रोमापा 8
8
छे ॱनाङगीन धाम्पे थुक्ङी
1होझ्येरी धा, मास्यीका येशुगी नाङ ॱनेगीनक्याला छेपा फोक्ये मेतालाक। 2घीझ्येरी ॱनाना छे ॱनाङगीन धाम्पे थुक्ङीगी वाङगी, मास्यीका येशुगी थोक्ने, खेक्याला धीक्पा धाङ छीवागी वाङने थारपा जे हो़तालाक। 3होरी ली़गी क्योवा शो़सा क्षो़ठीमगी झ्यी ॱमाथुक्कीनगो, को़न्क्षोकगी राङगी से धीक्पे राङश्यीगी ली़ला धीक्पे ॱमारछो़ झ्युङयेला झाङा जेदी, होदे जेपालाक। धेनी देरे झ्येरी खोङगी धीक्पाला ली़लाराङ छेपा का जेपालाक। 4दे नी, होराङ धीक्पे राङश्यीला तेन्दी मेन्दा हीना धाम्पे थुक्ङीला तेन्दी छोवा क्यागीनक्याई, क्षो़ठीमगी ढाङपो चीगीनगो ताक-ताक झ्यीदास्योक ॱनेरी, को़न्क्षोकगी जेपालाक।
5धीक्पे राङश्यीला तेन्दी छोवा क्यागीनक्याई, धीक्पागी दो़नक्याला साम्लो ताङालाक हीना धाम्पे थुक्ङीला तेन्दी छोवा क्यागीनक्याई, थुक्ङीगी दो़नक्याला साम्लो ताङालाक। 6धा धीक्पे राङश्यीगी ख्यो़री साम्लो वाङ झ्यीदु च्युक्ना, छीवादु ठीयालाक हीना धाम्पे थुक्ङीगी ख्यो़री साम्लो वाङ झ्यीदु च्युक्ना, छेसोक धाङ श्यीदेला ठीयालाक। 7घीझ्येरी ॱनाना धीक्पे राङश्यीला तेन्गीन सेम नी, को़न्क्षोकगी डा हुङालाक। दी को़न्क्षोकगी क्षो़ठीमला ॱमीचीलालाक धेनी चीया ॱमीथुक्वालाक। 8धीक्पे राङश्यीगी नाङ हो़गीनक्याई को़न्क्षोकला थुक घेरु च्युक ॱमीथुक्वालाक।
9धा ॱङोन्ने को़न्क्षोकगी थुक्ङी खेक्याई नाङ श्युक हो़ना, खेक्या धीक्पे राङश्यीगी नाङ मेयोङालाक हीना धाम्पे थुक्ङीगी नाङ हुङालाक। धेनी मास्यीकागी थुक्ङी मेगीनक्या सुवाः खोङबागी मालाक। 10हीना मास्यीका खेक्याई नाङ श्युक हो़ना, धेनी धीक्पागी झ्येरी खेक्याई ली़गो स्यी हो़नाः, ढाङतेनगी झ्येरी खेक्याई सेमगो सो़न्पो हुङालाक। 11धेनी येशुला छीवाने कुसो़न्पो जेगीनगी थुक्ङी खेक्याई नाङ श्युक हो़ना, मास्यीका येशुला छीवाने कुसो़न्पो जेगीनगी खेक्याई नाङ श्युक्कीन, धाम्पे थुक्ङीगी थोक्ने खीकी छीवागी ली़लाः छेसोक ॱनाङगीलाक।
12धा होझ्येरी पी़नक्याओ, होरी धीक्पे राङश्यीला तेन्दी होराङ छोवा क्याये मालाक। 13घीझ्येरी ॱनाना धीक्पे राङश्यीला तेन्दी छोवा क्याना, खेक्या स्यीगीलाक हीना धाम्पे थुक्ङीगी गोने धीक्पे लेगाक्या स्यीरु च्युक्ना, खेक्या सो़न्पो ॱनेगीलाक। 14घीझ्येरी ॱनाना को़न्क्षोकगी थुक्ङीगी गोठी जेजा घीरी, को़न्क्षोकगी से धाङ सेमो लाक। 