्हा? 49दिनाङ थानता धिरपातेङ का नेलाइदोफा हिघाखा, नेलाइ कासेहेङ मारिम्सुन्हा? कालाउबुङ धरमकिताबता लेखिका काथा पोङघाको।”#लुका १९:४७; २१:३७ 50इदोङघरि झाराङ चात्यागेलाइ इसुहेङ लाअ्तेङ खाअ्हि।
51एलोङखिनिङ धाबा गुअ्का एअ्मि धाना इसुहेङ पिताइहि कालाउ एम्बालाइ वासेहेङ बुङ रिम्हि। 52कालाउ वा ताइको धाबाङ लाअ्तेङ धाअ्हि।
इसु बाराकचहरिको आगाता
(मत्ति २६:५७-६८; लुका २२:५४-५५,६३-७१; युहन्ना १८:१३-१४,१९-२४)
53कालाउ एम्बालाइ इसुहेङ बारका धामिकोता चुमपुहि रो इन्ता झाराङ मुल धामिगेलाइ, धरम मास्टरगेलाइ रो आगुवागेलाइ जोम्तेङ हिघाहि। 54पत्रुसचाहिँ दुरेसोङ बारका धामिको सालेङता इसुहेङ पिताइहि रो इन्ता पलटनदोफा योम्तेङ वा मे एम्लि तेङहि।
55एला मुल धामिगेलाइ रो बारासभाको झाराङ सदस्यगेलाइ इसुहेङ सेअ्लिको भाअ्सिङ वाको दासि भोहि, कालाउबुङ हाइदोङ मानिङहि। 56हेन्जाङ द्याङगेलाइ इसुको खिलापता आसत्ते दासि पिहि। कालाउबुङ एम्बालाइको पिका दासि मामिलिहि। 57आधिमि ल्होतेङ इसुको खिलापता एसा दोअ्तेङ दासि पिहि, 58“या एसा दोअ्का केलाइ हिङन्हाहि, ‘द्याङको खुरहोइ बान्हाइका इदोइ थान र्हाअ्ताङका रो खुरमाकोसिङ बानाह्याङका भेनेङ थान का सुम्निता बान्हायाङका।’”#युहन्ना २:१९ 59कालाउबुङ इदोइता बुङ एम्बालाइको दासि एअ् खालको मान्थुघाहि।
60कालाउ बारका धामि माझाता जाअ्तेङ इसुहेङ हिअ्हि, “हाइ नादोफा हाइदोङ जाबाफ मान्थु? इदोइ द्याङगेलाइ नाङको खिलापता दासि पिका हाइ कुनु?” 61कालाउबुङ इसु सिकापा हि रो हाइदोङ जाबाफ मापिहि। आरोङ बारका धामि वासेहेङ हिअ्हि, “हाइ ना जातिङकोङ परमेस्वरको चान ख्रिस्ट हिना?” 62इसु वासेहेङ जाबाफ पिहि, “का हिघा, कालाउ एअ्नि नेलाइ का द्याङको चानहेङ सरबङ हिका परमेस्वरको दाम्पाहा सिंहासनता हिका रो स्वरगसो आकासको बादेलता लोकाताङपाका तिङस्वाना।”#दानिएल ७:१३ 63इदोइ हिङतेङ बारका धामि ताइको धाबा थेअ्तेङ दोअ्हि, “एला केलाइहेङ बो दासिगेलाइको हाइ दरकार जेङहि कुनु? 64नेलाइ परमेस्वरहेङ बादानामि पाका ते हिङसुहोइना। ते दोसु, नेलाइको हाइ बिचार हि?” एम्बालाइ दोअ्हि, “या आपाराधिहेङ सेअ्लिदोङ गोयाङ।”#लेबि २४:१६ 65कालाउ आधिमि इसुहेङ थोअ्लि तेङहि रो वाको नुइ थुम्तेङ चाउर्हितेङ दोअ्हि, “आगमबानि धुइ।” इङकोन्हुअ्सो पालेगेलाइ वासेहेङ ताइको जिम्माता र्हुहि रो दान्हाइकाताङ चुमपुहि।
पत्रुस इसुहेङ मानाल्खा दोअ्का
(मत्ति २६:६९-७५; लुका २२:५६-६२; युहन्ना १८:१५-१८,२५-२७)
66पत्रुस लेता सालेङता हिलाउ बारका धामिको कामत्या कामत्याइनिगेलाइता एअ्मि इन्ता लोहि। 67पत्रुसहेङ मे एम्तेङहिका तिङतेङ वासेहेङ रेसितेङ खाङहि रो दोअ्हि, “ना बुङ नासरतको इसुदोफाङ हिघान्हा।”
68कालाउबुङ वा माको दोअ्तेङ एसा दोअ्हि, “ना हाइ दोअ्खेना काते हाइदोङ माबुझिघा।” कालाउ पत्रुस बाहारको मुल फिनु भारि हानिहि रो इङको दोङ घरि धाङगाइ ओहि।
69पत्रुसहेङ फिनु भेरपा जाअ्तेङ हिका तिङतेङ कामत्याइनि इन्ता हिका द्याङगेलाइहेङ दोअ्लि तेङहि, “या बुङ एम्बालाइता एअ्मि हिघाहि।”
70पत्रुस आरोङ माको दोअ्हि। इघुरिङन्हुअ्सो इन्ता जाअ्का द्याङगेलाइ आरोङ पत्रुसहेङ दोअ्हि, “पाक्काङ, ना एम्बालाइता एअ्मि हिन्हा, हाइपानु ना बुङ गालिलि हिन्हा रो वाकोङ चात्या हिन्हा।”
71आरोङ बुङ पत्रुस केरा चातेङ दोअ्लि तेङहि, “जाइको बारेता नेलाइ दोअ्सुखेना इङको द्याङहेङ का मानाल्खा।”
72एन्सा दोअ्तेङसाङ न्हेखे धाङगाइ ओहि रो पत्रुसहेङ इसुको दोअ्का काथा फोम लोहि, “धाङगाइ न्हेखे ओकाखान्तेङ लाम्फा ना कासेहेङ सुमखे मानाल्खा दोअ्ताना।” कालाइ वा इङको काथा फोमपातेङ घोनोघोपा खारहि।
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.