Yesaya 30
30
Komba Masiri sine Ondaemo i Ue mompowee pontulungi
30:1-17
1Masola ntu'u nana'ote anu umewa,
kanandiomo pau-Do i Ue,
anu weweuo tinoo anu komba inso ndi Ongkue,
anu mewinsokio tepo'asaa,
anu komba hangano Penaa-Ku,
ranta ka dompohowu hala metiangi hala.
2Ondae mpelungka melako i Masiri
nahi dompo'ema pomputusi-Ku,
ira mpepekadudui ndi Pirao
ka mpepetaloi i totono pabawano Masiri.
3Sine pekaduduino i Pirao
ta mokoko'ii komiu,
petaloia i totono pabawano Masiri
ta sumosa'ari komiu.
4Hangano, maupo luwuno anu langkai potorodo i Yerusale mekongko iramo i Soani,
ka luwuno tinenano mehawe iramo i Hanesi,
5luwuno ta mohawe mokoko'ii
hangano tongku atuu nahi polio moweeako ira anu mentudu,
ka nahi polio moweeako ira pontulungi ke anu mentudu;
sine butu mompokoko'ii, tendeano moweweuako ira tataado.
6Pau-Do anu pabawa mongkona kondehora i Wita Nege.
Telalo a wita anu buke ma'isoa ka te'asi,
po'iangado singa waino ka singa lakino mpengaoli,
po'iangado ule me'ipo ka ule mepani,
domewawao arataa pompolido a wawo bungkuno kalide,
ka luwuno parewa pinekariado a wawo palasa unta
a tongku anu nahi domempolio mpompowee anu mentudu,
7 #
Yes. 51:9
a nto Masiri anu moweeako ira pontulungi anu nahina pengkonaano;
onaemo pu'uno, Kuneeakono, ”Rahabi, kalamboro anu butu mentoro menoro-noro.”
8Kanandio-andio, lakomo, buriomo atuu i arono matado a asa watu medempe,
ka nggoriomo atuu a asa lempe,
ka igagi sakosii
a tempo anu ta hawe ranta nahina tampulaano.
9Hangano ondae atuu tongku anu mpe'ewa,
nana'ote anu ineheno megaupi
nana'ote anu nahi behe moronge
pompaguru-Do i Ue;
10anu motaeako ira puu pomparesa, ”Sii mpomparesa,”
ka a puu pongkita, ”Siimo impokitaakami mongkona anu mentee,
sine impopaumo anu nahi mentudu ndi omami,
kitaakamimo mongkona anu komba mentee,
11pe'apiakomo inso a nsala, pansiamo inso a nsala,
siimo popo'aro kami mbo'u saru Ondae Anu Tedoa Mempori, Ue Alado to Isaraeli.”
12Onaemo pu'uno, kanandiomo pau-Do Anu Tedoa Mempori, Ue Alado to Isaraeli,
”Hangano omiu nahi mentarimao pau andio,
ka mpe'ala-alaakono koroimiu a pompokonsiia ka poweweu anu nahi mentee,
saru mpe'ini ndi onae,
13asalakono hala andio ta gagi ndi omiu
kana rere watu umete anu tamo ronga tebangku,
mesombulako i bungkuno a rere watu anu mantande,
terawo-rawono mansa hawe nahi kinoo-koo, i larono asa mpiniro,
14ka kana terawono bolusa wineweuno puu mpoweweu parewa inso a wita pulu,
anu pinuro-puro nahi pinehohawa,
ranta i olono tepurono
nahina hinawe maupo te'asa lempe
anu moiko ipino'alaako api inso a mpolu
ke monsiru uwoi inso a limbo.”
15Hangano kanandiomo pau-Do Ue Ala,
Ondae Anu Tedoa Mempori, Ue Alado to Isaraeli,
”Saru mpepokule ndi Ongkue ka mpo'ia mpenoro-noro
komiu mengkinadudui,
i larono impo'ia mpomperodo ka mpompe'ala-ala
rosomiu mo'ia.”
Sine nahi mebehe,
16tendeano impotae, ”Naahi,
kami mpolai mpesawi a ngara,”
onaemo ka komiu mpolai nahi teto'ori pe'aroamiu.
Mpotae komiu mbo'u, ”Kami mpesawi a ngara anu magasi,”
ka ta kanatuu koa mbo'u magasido anu lumulu komiu.