15याङ जीक्नाङगी नाङ छी़येला, खेक्याला ढेन्योकगी सेम थोप्पा मालाक हीना खेक्याला को़न्क्षोकगी से धाङ सेमो झ्युङयेगी थुक्ङी थोप हो़तालाक। धेनी खोङगी थोक्ने होराङ “आब्बा, याप।” ॱनेरी भो़ली घाङला, 16धाम्पे थुक्ङीगी राङ होरी सेममुला, होराङ को़न्क्षोकगी से धाङ सेमो हीन्गीनगी धेन्पाङ जेदालाक। 17धेनी होराङ से धाङ सेमो हीन्ना, होराङ ग्युज्यीनगोवाः लाक। होराङ को़न्क्षोकगी ग्युज्यीन धाङ मास्यीकामुला ग्युज्यीनगी रोवा लाक। धेनी होराङ मास्यीकामुला दुक्पु ङ्याङना, खोङगी शीजेगोवाः मुला घो़ये राक्कीलाक।
माउपारगी शीजे
18ङी साम्बाला धान्दागी दुङाक्या माउपारगी धी़ला, होराङला ॱङो़न्ये हीन्गीन शीजेमुला दुरना घीया मालाक। 19घीझ्येरी ॱनाना को़पा घीरी को़न्क्षोकगी सेक्या ॱङो़न्येला, ॱमीच्यीकी रेवा क्षे झ्येरी घुक्ती धे हो़तालाक। 20घीझ्येरी ॱनाना को़पाक्या राङगी दो़पाला मेन्दा, हीना होदेला वाङ होकदु जेगीन खोङबागी थुकोङगी, होदेला दो़न मेगीन वाङ होकदु च्युक्पालाक। धेनी को़न्क्षोकगी देरे जेगीनगी रेवा नी, 21को़पा राङगो रुरी डोये हीन्गीन वाङने थारती, को़न्क्षोकगी से धाङ सेमोगी शीजेगी राङवाङ थोप्येगो लाक। 22धान्दा थुक्पे को़पा घीरी केशुकगी शुक च्योक्रे, मुला दुक्पु ङ्याई हो़गीनगो होराङ स्येलालाक। 23धेनी को़पा च्यीगा मेन्दा, होराङ धाम्पे थुक्ङीगी ढेबु फी़ हो़गीनक्याः, को़न्क्षोकगी से धाङ सेमु झ्युङये धाङ होरी ली़गी थारपागी क्षीला रेवा झ्येरी घुक्ती धेताराङ, होराङक्याः नाङ-नाङने ङ्याङी हो़तालाक। 24धा रेवा दी झ्येरीराङ होराङला थारपा थोप्पालाक। हीना ॱमीकगी थोङगीन रेवा नी, रेवा राङ मालाक। ॱमीकगी थोङगीनला सी़ रेवा झ्यीगीलाक से? 25हीना ॱमीकगी ॱमेथोङगीनला होरी रेवा झ्यीना, होदेला होराङ शो़पा झ्येरी घुक्वालाक।
26देरेराङ झ्येरी धाम्पे थुक्ङीगी होराङ क्योवा घाङला, रोक्राम जेदालाक। होराङक्याई ॱमो़लाम घाङगी झ्येरी श्यु घोयेगो, होराङ ॱमेस्येलालाक हीना धाम्पे थुक्ङी राङगी छीकला ॱना ॱमीथुक्कीन, उला होरी क्षीदु श्योवा पुला जेदालाक। 27धेनी होराङक्याई सेमला शीक्कीन, खोङबागी धाम्पे थुक्ङीगी थुकोङगो खेन्दालाक घीझ्येरी ॱनाना धाम्पे थुक्ङीगी को़न्क्षोकगी थुकोङला तेन्दी, धाम्पे मीक्याई क्षीदु श्योवा पुला जेदालाक।
