Mga Binuhatan 13

Ginpapanaw sanday Barnabas ag Saulo agod Magwali sa Ibang Lugar

1Idto sa grupo it tumueuo nga perming nagatililipon sa syudad it Antioc hay may mga propeta ag mga manogturo it mensahi it Dyos. Sanda rato hay si Barnabas, si Simeon nga ginahayuan it Negro, si Lucius nga tagaCyrene, si Manaen nga nagbahoe sa poder ku pamilya it Gobernador it Galilea nga si Herodes#13:1 Si Herodes ngara hay si Herodes Antipas nga unga ni Herodes nga hari tag si Jesus hay eapsag pa eang. ag si Saulo. 2Tag nagapuasa sanda ag nagasimba sa Ginuo, naghambae kanda ro Espirito Santo, “Paeainan ninyo para kakon si Barnabas ag si Saulo ay may oeobrahon ako nga ginabutangan kanda.” 3Ngani nagpuasa pa gid sanda. Pagkatapos, gintungtungan nanda ku andang alima sanday Barnabas ag Saulo, ginpangamuyuan ag ginpapanaw dayon.

Nagwali Sanday Barnabas ag Saulo sa Isla it Cyprus

4Pagkahalin nanday Barnabas ag Saulo hay gin-giyahan sanda ku Espirito Santo nga mag-adto sa Seleucia ag halin idto hay nagsakay sanda sa barko paadto sa isla it Cyprus. 5Idto sanda nagdungka sa pantalan it Salamis. Nagwali sanda idto ku mensahi it Dyos sa mga Judio sa andang mga sinagoga. Kaibahan nanda si Juan Marcos agod magbulig kanda sa andang oeobrahon. 6Halin idto, nag-agi sanda sa mga kabanwahan it isla hasta nakaabot sanda sa Pafos nga idto sa punta it isla. May hakilaea sanda idto nga sangka babaylan nga si Bar-Jesus ro ngaean. Judio ra imaw ag nagapakuno-kuno nga propeta. 7Una imaw permi sa euyo ni Sergius Paulus nga gobernador ku isla. Maaeam nga tawo ro gobernador ngara. Ginpatawag nana sanday Barnabas ag Saulo ay gusto nana nga makabati ku mensahi it Dyos. 8Pero tag nagasugid sanda ku mensahi sa gobernador, ro babaylan ngato, nga ginatawag man nga Elimas sa Griniyego hay nagsinabat man it kuntra sa ginahambae nanda. Ginabaeabagan kunta nana nga indi magtuo ro gobernador kay Jesus. 9Dahil kato, si Saulo, nga ginatawag man nga Pablo hay nagtueok it tadlong sa babaylan. Ginhambaean dayon ra nana sa gahom it Espirito Santo nga nagaistar kana, 10“Makay Satanas#13:10 Sa Griniyego raya hay “Dyablo.” ka gid! Puro eang pagpangluko ag kaeainan ro imong ginahimo! Ginakuntra mo bisan ano nga matarong! Hay, indi ka gid magpundo sa pagbinaliskad ku kamatuuran nga halin sa Ginuong Dyos? 11Pinahan ka makaron it Ginuo. Mabulag ka it mabuhay-buhay ag bisan tumangda ka pa sa adlaw hay indi mo gid ron hikita.” Insigida hay nagsaeom ro panueok ni Elimas hasta nga nagdueom eon gid ag nagpangapkap imaw it gaguyod kana. 12Pagkakita ku gobernador sa natabo hay hangawa gid imaw it duro sa gahom it Ginuo nga ginaturo nanda, ngani nagtuo imaw kana.