17Asa nsowu mia ta molai a pompokodoitono asa mia,
a pompokodoitono olima mia komiu mpolai,
ranta ka imebininta
kana keu tinandapako petondoni a wawo punsuno torukuno
ka kana bandera a wawo pongku.
Dandi tekaduduiano Sioni
30:18-26
18Onaemo pu'uno, Ondae i Ue mesisikori
Ira mopokitao pompehohawa-Do ndi omiu;
onaemo ka Dopentade
mehohawa komiu.
Hangano Ondaemo Ue Ala anu moleo;
meme'uraomo mia anu sumisikori Ira!
19Mentee ntu'u, hei tongku i Sioni anu mpo'ia i Yerusale, nahi komengese mpiha. Menteeano, Ondae i Ue Ira mehohawako, tewala omue meboo-booli; i tempono Dorongeo peboolimu, Ira sumangki. 20Maupo Dopoweeakomiu i Ue roti ma'isoa ka uwoi marasaia, sine anu Paguruko nahi Ira mewuni mbo'u, ka matamu ta kumita Ira mpiha. 21Birimu ta rumongeo pau andio inso i bungkumu, ”Ndiomo salano, pelempamo tumondao,” tewala komiu mpekoana ke mpemanggali. 22Omue komokoburuako ira tinahamu anu mewaluako salaka ke luwuno lahumoamu anu me'apiiako wulaa; onae kotumadio kana sawu hawe wulano beine saru motaeakono, ”Polaimo!” 23Ka i'amba Ondae i Ue Ira mompotiiakono usa a inii anu rinawomiu i wita, ka roti hasilino wita atuu ta mo'ahi ka hadio ntu'u. I tempo atuu pinotuwumu ira mpongkaa ewo a ntonga mpada anu malua; 24luwuno sapi ka kalide anu mpo'angga wita ira mpongkaa kaanga sinalo anu mo'ahi, anu dinukuako sikopa ka sarampa poduku. 25I wawono sompo torukuno anu mantande ka sompo pongku anu telanso ta mompowaa uwoi a oleo pompepatea anu langkai, tempono dontehoa menara. 26Mewineno wulantii ta kana mewineno oleo mokula ka mewineno oleo mokula ta meluka opitu, kana mewine opitu oleo, i tempono Ondae i Ue waluo mobela langkaino bawaa-Do ka mokotompao mobela hanga mpetunduhia.
Pohuku-Do Ue Ala a nto Asiuri
30:27-33
27Kitaomo, nee-Do i Ue hawe inso a mpo'ianga anu olai,
tekuda-Do tensila a laro ahu mokapa anu membombo,
wiwi-Do bukeako tekuda,
ka elo-Do kana api anu mengkaa ka ipingko;
28pepuurino penaa-Do kana korono anu mompolomo,
anu uwoino hawe a we'u.
Ondae aiwa Ira montirisaako pontirisa matea a luwuno tongku
ka mompokona koloro sama anu mompokotesosaelo a asedo luwuno suku tongku.
29Komiu mpenani kana i tempono wongi,
tempono mia mpepokomempori tiano porame-ramea,
ka aroamu ta mo'unde kana i tempono mia melempa tinondaako siloli
ta mewuatako a ntorukuno-Do i Ue, a Ntorukuno Watudo to Isaraeli.
30Ondae i Ue Ira moporongeo suara-Do anu maramba,
Ira mopokitao kae-Do anu montunduhi
saru tekuda anu mongkokongiri ka langano api anu mengkaa ka ipingko,
saru usa marombo, angi mokora ka usa watu.
31Hangano, Asiuri ta doitoako suara-Do i Ue,
i tempono Dotunduhiako ira tuko.
32Hangano, sompo petunduhi mompake tuko pontunduhi
anu Dopotiio i Ue ndi onae,
ta tinondaako rebana ka katapi,
ka Ira metea umewaio Asiuri
saru po'iono kae a laro mpeteaa.
33Hangano inso i ndi'ipua inatoraomo po'ianga pontunua,
anu mbo'u pinatindaako mokole,
pompotuwua api wineweu ondalo ka malua,
buke api ka keu;
penaa-Do i Ue mokomo'aio kana korono walira.
