१ कोरिन्थि 15
15
येसु स्यानाभाङ् हिङ्गिलिक लेक्साना
1आफुआनुन्छा आनाआनुन्छाचि, हाकु का न्निङ्दा खेम्मेॽनेनिन्हा नुसालागा उतुम्बे फेरि चा लुमेॽनेनिन, ङ्खा नुसाला न्निङ्दा बिस्वास चोगुम्गा न्हाङ् न्ना बिस्वासबेॽमाङ् न्निङ्दा लाचोगिनेसिगा॥ 2का खेम्मेॽनेनिन्हा ङ्खा नुसालाबे न्निङ्दा डिगो वाइगाभोङ् ङ्खाङा न्निङ्दा हिङ्मेतेनिसिॽवाघा, मानुङ्गो न्निङ्गा बिस्वास ब्यार्था लेङ्मेॽना॥
3इजाङ्बाङ्निङ् का तोक्तुङ्हा खा मुक्खे चेॽयामाङ् का न्निङ्दा पिॽनेनिन॥ ङ्खा मुक्खे चेॽया खा ओम, धार्मासाप्लाङा कायाना लोॽवा खिरिस्ट एङ्गा पाप छेमा पिॽमागा लागि स्या॥#यासाइया ५३:५-१२ 4उङ् ङ्हुम्दु, न्हाङा धार्मासाप्लाबे छेप्ताहा लोॽवा सुम्ना लेनबे उङ् फेरि निङ्वाफुमाङा हिङ्गिलिक लेङ्मेतु॥#छेम १६:८-१०; मात्ति १२:४०; सेगुम्पाक २:२४-३२ 5उङ् पात्तुरुसकाबे#१५:५ गिरिकपे “केफास” छेप्तामाना॥ ना उका हेकोना उनिङ् साया॥ ओता न्हाङ् हेक्साङ् एहिच सेगुम्पाकचिगाबे ओता॥#मात्ति २८:१६-१७; मार्कुस १६:१४; लुका २४:३४,३६; युहान्ना २०:१९ 6न्हाङ् हेक्साङ् फेरि उङ् बिस्वास चोक्खुबा फा होम्बोक हाक्निङ् प्याक फुनुन्छा नानुन्छाचिगाबे इमाङा ओता॥ उङ् निखुबाचि माध्येबे इखिङ् न्स्याख्याहोङ्चा प्याक लोॽवा गो हाकुचा ङ्हिङानेसा॥ 7न्हाङा येसु याकुबकाबे ओता॥ न्हाङ् हेक्साङ् घाक सेगुम्पाकचिगाबे ओता॥
8घाक हाक्निङ् हेक्साङ् काबे चा उङ् ओता॥#सेगुम्पाक ९:३-६ का च्हेन बेला मेन्दाले वायाना पिछा लोॽवाङान॥ 9इजाङ्बाङ्निङ् सेगुम्पाकचिबे घाक हाक्निङ् मिना कामाङ् ओम्ङान॥ का सेगुम्पाक लुॽमा चा न्थेन्सिमेॽङान्ना॥ इजाङ्बाङ्निङ् का निङ्वाफुमागा छुम्वाङ्बेॽहा बिस्वासिचि इब्बे-इब्बे तुखि पिक्सुङ्चिङ्॥#सेगुम्पाक ८:३ 10ङ्खोङ्चा का हाकु इमिन लेक्सामाङ् न्ना खिरिस्टका आनुगाराहाङामाङ् ओम॥ उङा का चोगाङ्ना आनुगाराहा बित्थागा न्लेक्सान॥ इजाङ्बाङ्निङ् का हेकोहा सेगुम्पाकचि हाक्निङ् प्याक तुखि चोगामाङ्॥ ङ्खोङ्चा ङ्खा का आफाइङा मेन्ना, ङ्खाॽनिङ्गो कानुङ् वाखुबा निङ्वाफुमागा आनुगाराहाङा ओम॥ 11न्हाङामाङ् का होङ्चा, हेकोहा सेगुम्पाकचिङा होङ्चा, कानिङ् खा नुसालामाङ् पार्चार चोगुम्ङा॥ न्हाङ् न्निङ्दा बिस्वास चोगुम्घा चा खामाङ् ओम॥
