Jueces 1
1
Li Judá xchi'uc Simeone la xchuquic li Adoni-bezeque
1C'alal chamen xa'ox li Josuee, li israeletique lic sjac'beic Muc'ul Dios boch'o jchopucal ba'yuc chbat spas pleito yu'unic xchi'uc li canaanetique. 2Jech itac'batic yu'un li Muc'ul Diose: “Ja' ba'yuc chbatic li boch'otic liquemic ta Judae yu'un ja' cac'ojbe ta sc'obic li banamil le'e”, xi. 3Ja' yu'un li jchop liquemic ta Judae jech laj yalbeic li jchop liquemic ta Simeone, ja' yits'inab no'ox sbaic: “Bat coltauncutic ta spojel li banamil ti sc'oplal chquich'cutique, jech chbat jcoltaotcutic ta spojel ec li banamil bu chavich'ique”, xutic. Jech la xch'unic batel li jchop liquemic ta Simeone, 4-5jech ibatic xcha'chopalic. Li Judae i'ac'bat ta sc'obic yu'un Muc'ul Dios li canaanetique xchi'uc li ferezetique. La smilic comel lajunmil (10,000) viniquetic te ta Bezec. Te la staic noxtoc ta Bezec li Adoni-bezeque, pero ijatov batel. 6La snutsic batel, la xchuquic; la sc'ocanbeic sme' sc'ob xchi'uc sme' yacan. 7Li Adoni-bezeque jech laj yal: “Li vu'une ja' jech la jc'ocanbe sme' sc'ob, sme' yacanic lajuneb xchanvinic (70) ajvaliletic ec; laj cac'be stamic xch'uch'ulil jve'el ta yolon jmexa. Ti c'u x'elan la jpase, ja' jech chispacbun ec li Diose”, xi. Jech te laj yiq'uic batel ta Jerusalén; te icham o.
Ja' smelol c'alal i'och ta sc'obic Jerusalén xchi'uc Hebrón li Judae
8Li boch'otic liquemic ta Judae bat spojic li Jerusalene; laj yich'ic o comel. La smilbeic ta espada scotol li yajvale, xchi'uc laj yac'beic comel sc'ac'al li lume. 9Ts'acal bat stsalic noxtoc li canaanetic te nacajtic ta toyolaltic ta yosilal Néguev xchi'uc ta stenlejaltique.#Jos 10.40; 11.21. 10Xchi'uc bat stsalic noxtoc li canaanetic te nacajtic ta Hebrón#Jos 10.36-37. ti Quiriat-arba to'ox sbie. La smilic comel li Sesai, Ahimán, xchi'uc Talmaie.
La stsal lum Debir li Otoniele jech laj yic' o li Acsae
(Jos 15.15-19)
11Ts'acal bat smilic noxtoc li boch'otic te nacajtic ta Debire,#Jos 10.38; 11.21. ja' li Quiriat-sefer to'ox sbie. 12Jech ono'ox yaloj li Calebe: “Li boch'o chbat stsal li lum Debire, ta xcac'be yic' li jtseb Acsae”, xi. 13Li boch'o ay stsale ja' Otoniel, xnich'on Cenaz; ja' xnich'on xc'ox its'in li Calebe. Ja' yu'un li Calebe ja' laj yac'be o yic' li stseb Acsae. 14C'alal yu'un xa'ox chic' batel li yajnile, li Otoniele laj yalbe yajnil ti ac'o sc'anbe jutebuc yosil li stote. Jech iyal ta sburo li tsebe. Li Calebe jech la sjac'be li stsebe:
—¿C'usi apas? —xut.
15—Yu'un oy c'usi ta jc'an chavac'bun. Yu'un avac'ojbun xa ono'ox li Negueve; ac'bun noxtoc li nio'etic tee —xut.
Jech li Calebe laj yac'be li nio'etic ta cajal xchi'uc ta olone.