Currently Selected:
Yesaya 30: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
Yesaya 30
30
Komba Masiri sine Ondaemo i Ue mompowee pontulungi
30:1-17
1Masola ntu'u nana'ote anu umewa,
kanandiomo pau-Do i Ue,
anu weweuo tinoo anu komba inso ndi Ongkue,
anu mewinsokio tepo'asaa,
anu komba hangano Penaa-Ku,
ranta ka dompohowu hala metiangi hala.
2Ondae mpelungka melako i Masiri
nahi dompo'ema pomputusi-Ku,
ira mpepekadudui ndi Pirao
ka mpepetaloi i totono pabawano Masiri.
3Sine pekaduduino i Pirao
ta mokoko'ii komiu,
petaloia i totono pabawano Masiri
ta sumosa'ari komiu.
4Hangano, maupo luwuno anu langkai potorodo i Yerusale mekongko iramo i Soani,
ka luwuno tinenano mehawe iramo i Hanesi,
5luwuno ta mohawe mokoko'ii
hangano tongku atuu nahi polio moweeako ira anu mentudu,
ka nahi polio moweeako ira pontulungi ke anu mentudu;
sine butu mompokoko'ii, tendeano moweweuako ira tataado.
6Pau-Do anu pabawa mongkona kondehora i Wita Nege.
Telalo a wita anu buke ma'isoa ka te'asi,
po'iangado singa waino ka singa lakino mpengaoli,
po'iangado ule me'ipo ka ule mepani,
domewawao arataa pompolido a wawo bungkuno kalide,
ka luwuno parewa pinekariado a wawo palasa unta
a tongku anu nahi domempolio mpompowee anu mentudu,
7 #
Yes. 51:9
a nto Masiri anu moweeako ira pontulungi anu nahina pengkonaano;
onaemo pu'uno, Kuneeakono, ”Rahabi, kalamboro anu butu mentoro menoro-noro.”
8Kanandio-andio, lakomo, buriomo atuu i arono matado a asa watu medempe,
ka nggoriomo atuu a asa lempe,
ka igagi sakosii
a tempo anu ta hawe ranta nahina tampulaano.
9Hangano ondae atuu tongku anu mpe'ewa,
nana'ote anu ineheno megaupi
nana'ote anu nahi behe moronge
pompaguru-Do i Ue;
10anu motaeako ira puu pomparesa, ”Sii mpomparesa,”
ka a puu pongkita, ”Siimo impokitaakami mongkona anu mentee,
sine impopaumo anu nahi mentudu ndi omami,
kitaakamimo mongkona anu komba mentee,
11pe'apiakomo inso a nsala, pansiamo inso a nsala,
siimo popo'aro kami mbo'u saru Ondae Anu Tedoa Mempori, Ue Alado to Isaraeli.”
12Onaemo pu'uno, kanandiomo pau-Do Anu Tedoa Mempori, Ue Alado to Isaraeli,
”Hangano omiu nahi mentarimao pau andio,
ka mpe'ala-alaakono koroimiu a pompokonsiia ka poweweu anu nahi mentee,
saru mpe'ini ndi onae,
13asalakono hala andio ta gagi ndi omiu
kana rere watu umete anu tamo ronga tebangku,
mesombulako i bungkuno a rere watu anu mantande,
terawo-rawono mansa hawe nahi kinoo-koo, i larono asa mpiniro,
14ka kana terawono bolusa wineweuno puu mpoweweu parewa inso a wita pulu,
anu pinuro-puro nahi pinehohawa,
ranta i olono tepurono
nahina hinawe maupo te'asa lempe
anu moiko ipino'alaako api inso a mpolu
ke monsiru uwoi inso a limbo.”
15Hangano kanandiomo pau-Do Ue Ala,
Ondae Anu Tedoa Mempori, Ue Alado to Isaraeli,
”Saru mpepokule ndi Ongkue ka mpo'ia mpenoro-noro
komiu mengkinadudui,
i larono impo'ia mpomperodo ka mpompe'ala-ala
rosomiu mo'ia.”
Sine nahi mebehe,
16tendeano impotae, ”Naahi,
kami mpolai mpesawi a ngara,”
onaemo ka komiu mpolai nahi teto'ori pe'aroamiu.
Mpotae komiu mbo'u, ”Kami mpesawi a ngara anu magasi,”
ka ta kanatuu koa mbo'u magasido anu lumulu komiu.