28धेनी को़न्क्षोकला झाम्पा झ्यीगीन धाङ खोङगी थुकोङला तेन्दी, भो़पाक्याई क्षीदु खोङगी दो़न घीरीला शाङा जेदालाक#८:२८ खोङगी दो़न घीरीला शाङा जेदालाक सुङराप रीङगाला “दो़न घीरीगी खुङक्याला शाङा जेदालाक” ॱनेरी ढीक हो़तालाक। ॱनेरी, होराङला स्येये हो़तालाक। 29घीझ्येरी ॱनाना को़न्क्षोकगी राङगी मीक्याला थोक्माने, ङो खेन्दा जेदालाक धेनी खोङगी से, पी़न माङागी नाङने एन्ला, केक्या झ्युङयेगी क्षीदु राङगी मीक्यालाः राङगी से च्योक्रे, झ्युङयेला खोङबागी दामा जेपालाक। 30धेनी खोङगी खुङक्याला दामा जेदी, खुङक्याला राङचारु भो़याः जेपालाक। धेनी खोङगी राङचारु भो़ जेजाक्याला, ढाङपोवाः जेपालाक। धेनी ढाङपो जेजाक्याला राङगी शीजेगोवाः ॱनाङा जेपालाक।
को़न्क्षोकगी झाम्पा
31धा ॱहाना होराङ दो़न देक्याई कोरला घी ॱनाये? को़न्क्षोक होरी छोकला हो़ना, सु होरी ग्यापला लाङ थुक्कीलाक से? 32को़न्क्षोकगी राङगी सेला फाङा माजेदा, होराङ घीरीगी क्षीदु ॱलो़ ताङ जेपालाक। धा देरे हीन्ना खोङबागी होराङला राङगी सेमुला, श्येम्मा दो़न घीरीयाः ॱनाङगीमालाक से? 33को़न्क्षोकगी दामा जेजाक्याला सी़ क्यो़न चुक थुक्कीले? ढाङपो जेगीन नी को़न्क्षोक लाक। 34धा ॱहाना होराङला सी़ ठीम्चो़ झ्यीगीले? सी़या झ्यीगीमालाक। घीझ्येरी ॱनाना मास्यीका येशु नी, होरी क्षीदु ढोङा जेपालाक। धेनी याङ कुसो़न्पो श्याङा जेपालाक धेनी खोङ को़न्क्षोकगी क्षाक ॱयेरु श्युक्वा जेदी, होरी क्षीदु श्योवा पुली हो़तालाक। 35धा मास्यीकागी झाम्पाने होराङला सी़ खा टा थुक्कीले? घाक्वागी याङना काङेगी याङना दुक्ङेलगी याङना मुगेगी याङना घो़न्ये मेगीनगी याङना जीक्टागी याङना स्यीये जीक्टागी, होराङला खा टा थुक्कीलाक से? 36दी कोरला सुङरापला देरे ढीक हो़तालाक,
“खेराङगी क्षीदु हेक्या श्याक्मो ढाङी, स्यीयेगी ङेन्काला हो़तालाक।
हेक्याला स्याक्ये हीन्गीन लुकक्या च्योक्रे चीलालाक।”#सुङगुर ४४:२२
37हीना दे ॱनेछु घीरीगी नाङलाः हेला झाम्पा जेगीनगी थोक्ने, हेला ग्याखा छाङगो थोप हो़तालाक। 38-39घीझ्येरी ॱनाना छीवा याङना छे धेनी नाम्खे भाङछेनक्या याङना श्येम्मा वाङ जीन्खेनक्या धेनी धान्दागी दो़न याङना माउपारगी दो़न धेनी वाङक्या धेनी थोवा याङना ॱमावा याङना को़पा घीरीगी नाङने, घीन्गीया मास्यीका येशुगी नाङ हो़गीन को़न्क्षोकगी झाम्पाने, होराङला खा टा ॱमीथुक्कीलाक ॱनेरी, ङाला यीच्चे तेन्पो हो़क।
Currently Selected:
रोमापा 8: LOY
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