Li jchop liquemic ta Judá xchi'uc ta Benjamine la spojic to batel yan yosilic
16Li xnich'nab queneo vinic, ja' li smuni' Moisese, iloq'uic batel ta lumetic ti xantic sbie; ja' la xchi'inic batel li jchop liquemic ta Judae. Te ibatic ta xocol banamil yu'un li Judá te ta stuq'uil sur yu'un Arade. Jech te icom naquiicuc scotolic. 17Li jchop liquemic ta Judá xchi'uc ta Simeón ti xchi'il no'ox sbaic ta voq'uele bat stsalic li canaanetic te nacajtic ta Sefate; laj yulesic o comel. Li lum tee Horma#1.17 Horma - Ta hebreo c'op ja' smelol ech'el i'ul o. laj yac'beic sbi. 18Li Judae laj yich'ic noxtoc li lum Gaza xchi'uc yosilale, xchi'uc li Ascalón xchi'uc yosilale, xchi'uc li Ecrón xchi'uc yosilale.#Jue 3.3. 19Li Judae te chi'inbil yu'un li Muc'ul Diose, jech ivu' yu'un la stsalic li boch'otic te nacajtic ta vitsetic ta toyolaltique. Ja' xa no'ox muc stsal yu'unic li boch'otic te nacajtic ta stenlejaltique yu'un oy lec scaretaic pasbilic ta stsatsal taq'uin. 20Li Calebe ja' laj yich' li Hebrone yu'un jech ono'ox yaloj comel li Moisese. Ja' yu'un li Calebe la snuts loq'uel li oxib xnich'nab muc'ta vinic Anaque.#Jos 15.13-14; Jue 1.10. 21Pero li jchop liquemic ta Benjamine muc xu' yu'unic la snutsic loq'uel te ta Jerusalén li jebusetic te nacajtique. Ja' yu'un te la xchi'inic o ta naclej. Yoquel te xchi'inojic o ta naclej ta Jerusalén c'alal to tana.#Jos 15.63; 2 S 5.6; 1 Cr 11.4.
Ja' smelol c'alal bat spojic Betel li smomnich'nabtac Josee
22Li smomnich'nabtac Josee imuyic batel ta Betel, te chi'inbilic yu'un li Muc'ul Diose. 23Ba'yuc la staquic batel boch'o chbat sq'uel c'u x'elan li lum Betele, ja' li Luz to'ox yan sbie. 24Li boch'o ibatique laj yilic jun vinic te iloc' tal ta lum, jech laj yalbeic: “Ac'bun quilcutic c'u x'elan xu' chij'och ta yut li lume. Me chavac'bun quilcutique, ta xajc'uxubinotcutic”, xutic. 25Jech li vinique laj yac' ta ilel c'u x'elan xu' ch-ochic ta yut lum, jech la smilic comel ta espada scotol. Yan li vinique la scoltaic batel xchi'uc yajnil xnich'nab. 26Te ibat ta yosilal Hetetic; te la spas jun lum. Luz laj yac'be sbi. Ja' jech sbi o c'alal to tana.
Muc xu' yu'unic stsalel yajvaltac banamil li Manasés xchi'uc Efraine
27Li jchop liquemic ta Manasese muc xu' yu'unic stsalel li lum Bet-seán, Taanac, Dor, Ibleam, Meguido, xchi'uc li tsobtsobnaetic yu'un jujun lume. Ja' yu'un te la xchi'inic ta naclej li canaanetique. 28Pero c'alal itsatsub lec yo'ntonic li israeletique, laj yaq'uic persa ti ac'o abtejicuc tsots yu'unic li canaanetique, pero muc xu' yu'un la snutsic loq'uel.#Jos 17.11-13.
29Jech noxtoc li jchop liquemic ta Efraine muc xu' yu'un la snutsic loq'uel ta Gezer li canaanetic te nacajtique, jech te nacajtic icom xchi'uquic.#Jos 16.10.
Ja' smelol ti muc xu' yu'unic snutsel loq'uel yajvaltac yosilic li yantic israeletique
30Li jchop liquemic ta Zabulone muc xu' yu'unic snutsel loq'uel li canaanetic te nacajtic ta Quitrón xchi'uc ta Naabale, jech te nacal icom xchi'uquic. Ja' no'ox laj yac'beic tsots yabtelic.
31-32Jech ec li jchop liquemic ta Azere muc xu' yu'unic snutsel loq'uel li canaanetic te nacajtic ta Aco, ta Sidón, ta Ahlab, ta Aczib, ta Helba, ta Afec, xchi'uc ta Rehobe. Ta sventa ti muc xu' yu'unic snutsel loq'uele, jech te nacal icom xchi'uquic.
33Jech ec li Neftalie muc xu' yu'unic snutsel loq'uel noxtoc li canaanetic te nacajtic ta Bet-semes xchi'uc ta Bet-anate. Jech te nacajtic icom xchi'uquic; ja' no'ox laj yac'beic tsots yabtelic.
34Li amorretique la snutsic batel c'alal to ta vitsetic li jchop liquemic ta Dane; muc xaq'uic yalicuc tal ta stenlejaltic. 35Ja' yu'un li amorretique ja' te icom naquiicuc o ta Heres, ta Ajalón xchi'uc ta Saalbim. Pero c'alal itsatsub lec yo'ntonic li smomnich'nabtac Josee, lic yaq'uic persa ti ac'o abtejicuc tsots yu'unic li amorretique.
36Li sts'aquic xchi'uquic amorretique te xlic ta ch'utch'ut vits yu'un Acrabim c'alal to ta Sela, xmuy batel c'alal to ta cajal.
Currently Selected:
Jueces 1: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.