Nagwali sanday Pablo sa Antioc nga Maeapit Sa Probinsya it Pisidia

13-14Halin sa Pafos hay nagsakay si Pablo ag ro anang mga kaibahan sa barko. Pagkadungka nanda sa probinsya it Pamfilia hay nagbaktas sanda paadto sa syudad it Antioc nga maeapit sa probinsya it Pisidia. Idto sanda nag-agi sa syudad it Perga nga sakop pa it Pamfilia. Pag-abot sa Perga hay gin-aywanan sanda ni Juan Marcos ag bumalik imaw sa Jerusalem. Halin sa Perga hay nagdiritso sanday Pablo sa Antioc.#13:13-14 Rayang Antioc hay idto sa nasyon nga Turkey eon makaron kon tawgon. Ro isaea pa nga Antioc kon siin sanda nag-umpisa it panakayon sa 13:1 hay idto sa nasyon it Syria. Pagkaadlaw it Inogpahuway, nagsueod sanda sa sinagoga ag nagpungko idto. 15Pagkatapos ku pagbasa it pilang parti ku Kasuguan it Dyos nga ginsueat ni Moises ag ku ginsueat it mga propeta hay may ginsugo ro mga manogdumaea it sinagoga nga hambaeon sanday Pablo nga, “Mga igmanghod, kon may inyo nga gustong ihambae nga makapabaskog it buot ku mga tawo hay puydi ninyo nga ihambae.” 16Ngani nagtindog si Pablo ag nagsinyas sa mga tawo. Naghambae dayon imaw, “Mga kadugo ko nga mga inapo ni Israel, ag sa tanan nga mga bukon it Judio nga nagasimba sa Dyos, pamati kamo kakon. 17Ro Dyos nga ginasimba naton nga mga inapo ni Israel hay nagpili ku atong mga kalolo-lolohan nga mangin anang mga katawhan, ag ginpaabo sanda tag idto pa sanda sa Egipto. Pagkataliwan it maeawig nga tyempo hay ginpaguwa nana sanda idto paagi sa anang indi matupungan nga gahom. 18Sa sueod it haeos 40 anyos, ana sandang gintiisan sa andang pagsupak kana tag idto sanda sa *disyerto. 19Pagsueod nanda sa Canaan hay ginperdi it Dyos ro 7 ka rasa nga idto nagaistar ag ro andang kaeugtaan hay anang gintao sa atong mga kalolo-lolohan bilang panublion. 20Umpisa ku andang pag-adto sa Egipto hasta nakaabot sanda sa Canaan hay mga 450 anyos ro nakataliwan. Pagkatapos, gintaw-an sanda it Dyos it mga tawo nga nagbueos-bueos sa pagdumaea kanda, samtang nagtaliwan ro mga dinag-on hasta sa tyempo ni Propeta Samuel. 21Tag si Samuel pa ro nagadumaea kanda hay nagpangayo sanda it hari ag gintao kanda it Dyos si Saul nga unga ni Kish, ag isaea sa mga inapo ni Benjamin. Naghari si Saul sa sueod it 40 anyos. 22Pagkatapos hay ginbuoe it Dyos si Saul sa anang pagkahari ag ginbayluhan nana ra kay David. Gindayaw it Dyos si David. Hambae nana, ‘Hapan-uhan ko rayang si David nga unga ni Jesse, ag hakita ko nga ro anang kabubut-on hay pareho gid kakon. Tumanon nana ro tanan nga isugo ko kana.’#13:22 1 Sam 13:14; Salmo 89:20. 23Sa mga inapo ni David ngara naghalin ro Maneueuwas nga ginpromisa it Dyos nga anang ginpadaea katon nga mga inapo ni Israel, ag raya hay si Jesus. 24Bago si Jesus nag-umpisa sa anang hilimuon, nagwali si Juan nga Manogbawtismo sa anang mga kadugo nga mga inapo ni Israel nga dapat gid nga maghinuesoe ag magtalikod sanda tanan sa andang mga saea ag magpabawtismo. 25Tag madali eon lang matapos ro hilimuon ni Juan, hambae nana sa mga tawo, ‘Eaom siguro ninyo hay ako eon ro inyong ginapaabot.#13:25 Ro ginatumod kara hay ro Maneueuwas nga ginpromisa it Dyos nga magahari. Bukon it ako kundi ro maabot nga masunod kakon, ag bukon ngani ako it takos bisan maghubad eon lang ku anang sandalyas.’