सिमाहोङ् फेरि हिङ्लुङ् तोक्माना चेॽया
12खिरिस्ट येसु स्यानाभाङ् हिङ्गिलिक लेङ्मेतुनाभोङ् कानिङ् पार्चार चोग्वाम्ङाहाभोङ्, न्निङ्दा माध्येबे इखिङ्ङा च्हेन न्स्याहा याॽमि हिङ्गिलिक न्लेङ्मेनिन्हाभोङ् इमिन कामा यासिॽवाघा? 13न्स्याहाचि हिङ्गिलिक न्लेङ्मेनिन्हाभोङ् गो निङ्वाफुमाङा खिरिस्ट चा हिङ्गिलिक लेङ्मेतुना मेन्ना॥ 14जेप्पा खिरिस्ट हिङ्गिलिक लेङ्मेतुना मेन्नाभोङ् गो, कानिङ् पार्चार चोगुम्ङाहा नुङ् न्निङ्दा बिस्वास चोगुम्घा चा ब्यार्था लेङ्मेहा॥ 15ना हाक्निङ्चा कानिङ् निङ्वाफुमागा उतुम्बे लेम्चाखुबा ठारेचोगिॽवाङ्हा॥ इजाङ्बाङ्निङ् निङ्वाफुमाङा खिरिस्ट हिङ्गिलिक लेङ्मेतुनाभोङ् कानिङ्माङ् निङ्वाफुमागा उतुम्बे गाबाहि पिक्सुम्चिम्ङा, ङ्खाॽनिङ्गो जेप्पा न्स्याहाचि हिङ्गिलिक मेन्लेङ्माहा सायानिङ्बि निङ्वाफुमाङा खिरिस्ट हिङ्गिलिक न्लेङ्मेतुन्बि॥ 16न्स्याहाचि हिङ्गिलिक न्लेङ्मेनिन्हाभोङ् गो निङ्वाफुमाङा खिरिस्ट चा स्यानाभाङ् हिङ्गिलिक न्लेङ्मेतुन्ना॥ 17खिरिस्ट हिङ्गिलिक लेङ्मेतुना मेन्नाभोङ् न्निङ्गा बिस्वास ब्यार्थाना, न्हाङ् न्निङ्दा हाकुचा न्निङ्गा पापपेॽमाङ् वेॽनेतिघा॥ 18खिङ्से मेन्ना खिरिस्टपे बिस्वास न्जोगुहोङ् न्स्याहाचि चा घाक नास न्लेङ्मेहा॥ 19कानिङ् हिङिनुङ् सोम्मागा लागि से खिरिस्टपे एङ्गा आस वेॽनाभोङ् गो कानिङ् घाक याॽमिचि हाक्निङ् लुङ्मा तुक्तुक्हासिन॥
20ङ्खाॽनिङ्गो खिरिस्ट न्स्याहाचि माध्येबे घाक हाक्निङ् ओन्दाङ् हिङ्गिलिक लेङ्मेतुना चेॽया जेप्पा ओम, खाॽला निङ्वाफुमाङा न्स्याहाचि हिङ्गिलिक लेङ्मेत्वाचिहा बाङ्ना चेॽयागा पार्मान कानिङ् पियामाहा॥ 21इजाङ्बाङ्निङ् एको याॽमिङा गार्दा घाक सिमा पोराचोगा, ङ्खाॽलामाङ् एको याॽमिङा गार्दा न्स्याहाचि चा हिङ्गिलिक न्लेङ्मेहा॥ 22इजाङ्बाङ्निङ् इमिन आदामबे घाक याॽमिचि न्सिमे, ङ्खाॽलामाङ् खिरिस्टपे घाक फेरि हिङ्गिलिक न्लेङ्मेहा॥ 23ङ्खाॽनिङ्गो कानिङ् घाकङा एङ्गा पालो कुमाना॥ खिरिस्ट घाक हाक्निङ् ओन्दाङ् हिङ्गिलिक लेक्सा, हाकु खिरिस्ट फेरि तामेॽनिङ् उङ्बे बिस्वास चोक्खुबाचि हिङ्गिलिक न्लेङ्मेहा॥ 