17Asa nsowu mia ta molai a pompokodoitono asa mia,
a pompokodoitono olima mia komiu mpolai,
ranta ka imebininta
kana keu tinandapako petondoni a wawo punsuno torukuno
ka kana bandera a wawo pongku.
Dandi tekaduduiano Sioni
30:18-26
18Onaemo pu'uno, Ondae i Ue mesisikori
Ira mopokitao pompehohawa-Do ndi omiu;
onaemo ka Dopentade
mehohawa komiu.
Hangano Ondaemo Ue Ala anu moleo;
meme'uraomo mia anu sumisikori Ira!
19Mentee ntu'u, hei tongku i Sioni anu mpo'ia i Yerusale, nahi komengese mpiha. Menteeano, Ondae i Ue Ira mehohawako, tewala omue meboo-booli; i tempono Dorongeo peboolimu, Ira sumangki. 20Maupo Dopoweeakomiu i Ue roti ma'isoa ka uwoi marasaia, sine anu Paguruko nahi Ira mewuni mbo'u, ka matamu ta kumita Ira mpiha. 21Birimu ta rumongeo pau andio inso i bungkumu, ”Ndiomo salano, pelempamo tumondao,” tewala komiu mpekoana ke mpemanggali. 22Omue komokoburuako ira tinahamu anu mewaluako salaka ke luwuno lahumoamu anu me'apiiako wulaa; onae kotumadio kana sawu hawe wulano beine saru motaeakono, ”Polaimo!” 23Ka i'amba Ondae i Ue Ira mompotiiakono usa a inii anu rinawomiu i wita, ka roti hasilino wita atuu ta mo'ahi ka hadio ntu'u. I tempo atuu pinotuwumu ira mpongkaa ewo a ntonga mpada anu malua; 24luwuno sapi ka kalide anu mpo'angga wita ira mpongkaa kaanga sinalo anu mo'ahi, anu dinukuako sikopa ka sarampa poduku. 25I wawono sompo torukuno anu mantande ka sompo pongku anu telanso ta mompowaa uwoi a oleo pompepatea anu langkai, tempono dontehoa menara. 26Mewineno wulantii ta kana mewineno oleo mokula ka mewineno oleo mokula ta meluka opitu, kana mewine opitu oleo, i tempono Ondae i Ue waluo mobela langkaino bawaa-Do ka mokotompao mobela hanga mpetunduhia.
Pohuku-Do Ue Ala a nto Asiuri
30:27-33
27Kitaomo, nee-Do i Ue hawe inso a mpo'ianga anu olai,
tekuda-Do tensila a laro ahu mokapa anu membombo,
wiwi-Do bukeako tekuda,
ka elo-Do kana api anu mengkaa ka ipingko;
28pepuurino penaa-Do kana korono anu mompolomo,
anu uwoino hawe a we'u.
Ondae aiwa Ira montirisaako pontirisa matea a luwuno tongku
ka mompokona koloro sama anu mompokotesosaelo a asedo luwuno suku tongku.
29Komiu mpenani kana i tempono wongi,
tempono mia mpepokomempori tiano porame-ramea,
ka aroamu ta mo'unde kana i tempono mia melempa tinondaako siloli
ta mewuatako a ntorukuno-Do i Ue, a Ntorukuno Watudo to Isaraeli.
30Ondae i Ue Ira moporongeo suara-Do anu maramba,
Ira mopokitao kae-Do anu montunduhi
saru tekuda anu mongkokongiri ka langano api anu mengkaa ka ipingko,
saru usa marombo, angi mokora ka usa watu.
31Hangano, Asiuri ta doitoako suara-Do i Ue,
i tempono Dotunduhiako ira tuko.
32Hangano, sompo petunduhi mompake tuko pontunduhi
anu Dopotiio i Ue ndi onae,
ta tinondaako rebana ka katapi,
ka Ira metea umewaio Asiuri
saru po'iono kae a laro mpeteaa.
33Hangano inso i ndi'ipua inatoraomo po'ianga pontunua,
anu mbo'u pinatindaako mokole,
pompotuwua api wineweu ondalo ka malua,
buke api ka keu;
penaa-Do i Ue mokomo'aio kana korono walira.
LAI 2021