26“Mga igmanghod, mga inapo ni Abraham, ag mga bukon it Judio nga nagasimba man sa Dyos, kita mismo ro ginpadaehan ku rayang mensahi kon paalin kita maeuwas it Dyos. 27Pero ro mga nagaistar sa Jerusalem ag ro andang mga manogdumaea hay indi magkilaea kay Jesus bilang Maneueuwas nga ginpadaea it Dyos. Indi man sanda magpati nga si Jesus ro ginapatungdan ku mga propeta sa andang mga ginsueat bisan rato hay ginabasa sa mga sinagoga kada *Adlaw it Inogpahuway. Ag sa andang pagpasintinsya kana it kamatayon hay anda nga gintuman ro ginsueat ku mga propeta. 28Bisan owa sanda it hakita nga ebidensya agod sintinsyahan si Jesus it kamatayon hay anda gihapon nga ginhambae si Pilato nga ipabitay imaw. 29Tag hatuman eon nanda ro tanan nga ginsueat sa Sagrado nga Kasueatan parti kana hay gintae-tae imaw sa krus ag gineubong. 30Pero ginbanhaw imaw it Dyos 31ag sa sueod it abo nga mga inadlaw hay nagpakita imaw sa mga nagmunot kato anay kana halin sa Galilea paadto sa Jerusalem. Sanda eon makaron ro mga nagapamatuod parti kana sa mga tawo. 32Ag kami man hay nag-adto iya agod isugid kinyo ro Mayad nga Balita parti sa kaeuwasan nga ginpromisa it Dyos sa atong mga kalolo-lolohan. 33Ro ana ngarang promisa hay gintuman it Dyos sa andang mga inapo, nga kita ngani ron, tag ginbanhaw nana si Jesus pareho sa nasueat sa ikaywa nga Salmo kon siin naghambae ro Dyos,

‘Ikaw hay akon nga unga. Makaron hay ginapakita ko gid nga ako ro imong Ama.’#13:33 Salmo 2:7.

34“Ginbanhaw matuod si Jesus ag indi eon imaw mamatay it uman. Maeubtan ra sa ginhambae it Dyos nga,

‘Sigurado gid nga tumanon ko kinyo ro akong ginpromisa#13:34 Ro promisa ngato hay sa paeaabuton hay may isaea sa inapo ni David nga magahari hasta sa owa it katapusan (2 Sam 7:16; Salmo 89:3-4, Salmo 132:11-12). Agod nga matuman ra hay dapat nga ro hari ngato hay magkabuhi hasta sa owa it katapusan. kay David.’#13:34 Isa 55:3.

35“Si Jesus ro katumanan ku ratong promisa ay may ginsueat si David sa sambilog pa gid nga Salmo nga makaraya,

‘Indi mo pagpabay-an nga maeunot sa eueubngan ro eawas nakon nga imong ginpaeain para eang gid-a nga magserbi kimo.’#13:35 Salmo 16:10.

36“Bukon it si David ro ginapatungdan kara dahil namatay imaw pagkatuman nana sa katungdanan nga gintugyan kana it Dyos. Namatay imaw pareho ku anang mga kalolo-lolohan, ag naeunot ro anang eawas sa eueubngan. 37Pero si Jesus nga ginbanhaw it Dyos hay owa't-a naeunot. 38Ngani, mga igmanghod, among ginahambae kinyo nga mapatawad ro inyong mga saea paagi sa ginhimo ni Jesus ngara. Ro kapatawaran ngara hay bukon it paagi sa pagtuman ku Kasuguan it Dyos nga ginsueat ni Moises. 39Sa pagsalig ag pagtuo eang kay Jesus mabilang nga matarong sa mata it Dyos ro bisan sin-o. 40Ngani mag-andam gid kamo nga indi matabo kinyo ro ginhambae it mga propeta nga makaraya:

41‘Pamati kamo nga mga manogtuya-tuya. May himuon ako sa inyong tyempo nga kangawahan ninyo, ag mangin dahilan ku inyong kamatayon.