24न्हाङ् कायुङ्लेन मेम्मेॽना॥ ङ्खिङ्बेला येसुङा घाक सासान चोक्खुबाचि, चोक्तोक नुङ् साक्ति वाखुबाचि नास चोग्वाचिहोङ् उका घाक राज्या निङ्वाफुमा पा जिम्मा पिवा॥ 25इजाङ्बाङ्निङ् खिरिस्टङा उका घाक सात्तुरचि हेच्वाचिहोङ् उलाङ्ङा मेम्बाॽले सोम्मा खिरिस्टङा राज्या चोग्वाहा॥#छेम ११०:१ 26घाक हाक्निङ् हेक्साङ् नास चोक्माना सात्तुर च्हेन सिमाना चेॽयामाङ् ओम, 27इजाङ्बाङ्निङ् धार्मासाप्लाबे खाॽला छेप्तामा, “निङ्वाफुमाङा उङ् घाक थोक उलाङ्ङा पाॽमेतुक्सुहा॥”#छेम ८:६ ङ्खाॽनिङ्गो “घाक थोक” बाङ्ना निङ्वाफुमा चा उका तायेनबे आमेॽना बाङ्ना गो मेन्ना, इजाङ्बाङ्निङ् निङ्वाफुमाङा घाक चेॽया खिरिस्टका तायेनबे युक्सुबिहा ओम॥ 28घाक चेॽया खिरिस्टका तायेनबे लेङ्दिमेहोङ् खिरिस्ट आफाइ च्हेन घाक चेॽया उका तायेनबे चोङ्बिखुबा निङ्वाफुमागा तायेनबे वामे, न्हाङा निङ्वाफुमाङा घाक छोङ्बे राज्या चोग्वाहा॥
29फेरि हिङ्गिलिक न्लेङ्मेनिन्हाभोङ् सिखुबाचिगा लागि बाप्तिस्मा लियाचोक्खुबा याॽमिचि इहा फाइदा न्लेक्साहा? न्स्याहाचि हिङ्गिलिक न्लेङ्मेनिन्हाभोङ् इजाङ् ङ्खाचि बाप्तिस्मा म्बियाहा? 30न्हाङ् इजाङ् कानिङ् च्हेन दाफे-दाफे आप्ठेरोबे आन्नुङ्माहा? 31आफुआनुन्छा आनाआनुन्छाचि, न्निङ्दा हाङ्बा येसु खिरिस्टपे वेतिघाङा, का आनाभुक माडा चोक्साङ् “का लेन-लेन सिमा त्यारिङाना” भोङ् कामा यामेङ्ना॥ 32याॽमिगा साला लेम्माहाभोङ्, एफिसास साहारबे आका बिरुद्दाबे पोक्खुबा पुङ्दा पोसु लोॽवाहा याॽमिचिनुङ् चुङाङ्ना चेॽयाङा का इहा फाइदा लेक्साङ्ना? न्स्याहा याॽमिचि निङ्वाफुमाङा हिङ्गिलिक न्लेङ्मेत्वान्चिन्हाभोङ् गो याॽमिचिङा ङ्गायाहा लोॽवा “कानिङ् चाम, उङुम, मोजमोज्जो चोगि इजाङ्बाङ्निङ् वान्दिक्ङा गो सिइवा॥”#यासाइया २२:१३
33म्फाप्सास्यानिन, उचुन्ना याॽमि चा इसिॽहा काम्निभाकचिनुङ् लामाभोङ् खोङ्दिमेॽना॥ 34होसपे तायानि, हाकु नाहाङ्तो पाप न्जोगानुम्निन॥ इजाङ्बाङ्निङ् इखिङ्ङा गो निङ्वाफुमा चिनायि न्दोक्तुक्सुनिन॥ न्निङ्दा ङोन्सिॽमाबे आमेॽमागा खा चेॽया लुॽनेनिन्हा ओम॥
हिङ्गिलिक लेक्साना सालुङ्
