Maruk 3
3
Yéesu násonten an han gañenool gucehe
(Máca 12.9-14 ; Lúk 6.6-11)
1Yéesu nanogen benen nꞌfúrehoorum faafu fara gawaare furim Atúuha. Mbaj dó amaañen acee han gañenool gucehe. 2Ñeer Efarisiit yaayu gan dó mee ngon neñeer teer Yéesu bu gásontenool nꞌfunak faafu fammee fara fulako, mimbil gújuh gújogumool nu yo. 3Yéesu narok amaañen aahu han gañenool gucet mee : « Ujóol uyiho taahu nꞌetut bugan gaagu peepe. » 4Púr to narogiil : « Fuyuhoum faafu waa nfuroge mara funak fara fulako : ekaan wajajak teer wajagut ? Gapagen an teer ekahool nacet ? » Ngúnif yemm. 5Ñeer Yéesu nateb añeeriil máñigene. Búyegehool mbútaañi mara muhank úyegehiil, narok amaañen aahu : « Uraahen gañeni ! » Naraahen go, ngukolo to bújooŋoor. 6Efarisiit yaayu ngúpur bu tíyaŋ, ngusaboor to bayaas mꞌbugara gayooŋ gara Herod be émir min guñume ekaan ngumuk Yéesu.
Gayooŋ gáamak ngutook Yéesu ban ammee
7Púr to, Yéesu nꞌulagenaool nguñago bu bo nꞌfal fara Gálile. Gayooŋ gáamak ngutoogool bo gápurulo : Gálile, Yúde, 8Yéruusalem, Idúme, sísuk saasu sammee nꞌgaagu gahaja gara eraal yara Suruden, nꞌuhaja waawu wara Tiir son Sidoŋ. Gujaalojow bu nu ho mara gujanjam wan akaan mee peepe. 9Ñeer Yéesu narok ulagenaool guŋesulool jisaana bu nu ho, jambil gayooŋ gaagu gutufulool. 10Nemma násontene bugan gamemmeeŋ ngukolo, úsonta waawu peepe nak gutey guloh nu ho min gugorool. 11Bugan gan siseytaane sinogen mee nan nja guñow mee Yéesu, nsikaaniil nguyah gújuul bújooŋoorool ngukaaw máamak gurok : « Aw ommee Aleeh Atúuha. » 12Bare ho nja apang so jambil símeeyulool.
Yéesu nacaap ulagenaool
13Púr to Yéesu najiŋ nꞌemontaañ, nawook gan acamen mee gulagenool, ngujiŋ gutoogool dó. 14Nacaap mꞌbugo goono guñen nꞌgúruba gabil mee gáani epootaarool, ngulagenool banooban. Naboñiil nak gujow gawaare, 15naseniil sembe sara ekam siseytaane. 16Gan acaap mee, ujaiil uwee : Simoŋ, ho nasen mee gajow gara Piyeer, 17Saak nꞌatiool Saŋ gammee guleeh Sébede, bugo nasal mee arogiil Boanerugees, yo yommee « guleeh gapapamboora », 18Andere, Fílip, Bateleme, Máca, Tomas, Saak aleeh Alife, Taade, Simoŋ han guroge mee áriikena mofool, 19nꞌYudas Isikariot, habil mee ecumb Yéesu.
Yéesu nápajul mara siseytaane saasu
(Máca 12.22-32 ; Lúk 11.14-23 ; 12.10)
20Púr to, ngúbaañul bu nꞌyaŋ yaayu. Bandiŋ gayooŋ nguhomenoor to jaram Yéesu bugo nꞌulagenaool gubajout bu fúcaho. 21Nan bugara fiilool gujam yo mee, ngújool be eŋarool nꞌsembe, mara nꞌgapinooriil águuhooguuhoor.
22Upájula fuyuhoum Atúuha gápurulo Yéruusalem ngurok : « Belisebul, ammee anafaan siseytaane saasu, an nu ho. Ho asen mee Yéesu sembe sara ekam siseytaane. » 23Ñeer Yéesu nawooguliil, nalobiil nꞌfuguub arok : « Buu Seetaane ájuhe akam Seetaane ? 24Eéni bugan gulako nꞌjáyiih nak gutiigenoor, jáyiih jaaju bu gayiisoor. 25Ban may éeni bugan gulako nꞌyaŋ nak gutiigenoor, yaŋ yaayu bu gayiisoor. 26Eéni may Seetaane ayiho bu gatiigenooro min ámuy bo noonool, añumut gapiyo ; yoola efaagoe.
27An ájuhut anogen nꞌyaŋ yara amaañen hababaj sembe nákuet fubajool, ho bamundumut ajogool akok. No nabil mee éjuh ákuet waafool peepe.
28Iroguulee, maregen síjunube saasu peepe san bugan gukaane mee, Atúuha ájuhe abonkehiil so, son may ujel waawu wan gujeleool mee. 29Bare an ajel mee Búyeget Baset mee, Atúuha mat amus abonkehool. Ababaj júnube yabiloot emus efaago. » 30Yéesu nalobiilob mee mara nguroge eseytaane yon nu ho.
Jaw Yéesu bugo nꞌgutii Yéesu
(Máca 12.46-50 ; Lúk 8.19-21)
31Nan jaw Yéesu bugo nꞌgutii Yéesu gútiiŋulo mee, nguyiho bo tíyaŋ min guboñ guwoogulool. 32Tootook gayooŋ gaagu min gulakoe gugongenool. Acee narogool : « Jaayi, guti'i nꞌgúliini ubugu tíyaŋ. Aw ngucamene eñow. » 33Yéesu narogool : « Ay ammee jaayom ? Búgey gommee gutiom ? » 34Nayiho, nañeer bugan gaagu galako mee gugongenool. Narok : « Ubuge gommee jaayom nꞌgutiom. 35Anooan akaan mee wan Atúuha acamen mee, ho ammee atiom, áliinom, nꞌjaayom. »
Currently Selected:
Maruk 3: gsl
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