रोमापा 8
8
छे ॱनाङगीन धाम्पे थुक्ङी
1होझ्येरी धा, मास्यीका येशुगी नाङ ॱनेगीनक्याला छेपा फोक्ये मेतालाक। 2घीझ्येरी ॱनाना छे ॱनाङगीन धाम्पे थुक्ङीगी वाङगी, मास्यीका येशुगी थोक्ने, खेक्याला धीक्पा धाङ छीवागी वाङने थारपा जे हो़तालाक। 3होरी ली़गी क्योवा शो़सा क्षो़ठीमगी झ्यी ॱमाथुक्कीनगो, को़न्क्षोकगी राङगी से धीक्पे राङश्यीगी ली़ला धीक्पे ॱमारछो़ झ्युङयेला झाङा जेदी, होदे जेपालाक। धेनी देरे झ्येरी खोङगी धीक्पाला ली़लाराङ छेपा का जेपालाक। 4दे नी, होराङ धीक्पे राङश्यीला तेन्दी मेन्दा हीना धाम्पे थुक्ङीला तेन्दी छोवा क्यागीनक्याई, क्षो़ठीमगी ढाङपो चीगीनगो ताक-ताक झ्यीदास्योक ॱनेरी, को़न्क्षोकगी जेपालाक।
5धीक्पे राङश्यीला तेन्दी छोवा क्यागीनक्याई, धीक्पागी दो़नक्याला साम्लो ताङालाक हीना धाम्पे थुक्ङीला तेन्दी छोवा क्यागीनक्याई, थुक्ङीगी दो़नक्याला साम्लो ताङालाक। 6धा धीक्पे राङश्यीगी ख्यो़री साम्लो वाङ झ्यीदु च्युक्ना, छीवादु ठीयालाक हीना धाम्पे थुक्ङीगी ख्यो़री साम्लो वाङ झ्यीदु च्युक्ना, छेसोक धाङ श्यीदेला ठीयालाक। 7घीझ्येरी ॱनाना धीक्पे राङश्यीला तेन्गीन सेम नी, को़न्क्षोकगी डा हुङालाक। दी को़न्क्षोकगी क्षो़ठीमला ॱमीचीलालाक धेनी चीया ॱमीथुक्वालाक। 8धीक्पे राङश्यीगी नाङ हो़गीनक्याई को़न्क्षोकला थुक घेरु च्युक ॱमीथुक्वालाक।
9धा ॱङोन्ने को़न्क्षोकगी थुक्ङी खेक्याई नाङ श्युक हो़ना, खेक्या धीक्पे राङश्यीगी नाङ मेयोङालाक हीना धाम्पे थुक्ङीगी नाङ हुङालाक। धेनी मास्यीकागी थुक्ङी मेगीनक्या सुवाः खोङबागी मालाक। 10हीना मास्यीका खेक्याई नाङ श्युक हो़ना, धेनी धीक्पागी झ्येरी खेक्याई ली़गो स्यी हो़नाः, ढाङतेनगी झ्येरी खेक्याई सेमगो सो़न्पो हुङालाक। 11धेनी येशुला छीवाने कुसो़न्पो जेगीनगी थुक्ङी खेक्याई नाङ श्युक हो़ना, मास्यीका येशुला छीवाने कुसो़न्पो जेगीनगी खेक्याई नाङ श्युक्कीन, धाम्पे थुक्ङीगी थोक्ने खीकी छीवागी ली़लाः छेसोक ॱनाङगीलाक।
12धा होझ्येरी पी़नक्याओ, होरी धीक्पे राङश्यीला तेन्दी होराङ छोवा क्याये मालाक। 13घीझ्येरी ॱनाना धीक्पे राङश्यीला तेन्दी छोवा क्याना, खेक्या स्यीगीलाक हीना धाम्पे थुक्ङीगी गोने धीक्पे लेगाक्या स्यीरु च्युक्ना, खेक्या सो़न्पो ॱनेगीलाक। 14घीझ्येरी ॱनाना को़न्क्षोकगी थुक्ङीगी गोठी जेजा घीरी, को़न्क्षोकगी से धाङ सेमो लाक। 