35कोइङा ङ्गा लोप्पि, “न्स्याहाचि फेरि इमिन हिङ्गिलिक न्लेङ्मेहा, न्हाङ् हिङ्गिलिक न्लेङ्मेॽनिङ् ङ्खाचिगा सालुङ् इमिन्हा न्सामेहा?” 36इमिन्हा मुर्खा याॽमिचि! न्निङ्दा याङ्लि ह्वेत्वाम्गानिङ् ङ्खा याङ्लि मेन्सिले म्बोङ्मेन्हा॥ 37न्निङ्दा गाउ कि हेकोहा इहाचा चाचिॽयागा याङ्लि ह्येत्वाम्गानिङ् याङ्लि से ह्वेत्वाम्गा, पुसाहा उथाप को ङ्ह्येत्वाम्गान॥ 38निङ्वाफुमाङा ङ्खा याङ्लि उङा मितुहा लोॽवा उथाप लेङ्मेत्वा॥ उङा घाक याङ्लि थेन्सिॽमाहा उथाप पिवाचि॥ 39घाक्का सालुङ् एको खाले न्सामेनिन्हा॥ याॽमिगा सालुङ् एक खाल्गा, पोसुचिगा हेकोहा खाल्गा, न्वाकुच्याकचिगा हेकोहा खाल्गा न्हाङ् नासाचिगा हेकोहा खाल्गा न्सामे॥
40ताङ्खेङ्बेॽहा नाम, ला, नुङ् चोक्चोकिचिगा हेकोहा खाले चाम्काचोक्खुबा रुप सामे, न्हाङ् ताम्दाङ्फुमाबेॽहा याॽमिचि, पोसुचि नुङ् न्वाकुच्याकचिगा हेकोहा खाल्गा सालुङ् न्सामे, ङ्खाॽनिङ्गो ताङ्खेङ्बेॽहा नुङ् ताम्दाङ्फुमाबेॽहा थोकका स्वारुप चा खाले-खाले न्सामेहा॥ 41नाम, ला नुङ् चोक्चोकिगा जोति खाले-खाले सामे॥ चोक्चोकिचिगा चा जोति खाले-खाले सामे॥ 42न्स्याहाचि हिङ्गिलिक न्लेङ्मेॽनिङ्चा खाॽला लेङ्मेहा॥ ना सालुङ् सिमे न्हाङ् हुम्मेहोङ् किङ्खेमे, ङ्खाॽनिङ्गो हिङ्गिलिक लेक्साना सालुङ् हेॽनिङ्चा नास न्लेङ्मेन्ना॥ 43हुम्मेॽनिङ् एङ्गा सालुङ् इसिॽना नुङ् इहाचा चोक्मा मेयाखुबा सामे, ङ्खाॽनिङ्गो फेरि हिङ्गिलिक लेङ्मेॽनिङ् उचुन्माचेक्ना नुङ् साक्तिसालि लेङ्गेमेॽना॥ 44हुम्मेॽनिङ् ना सा नुङ् सेङ्ख्वाक्का सालुङ् हुम्मे, ङ्खाॽनिङ्गो हिङ्गिलिक लेङ्मेॽनिङ् माहिमित सालुङ् लेङ्मेॽना॥ सा नुङ् सेङ्ख्वाक्का सालुङ् वान्नेॽना लोॽवा वालोक्का लागि थेन्सिखुबा माहिमित सालुङ् चा वामेॽना॥ 45न्हाङामाङ् धार्मासाप्लाबे खाॽला छेप्तामा, “इम्ना याॽमि आदाम गो हिङ्गिलिक्ना याॽमि लेक्सा॥”#उथुक २:७ ङ्खाॽनिङ्गो हेक्साङ्ना आदाम च्हेन हिङ्लुङ् पिखुबा आत्मा लेक्सा॥ 46आत्मिक च्हेन इम्ना मेन्ना, ङ्खाॽनिङ्गो ना सा नुङ् सेङ्ख्वाक्का सालुङ् ओन्दाङ् ताया, न्हाङा से आत्मिक सालुङ् ताया॥ 47इम्ना आदाम ताम्दाङ्फुमाबेॽहा खामभाङ् चोगामासा, ङ्खाॽनिङ्गो हेक्साङ्ना आदाम वालोकभाङ् ताया॥ 48ताम्दाङ्फुमाबेॽहा घाक याॽमिचिगा सालुङ् खामभाङ् न्जोगाहा लोॽवा न्सामेहा, ङ्खाॽनिङ्गो वालोकपेॽहा घाक याॽमिचिगा सालुङ् च्हेन वालोकपाहाङ् तायाना याॽमिगा लोॽवाहा न्सामेहा॥ 49कानिङ् लोप खामभाङ् चोगाना याॽमि लोॽवासिन॥ ङ्खाॽलामाङ् वान्दिक कानिङ् वालोकपेॽना याॽमि लोॽवा लेक्सिॽवाहा॥
