Nahúm 1
1
Li Diose ja' jpac-ajvalil stuc
1Li vun li'i ja' sc'oplal c'usi chc'ot ta pasel ta Nínive ti i'ac'bat yil li Nahúm liquem ta Elcose.#Is 10.5-34; 14.24-27; Sof 2.13-15.
2Li Muc'ul Diose ja' Dios ti sna' x'it'ixaj yo'ntone, xchi'uc ja' jpac-ajvalil;#Ex 20.5-6; Dt 4.24.
ja' tspacbe sutel li boch'o chcontrainat yu'une,
ta xilinta li yajcontrae.
3Ta melel li Muc'ul Diose toj muc' yo'nton, pero toj ech'em svu'el;
muc teuc no'ox tsts'icbe li boch'o oy smule.
Li Muc'ul Diose te chanov ta tsatsal ic'al vo' xchi'uc ta sutub ic';
li toque ja' spucucal yacan.
4Me ta sibtas li nabe, ta x'ul,
jech ta x'ul scotol li uc'umetique.
Li ts'i'laletic ta Basán, ta vits Carmeloe ta xtaquij scotol;
li nichimetic ta Libanoe ta smats' scotol.
5Li vitsetique ta xnic ta stojol li Diose,
li bic'tal vitsetique ta x'ulan ta stojol.#Sal 97.5; Mi 1.4.
Li banamil xchi'uc scotol li cristianoetic te nacajtique ta xnic yu'un;
sbejlijil banamil ta xnic ta stojol.
6¿Me oy boch'o xcuch yu'un c'alal me i'iline?
¿Me oy boch'o lec va'al chcom c'alal me itsan sc'ac'al yo'ntone?
Li sc'ac'al yo'ntone ta spuc sba batel jech chac c'u cha'al c'oc',
jech ta x'unijan scotol li ch'entique.
7Li Muc'ul Diose toj lec yo'nton.
Ja' stsatsal co'ntontic ti c'alal yorail oy tsots jvocoltique;
ja' chchabi li boch'o ja' spatoj yo'ntonic ta stojole.#Sal 25.8; 37.39-40.
8Yan li boch'o tscontrainique
ta sves batel scotol jech chac c'u cha'al yip nojelal uc'um;
ta snuts batel ta ic'al osil li yajcontrae.
9¿Me chanopic ti oy c'usi chopol chac'an chapasbeic li Muc'ul Diose?
Li stuque j'ech'el ta x'ulesvan o.
Mu'yuc boch'o xcuch yu'un chib velta.
10Ac'o me ja' jechic jech chac c'u cha'al ch'ix ti solel xpech'oj sbae,
ac'o me lec xu' yu'un cha'yic jech chac c'u cha'al jyacubel,
pero ja' no'ox jech chc'aq'uic jech chac c'u cha'al jobel ti lec taquine.
11Nínive, vo'ot ta atojol iloc' li boch'o tsnop scontrain li Muc'ul Diose;
ja' jun chopol jbijubtasvanej.
12Li Muc'ul Diose jech chalbe li steclumal Judae:
“Ac'o me toj tsotsic, me toj epic li asiriaetique,
pero ta xich'ic ulesel, j'ech'el chbatic o.
Ac'o me laj to'ox cac'bot ep avocol,
pero mu'yuc xa chacac'bot yan velta.
13Li yabtejeb vacax xchucoj ta anuq'ue ta jlilin loq'uel;
ta jtuch'be li cadenaetic xchucojot oe”, xut.
14Li vo'ote, ajvalil ta Nínive, jech chal ta aventa li Muc'ul Diose:
“J'ech'el ta xch'ay o ta alel abi, j'ech'el ta x'ul o ats'unubal.
Te ta sna diosetic avu'un ta jlilin li c'usitic acuyojic ta dios
ti pasbilic ta te', xchi'uc ta unijesbil taq'uine.
Ja' te ta jmucot noxtoc, yu'un toj bats'i chopolot”, xi.
Laj yich' alel ti chlaj li lum Ninivee
15Q'uelo avilic, le' xa xtal ta vitsetic
li boch'o chtal yal lequil a'yeje,
li boch'o chtal yal ti ta jta jun co'ntontique.#Is 52.7.
Judá, nicuc no'ox q'uinetic avu'un;
paso me li c'usitic avaloj chapase.
Mu xa xtal stsacot o ta pleito li chopol cristianoetique,
yu'un i'ulic xa o ta j'ech'el.
Currently Selected:
Nahúm 1: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.