Vafiripi Manghwiniro
Manghwiniro
Firipi rayiva dhoropa ro Makedhoniya, iyo Pauri kwaakachumaira vhangeri pa hwendo wochipiri wo mushando (Zvak. 16:11-40). Ndikwo kwakatanga mbungano yo vakristu mu Eropa. Pauri waingwarira no kurangarija nguva jese vakristu vo Firipi, unotara echida kuvabonga ngo zvipo zvovakayita zvakaguma kuguniya, mu Roma. Tshamba iyi zvingayita kuti yakatahwa pakutanga kwo makore wo 60 d.C.
Mupostori unongwaja chiara cho Firipi kuti chigwinye no kusengerera (1:27-30; 4:1-3) no kutumira masoko ( 2:19-30).
Waizvitatija pachake kuyita chivonero chakanaka muguniya, asikaperi simba asi waijijisa vhangeri (1:2-26). Pamuchungamijo yake unovonisa hushamwari no chidisiso chikuru cho kuhwirirazve kosongana no vakristu (1:1-11; 2:19, 24; 4:1). Unotatija kudakara kwake (1:3-5) asikaperi simba ngo ndava yo zvijijiso zvimweni zvakajijiswa mu chiara (1:15-17; 2:21; 3:2,18). Unovatatija Jesu Kristu kuyita chivonero cho gwinyiso, kudari ngo nduyo yaidikana kuzivikanwa ngo vaKristu (2:5-11). Iye ndiye Mwana wa Mwari, pikija mu huMwari hwake, wakajiita mundhu no kutendera kufa pa muchinjiko.
Kristu ndi Mwari na Mambo, wakajiita mundhu no mushandiri wo vandhu. Wakatatija njira yo kujininipisa no kujiramba. Kujiramba ukwo ndiko kunotatija kuzvipira no kujininipisa no kufa kunotyisa pa muchinjiko. Sure kwo kumuka kwo vakafa, Mwari Baba vakamupa mbiriko yo uMambo.
Asi Kristu unovoneka kupinda izvi: Kudari ngo chivonero chokupona kwo vakristu, ukwo vakristu vanodikana kuti vadakarire no kuejerera (2:5).
Kupona kwo chiKristu kwakadari ngo izvi, kufamba wakagwinya kuenda mberi, no kusiya matambujiko no kuregera kupinimija zvokare (3:12-14). Pauri anovereketa ngo kudakara kwake ngo ndava yo simba no kujikisa kuziva zva Kristu nokuva no mukana wo kuzivisazve vamweni, pikija mukuneseka, mukurembejeka no mukutambujika no mukupona (1:4,12-19; 2:17-18; 4:4,11-13). Kudakara uku, kunopa kuna mupostori, kugonda, mukufamba, ngokuti unoziva kuti kumagumo kuna kuviihwa (3:14). Tshamba iyi inogwinyiswa kuti yakatahwa ndi Pauri.
Tshamba iyi ina urongwa wakadari:
1. Muchungamijo no mukumbiro ku vaFiripi (1:1-11)
2. Kupona muna Kristu (1:12-30)
3. Kristu ndiye chitevejero chedu (2:1-18)
4. Pauri unotuma vadoni vake (2:19-30)
5. Kungwajwa ngo zvijijiso zvinoparajana no vhangeri (3:1—4:1 )
6. Kungwaja ngo zvakawanda (4:2-9)
7. Kubongesera no muchungamijo (4:1-23)
Currently Selected:
Vafiripi Manghwiniro: CINDAU NT
Highlight
Share
Copy
Want to have your highlights saved across all your devices? Sign up or sign in
Novo Testamento Cindau © Bible Society of Mozambique, 2023.