15याङ जीक्नाङगी नाङ छी़येला, खेक्याला ढेन्योकगी सेम थोप्पा मालाक हीना खेक्याला को़न्क्षोकगी से धाङ सेमो झ्युङयेगी थुक्ङी थोप हो़तालाक। धेनी खोङगी थोक्ने होराङ “आब्बा, याप।” ॱनेरी भो़ली घाङला, 16धाम्पे थुक्ङीगी राङ होरी सेममुला, होराङ को़न्क्षोकगी से धाङ सेमो हीन्गीनगी धेन्पाङ जेदालाक। 17धेनी होराङ से धाङ सेमो हीन्ना, होराङ ग्युज्यीनगोवाः लाक। होराङ को़न्क्षोकगी ग्युज्यीन धाङ मास्यीकामुला ग्युज्यीनगी रोवा लाक। धेनी होराङ मास्यीकामुला दुक्पु ङ्याङना, खोङगी शीजेगोवाः मुला घो़ये राक्कीलाक।
माउपारगी शीजे
18ङी साम्बाला धान्दागी दुङाक्या माउपारगी धी़ला, होराङला ॱङो़न्ये हीन्गीन शीजेमुला दुरना घीया मालाक। 19घीझ्येरी ॱनाना को़पा घीरी को़न्क्षोकगी सेक्या ॱङो़न्येला, ॱमीच्यीकी रेवा क्षे झ्येरी घुक्ती धे हो़तालाक। 20घीझ्येरी ॱनाना को़पाक्या राङगी दो़पाला मेन्दा, हीना होदेला वाङ होकदु जेगीन खोङबागी थुकोङगी, होदेला दो़न मेगीन वाङ होकदु च्युक्पालाक। धेनी को़न्क्षोकगी देरे जेगीनगी रेवा नी, 21को़पा राङगो रुरी डोये हीन्गीन वाङने थारती, को़न्क्षोकगी से धाङ सेमोगी शीजेगी राङवाङ थोप्येगो लाक। 22धान्दा थुक्पे को़पा घीरी केशुकगी शुक च्योक्रे, मुला दुक्पु ङ्याई हो़गीनगो होराङ स्येलालाक। 23धेनी को़पा च्यीगा मेन्दा, होराङ धाम्पे थुक्ङीगी ढेबु फी़ हो़गीनक्याः, को़न्क्षोकगी से धाङ सेमु झ्युङये धाङ होरी ली़गी थारपागी क्षीला रेवा झ्येरी घुक्ती धेताराङ, होराङक्याः नाङ-नाङने ङ्याङी हो़तालाक। 24धा रेवा दी झ्येरीराङ होराङला थारपा थोप्पालाक। हीना ॱमीकगी थोङगीन रेवा नी, रेवा राङ मालाक। ॱमीकगी थोङगीनला सी़ रेवा झ्यीगीलाक से? 25हीना ॱमीकगी ॱमेथोङगीनला होरी रेवा झ्यीना, होदेला होराङ शो़पा झ्येरी घुक्वालाक।
26देरेराङ झ्येरी धाम्पे थुक्ङीगी होराङ क्योवा घाङला, रोक्राम जेदालाक। होराङक्याई ॱमो़लाम घाङगी झ्येरी श्यु घोयेगो, होराङ ॱमेस्येलालाक हीना धाम्पे थुक्ङी राङगी छीकला ॱना ॱमीथुक्कीन, उला होरी क्षीदु श्योवा पुला जेदालाक। 27धेनी होराङक्याई सेमला शीक्कीन, खोङबागी धाम्पे थुक्ङीगी थुकोङगो खेन्दालाक घीझ्येरी ॱनाना धाम्पे थुक्ङीगी को़न्क्षोकगी थुकोङला तेन्दी, धाम्पे मीक्याई क्षीदु श्योवा पुला जेदालाक।
