Oroma 3
3
At Ala en it Yakuri menda des erogo okbisaup imbitigi wene
1Andi halok, it avakwa Yakuri dek menda un inigik, it Yakuri menda ako ogo adem dek hegek unat denogo bigigi ombasagwi? Eke, enagamut mbalisagwi andi, un adem dek hegek mbanggu dogop yiluk, yugeragagi ombasagwi? 2Dek. It ogagu dogopwak yiluk denogo bogogi ako andi, wene adem wisane agarik atma, yukherayogon. Ambi andi, At Ala en, “An nane andi it vagago dogopwak,” imbita lagagirik, it andok okbogogi.
3Okbogogi hegek, it ninen wene andi vaga wokbaluk, des erogo ogagetek halok andi, nggarogo embetep? Des erogo ogagetek halok, At Ala en it des erogo okbisaup imbitigi ako, okbisayogonbuk ombasagwi? 4#Mazmur 51:4 bikhanes. Dek o. Okbisayogon aro! Ala wene endak dirup warek ambi vaga, Daut en iri dugwit:
“Hat Ala hane iri heyagek, avyarat des erogo iri heyalagwi,
Howak dinggusigik, wene hovaga bagaup mondok dek o,”
yiluk, yagagi dirup warek wane-wane it avakwa ovok erogo huluk wene yagalagwi ovara, Ala ako andi, avyarat adigat yagaliga.
5Nit segerogo ogagetek weyak ogasagwi vaga, Ala sek adigat ogasiga yedok helagwi halok, nit nggarogo yup embetep? “At Ala aninis en anggin nenovaga bininaliga andi, At des erogo dibininggitek dugwit, okbininaliga higyo,” yiluk, anderogo yup sek ombasagwi? An yigi ako andi, avakwa en yagalagwi ovagak yigi. 6Anderogo yubuk. At Ala en des erogo okbininelapuk en, nggarogonggan yi avakwa ndi avakwa ovok erogo Aren enowak dilinivup ombasagwi?
7Anderogo ovara, hat ambien iri dugwit, “An huluk wene yagaliga vaga At Ala avyarat adigat yagaliga sigam ogagya neyalok, avakwa en At siyabelagwi. Anderogo atma, At Ala en, ‘Hat huluk wene yagaliga atma, anggin onggo okbagasogon,’ yiluk, yuknirubuk.” Anderogo yup sek ombasagwi? Dek. 8Eke it ninen nit yegetek ninigik ovara, nininis weyak arupwak yiluk, yugu dugwit, “Paulus melen en ‘Sek menda sigam arupwak yiluk weyak ogarusogom o,’ yiluk, yugu sugup,” nenavok yagalagwi. Anderogo wane-wane, niren, “Sek menda sigam arupwak yiluk, weyak ogarusogom o,” yiluk, yagan nagu dogop sek ombasagwi? Dek. Nit nininis weyak arupwak yiluk yagan nelagwi andi, Ala en anggin enovaga bisayogon andi, segat.
Avakwa ovok erogo weyak ogasagwi wene
9Anderogo atma, nggarogo yumwi? Nit Yakuri menda andi sek, eke, it avakwa weram Yakuri dek menda andi, weyak, ombasagwi? Anderogo mondok yubuk. Ata nit avakwa ovok erogo weyak avema agurik, yukhirigi ako. 10Ala wene dirup warek vaga en iri dugwit:
“Ap ambi mondok sek andi, sa agarik?
Ambiat ogo mondok dek aro.
11Ap endawi werek ambi, mondok dek,
eke, An Ala neyave des erogo inilup aruguluk namusek wendagwi menda andi ogo, degat.
12 #
Mazmur 14:1-3; 53:1-3; Pengkhotbah 7:20 bikhanes. It ovok erogo sup sek vaga lagatek, ata, nomaliluk sup adik vaga lagwi,
it ovok wane-wane-at un enam warogo ogarit lagwi,
ogasagwi atma,
it nin sek ogarup andi, dek,
ap ambiat ogo, mondok dek.
13 #
Mazmur 5:9; Mazmur 140:3 bikhanes. Enavup adup okbaluk enabis vaga wolok-wolok ane yagan nagwis,
enabya vaga, enane huluk adigat molalit nagwis,
enabis vaga mbas alimbuk ayonggol ovagak wene yagan nagwis,
14 #
Mazmur 10:7 bikhanes. enendawima en weyak adigat yidik dugwit, avakwa vudilogo bugwis,
enane eda adigat yagan nagwis,
ogasagwi.
15It mbikit ap enamuya wilogo enarit lagwi,
16yi awi ndi awi nagu dugwit, avakwa weyak erogo bigik nagwis,
o masok-danggok erogo balin nagwis,
ogasagwi.
