Fahendrena 1
1
Fampirisihana hanao ny marina
1Tiava ny fahamarinana,
ianareo mpanapaka ny tany.
Aoka ho amin’ny saina mahitsy
no hiheveranareo ny Tompo,
ary ho amin’ny fo tsotra kosa
no hitadiavanareo Azy.
2Fa izay tsy mizaha toetra Azy
no mety hahita Azy;
ary izay matoky Azy no isehoany.
3Satria ny hevi-petsy
mampisaraka amin’Andriamanitra;
ary ny fahefàny voazaha toetra
mampahamenatra ny adala.
4Tsy idiran’ny Fahendrena#1.4 Jereo Ohab 1.20 sy nta.
ny fanahy mpanao ratsy;
ary tsy mba itoerany koa
ny vatana andevozin’ota.
5Izy no Fanahy Masina mpanabe ny olona,
ka mandositra ny fihatsarambelatsihy
sy manalavitra ny hevitra adala;
ary Izy no voailikilika,
rehefa miseho ny tsy fahamarinana.
6Ny Fahendrena dia fanahy tia olona
ka tsy mamela ho afa-maina
izay miteny ratsy an’Andriamanitra;
satria io Andriamanitra io
dia vavolombelona mahita ny atifanahiny
sy mahafantatra ny fony araka ny marina
ary mandre izay lazain’ny lelany.
7Fa manerana ny tany ny Fanahin’ny Tompo,
ka mihazona mafy izao rehetra izao
ary mahafantatra ny teny voatonona.
8Noho izany, tsy misy afa-miery
na iza na iza ratsy fiteny;
ary tsy ho azony idifiana
ny famaizana sahaza azy.
9Fa hanaovam-pamotorana
ny fikasan’ny tsy mpivavaka
ka hatrany amin’ny Tompo
no ho tafapaka ny akon’ny teniny
ho porofon’ny ratsy nataony.
10Mailo ny sofin’Andriamanitra
ka mihaino ny zava-drehetra;
ary tsy misy tsy reny
na dia ny monomonona malefaka aza.
11Koa fadio ny monomonona tsy amin’antony,
tano ny lela mba tsy hanaratsy olona;
fa ny teny an-tsokosoko
dia tsy maintsy misy fiantraika,
ary ny mpilaza endrikendrika
dia mahafaty ny tenany ihany.
12Aza mitady fahafatesana
amin’ny fiainana maniasia;
ary aza mihantsy fahaverezana
amin’ny asan-tananareo.
13Satria Andriamanitra
tsy namorona ny fahafatesana;
ary tsy sitrany ny hahavery ny mananaina#1.13 Ampit Ezek 18.23; 33.11..
14Noharîny mba hisy manko ny zava-drehetra;
ka mahasoa eto amin’izao tontolo izao
ny fifandimbiasan-taranaka.
Tsy misy poizina mandoza ao aminy;
ary tsy mba ny fahafatesana
no manjaka eto ambonin’ny tany,
15satria tsy mety maty ny fahamarinana.
Ny fisainan’ny tsy mpivavaka eo anatrehan’ny olo-marina
16Ny fahafatesana kosa no nantsoin’ny tsy mpivavaka
amin’ny fihetsiny sy ny fiteniny;
misakaiza aminy koa ireo ka fatra-pitia azy
ary manao fanekempihavanana aminy#1.16 fanekempihavanana aminy: ampit Is 28.15.,
ka mendrika ho mpiandany aminy.
Currently Selected:
Fahendrena 1: DIEMDC
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.