50आफुआनुन्छा आनाआनुन्छाचि, का कामा योगाङ्ना च्हेन ना कायुङ्लेनबेॽना सालुङ्ङा निङ्वाफुमागा राज्याबे उमाना चोक्तोक न्दोक्त्वान्ना॥ किङ्खेखुबा सालुङ्ङा नास मेलेङ्माना चोक्तोक तोक्मा ङ्यास्वान्ना॥ 51खेप्सानुम, निङ्वाफुमाङा चुमुक्साना एको चेॽया का लुमेॽनेनिन्हा, कानिङ् घाक न्सिइवान्हा, ङ्खाॽनिङ्गो कानिङ् हेकोहा लेक्सिॽवाहा,#१ थेस्लोनिकि ४:१५-१७ 52एक्छिनङा, मिक सिम्मिक्पे, तुराहिगा आखेरि सेम्लाबे, इजाङ्बाङ्निङ् तुराहि कामे, न्हाङ् निङ्वाफुमाङा न्स्याहाचि हेॽनिङ्चा मेन्सिमानुङ्गा हिङ्गिलिक लेङ्मेत्वाचिहा, न्हाङ् कानिङ् च्हेन घाक हेकोहा लेक्सिॽवाहा॥ 53इजाङ्बाङ्निङ् ना किङ्खेखुबा सालुङ् हेॽनिङ्चा नास मेलेखुबा नुङ् सिङ्खेखुबा सालुङ् हेॽनिङ्चा मेन्सिखुबाबे बाद्ले चोक्माइ पोर्छो॥ 54जोबो किङ्खेखुबा सालुङ् नास मेलेङ्खुबा न्लेङ्मे न्हाङ् सिङ्खेखुबा हेॽनिङ्चा मेन्सिखुबा न्लेङ्मे, न्हाङा धार्मासाप्लाबे छेप्ताहा खा चेॽया पुरा लेङ्मेहा, “सिमाना चेॽया हेचायामाना॥”#यासाइया २५:८
55“ओ सिमाना चेॽया, न्दा हेॽनायि हेचायाङ्गाना?
ओ सिमाना चेॽया, ङ्गा तुखि पिॽमाना साक्ति हेॽनायि?”#होसे १३:१४
56सिमाना चेॽयागा तुखि पिॽमाना साक्ति पाप ओम, पापका साक्तिमाङ् ब्यावास्था ओम॥ 57ङ्खाॽनिङ्गो निङ्वाफुमा नुनिङ्वा लेङ्नि, उङा कानिङ् एङ्गा हाङ्बा येसु खिरिस्टपाहाङ् एङ्गा पाप नुङ् सिमाना चेॽया हेन्चामाना साक्ति पिमेहा॥
58न्हाङामाङ् का आलुङ्मा तुक्नेनिन्हा आफुआनुन्छा आनाआनुन्छाचि, चात्तु नुङ् डिगो लेक्सामासानि॥ हाङ्बागा कामबे साधाइ निङ्वा पिम्घोङ् लाचोगामासानि, इजाङ्बाङ्निङ् हाङ्बागा लागि चोगिघा तुखि खेरा ङ्खेमेन्हा बाङ्ना चेॽया न्निङ्दा था वान्ने॥
Currently Selected:
१ कोरिन्थि 15: YAKH
Highlight
Copy
Compare
Share
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