Kon may magsugid kinyo kon mauno kangidlis ro akong himuon hay indi ron ninyo pagpatihan.’ ”#13:41 Hab 1:5. #13:41 Ro hauna nga katumanan kara hay tag ginsalakay ku mga tagaKaldea ro mga Judio ag andang gin-guba ro Templo sa Jerusalem ag ginpamatay ro kaabo nga mga Judio. Natabo man ra it uman ku A.D. 70. Ginsugtan it Dyos nga salakayon it mga soldado it Roma ro syudad it Jerusalem. Andang ginwasak ro bilog nga syudad ag ginpamatay ro linibo nga mga Judio idto. Duyon siguro ro ginapatungdan ni Pablo sa anang ginhambae ngara.

42Pagkatapos ni Pablo it turo, nagguwa sanda ni Barnabas sa sinagoga. Tag nagapaguwa sanda hay ginpangabay sanda it mga tawo nga magbalik sa masunod nga Adlaw it Inogpahuway, ag sugiran pa gid sanda parti sa mga bagay ngara. 43Pagkatapos it pagtililipon sa sinagoga, abo nga mga Judio ag mga bukon it Judio nga nagsaylo eon sa relihiyon it mga Judio ro nagmunot kanday Pablo ag Barnabas. Nagpakig-istorya kanda sanday Pablo ag ginpalig-on ro andang buot nga padayon nga magsalig sa andang habatian parti sa sobrang kabuot it Dyos.

44Pagkamasunod nga Adlaw it Inogpahuway, haeos tanan nga pumueuyo sa banwa ngato hay nagtilipon agod magpamati sa mensahi halin sa Dyos. 45Pagkakita ku mga Judio#13:45 Rayang mga Judio siguro hay mga manogdumaea it mga Judio nga nahadlok nga maduea ro pagtahod kanda it mga tawo bilang mga ginakilaea nga manogturo. nga tagaidto ku kaabo nga tawo ngato hay nahisa gid sanda ag naghinambae sanda nga kapurilan kuno ro mga ginapangturo ni Pablo ag anda pa gid imaw nga ginpinakaeain. 46Pero maisog ro buot nanday Pablo ag Barnabas sa pagsabat kanda. Hambae nanda, “Kamo ro hauna nga ginsugiran namon ku mensahi nga halin sa Dyos ag duyon gid ma't-a dapat. Pero dahil indi ma't-a kamo magbaton kara, ag kon kinyo hay owa kamo gakinahangean ku mensahi parti sa kabuhi nga owa it katapusan, ngani indi eon kami magturo kinyo kundi sa mga bukon it Judio la't-a. 47Idto gid ma't-a kami ginsugua it Ginuong Dyos. Pareho ra sa anang ginhambae kato nga,

‘Ginbutang ko ikaw nga mangin iwag sa mga bukon it Judio agod maeuwas ro mga tawo sa bilog nga kalibutan.’ ”#13:47 Isa 49:6.

48Nalipay ro mga bukon it Judio pagkabati nanda ku ginhambae ni Pablo ag sinanda hay kanami gid ro mensahi halin sa Dyos. Ag ro tanan nga ginpili eon eagi it Dyos nga makabaton it kabuhi nga owa it katapusan hay nagtuo. 49Ngani ro mensahi it Dyos parti kay Jesus hay nageapnaag sa tanan nga kabanwahan ku ratong lugar. 50Pero ginsuesuean ku mga nahisa ngato nga mga Judio ro mga relihiyoso ag haeangdon nga mga bayi sa ratong syudad pati man ro mga eaki nga ginakilaea sa sosyudad. Ngani ginhingabot nanda sanday Pablo ag Barnabas ag gintabog ag ginbawaean nga indi eon sanda magtapak bisan siin sa andang lugar. 51Tag nagahalin eon sanday Pablo sa ratong lugar hay andang ginpagpag ro tapu-tapu sa andang mga siki bilang tanda nga sa mata it Dyos, ro mga pumueuyo ngato hay pareho it mga tawo nga owa nagakilaea kana. Nagpanaw dayon sanda paadto sa syudad it Iconium. 52Ro mga sumueunod ma't-a nga andang gin-aywanan sa Antioc hay malipayon gid ag ginagamhan permi it Espirito Santo.

Currently Selected:

Mga Binuhatan 13: akl

Highlight

Copy