17 #
Yesaya 59:7-8 bikhanes. Avakwa enendawi ugun seyalek adenggen okbigik nagu dogop andi, it inunggut,
18 #
Mazmur 36:1 bikhanes. Ala enalon ombarup andi,
mondok ogagetek-at inisaliga o,”
yiluk, yagagi dirup warek andi wane-wane, nit Yakuri menda inim, avakwa weram Yakuri dek menda inim, ovok erogo weyak avema agurik yukhirigi akoat yukheraliga.
19Andi halok, Ala en, “Yerogo ogarup, nderogo ogarup,” yiluk, wene Musa yugogogi ako ovok erogo it wokbaluk ogasagwi andi, it enake yugeraliga, andi nit ninilup. Eke, it yi ap ndi ap o yoma agarwik ovok erogo enane degerogo bisiluk, “Nit ovok erogo weyak ogasagwi onggo okbininayogon higyo,” yiluk, yedok hapwak yiluk, wene Musa yugogogi helagwi. 20Anderogo atma, avakwa Musa wene ako ogasagwi vaga Ala en, “Hat ap segat,” yiluk, yisogon mondok dek. Ata, “An weyak ogasiga-at higi,” yiluk, yedok hugu dogopwak yiluk, Musa wene ako agarik.
Enendawi avyarat ombasagwi vaga Ala en wokninivisiga wene
21Anderogo ovara, yogak andi, Ala en avakwa sek inimbita dugwit, woginivisiga wene andi, sigam agagi. Andi, Musa wene ako inim, eke it navi-navi Ala en yugirigya hegek yagagwa ako inim, it yagagwa ako wane-wane, wene hobalek ogasagwi vaga Ala en avakwa sek inimbita dugwit, woginivisigadek. 22Ata, avakwa enendawi Yesus Keretus ovaga vanggabaluk, avyarat ombasagwi vaga, Ala en sek inimbita dugwit, woginivisiga. Eke, it Yakuri menda inim, weram Yakuri dek menda inim, andi ndatak. Nit ovok erogo nenendawi Yesus Keretus ovaga vanggabaluk avyarat umbutu niniselok, Ala en sek ninimbita dugwit, wokninivisiga. 23Nit ovok erogo weyak adigat ogarit lagu dugwit, Ala en nit avakwa sek siyalek dogop ninimbitigi ako wane-wane atma agetek-at agurik. 24Wane-wane agetek-at agurik ovara, At Yesus Keretus en nenonggo mbabaluk heda visilogo bininggigi ako vaga Ala nenabwa en onggodek unat “Hit segat,” yiluk, wokninipigirikmu agurik.
25Endak, At Ala en, nit avakwa weyak ogagu ninigik, At endawi sagain vaga dugwit, weyak onggo okbininggitek hekbinininggigi ovara, yogak At atma nggedok ogasiga ako ninilup arupwak yiluk, Yesus lakba wagagi. Lakba wagagi ako, eyave watu lagagwama amuya winggigi ako vaga, nit avakwa nenendawi At ovaga vanggabaluk avyarat ombasagwi ako, nit weyak ogasagwi andi degerogo bininapwak yiluk, lakba wagagi. 26Anderogo ogagagi vaga, Arenen o yogak atma nggedok okbininggu, eke, nit avakwa nenendawi Yesus ovaga vanggabaluk avyarat umbutu niniselok, “Ap yi, mondok sek o,” yiluk, wokninipu, ogagya hasogom yiluk, ogagagi atma, yukheraliga.
27Anderogo atma, wene adem ngga vaga Ala en nit sek ninimbita dugwit wokninivisiga ako, wogobetaup ombasagwi? “Nit Musa wene ogasagwi vaga Ala en wokninivisiga,” yiluk, wogobetaup sek ombasagwi? Mondok dek. Nenendawi At ovaga vanggabaluk avyarat ombasagwi vaga adigat Ala en sek ninimbita dugwit wokninivisiga atma, nit wogobetaup mondok dek, yiluk, yukheraliga. 28Wene modo, “Yerogo ogarup, nderogo ogarup,” Musa yugogogi wene ako ogasagwi vaga Ala en, “Ap yi, sek aro,” yiluk, wokninivisigadek. Ata, At ovaga vanggabaluk avyarat ombasagwi vaga adigat wokninivisiga andi mondok avyarat yiluk, yukheraliga. 29At Ala andi, it Yakuri menda adigat Enasin agarik ombasagwi? It weram Yakuri dek menda ogo Enasin dek atma yiluk, yagalagwi? Dek o. At Ala andi, it weram Yakuri dek menda ogo Enasin-at agarik. 30At Ala andi, ambiatma, enagamut mbalek menda inim, mbalekdek menda inim, enendawi avyarat ombasagwi vaga adigat, “Ap yi, mondok sek aro,” yiluk, wokninivisogon. 31Anderogo halok, nit avyarat ombasagwi andi vaga Musa wene ako degerogo belagwi ombasagwi? Dek o. Nit avyarat ombasagwi vaga wene andi anye erogo belagwi.
Currently Selected:
Oroma 3: nbq2013
Highlight
Share
Compare
Copy
Want to have your highlights saved across all your devices? Sign up or sign in