28धेनी को़न्क्षोकला झाम्पा झ्यीगीन धाङ खोङगी थुकोङला तेन्दी, भो़पाक्याई क्षीदु खोङगी दो़न घीरीला शाङा जेदालाक#८:२८ खोङगी दो़न घीरीला शाङा जेदालाक सुङराप रीङगाला “दो़न घीरीगी खुङक्याला शाङा जेदालाक” ॱनेरी ढीक हो़तालाक। ॱनेरी, होराङला स्येये हो़तालाक। 29घीझ्येरी ॱनाना को़न्क्षोकगी राङगी मीक्याला थोक्माने, ङो खेन्दा जेदालाक धेनी खोङगी से, पी़न माङागी नाङने एन्ला, केक्या झ्युङयेगी क्षीदु राङगी मीक्यालाः राङगी से च्योक्रे, झ्युङयेला खोङबागी दामा जेपालाक। 30धेनी खोङगी खुङक्याला दामा जेदी, खुङक्याला राङचारु भो़याः जेपालाक। धेनी खोङगी राङचारु भो़ जेजाक्याला, ढाङपोवाः जेपालाक। धेनी ढाङपो जेजाक्याला राङगी शीजेगोवाः ॱनाङा जेपालाक।
को़न्क्षोकगी झाम्पा
31धा ॱहाना होराङ दो़न देक्याई कोरला घी ॱनाये? को़न्क्षोक होरी छोकला हो़ना, सु होरी ग्यापला लाङ थुक्कीलाक से? 32को़न्क्षोकगी राङगी सेला फाङा माजेदा, होराङ घीरीगी क्षीदु ॱलो़ ताङ जेपालाक। धा देरे हीन्ना खोङबागी होराङला राङगी सेमुला, श्येम्मा दो़न घीरीयाः ॱनाङगीमालाक से? 33को़न्क्षोकगी दामा जेजाक्याला सी़ क्यो़न चुक थुक्कीले? ढाङपो जेगीन नी को़न्क्षोक लाक। 34धा ॱहाना होराङला सी़ ठीम्चो़ झ्यीगीले? सी़या झ्यीगीमालाक। घीझ्येरी ॱनाना मास्यीका येशु नी, होरी क्षीदु ढोङा जेपालाक। धेनी याङ कुसो़न्पो श्याङा जेपालाक धेनी खोङ को़न्क्षोकगी क्षाक ॱयेरु श्युक्वा जेदी, होरी क्षीदु श्योवा पुली हो़तालाक। 35धा मास्यीकागी झाम्पाने होराङला सी़ खा टा थुक्कीले? घाक्वागी याङना काङेगी याङना दुक्ङेलगी याङना मुगेगी याङना घो़न्ये मेगीनगी याङना जीक्टागी याङना स्यीये जीक्टागी, होराङला खा टा थुक्कीलाक से? 36दी कोरला सुङरापला देरे ढीक हो़तालाक,
“खेराङगी क्षीदु हेक्या श्याक्मो ढाङी, स्यीयेगी ङेन्काला हो़तालाक।
हेक्याला स्याक्ये हीन्गीन लुकक्या च्योक्रे चीलालाक।”#सुङगुर ४४:२२
37हीना दे ॱनेछु घीरीगी नाङलाः हेला झाम्पा जेगीनगी थोक्ने, हेला ग्याखा छाङगो थोप हो़तालाक। 38-39घीझ्येरी ॱनाना छीवा याङना छे धेनी नाम्खे भाङछेनक्या याङना श्येम्मा वाङ जीन्खेनक्या धेनी धान्दागी दो़न याङना माउपारगी दो़न धेनी वाङक्या धेनी थोवा याङना ॱमावा याङना को़पा घीरीगी नाङने, घीन्गीया मास्यीका येशुगी नाङ हो़गीन को़न्क्षोकगी झाम्पाने, होराङला खा टा ॱमीथुक्कीलाक ॱनेरी, ङाला यीच्चे तेन्पो हो़क।
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society