Pin'ilʋg 49
49
Jakob niŋ o biis bareka
1Ka Jakob da buol o biis la ka yɛli ba ye la'asimi na ka m yɛli ya yanamɛ na ti an si'em saŋa linɛ kenna la.
2Jakob biisɛ, la'asimi na ka kɛlisi;
kɛlisimini ya ba' Israel, pian'ad!
3Reuben, fʋnɛ aan m bikpɛɛm,
fʋnɛ aan m kpi'euŋ nɛ onɛ ka m pɔnsi du'a.
Fʋ anɛ onɛ mɔr girima nɛ paŋ.
4Fʋ pʋ gban'adi fʋ mɛŋ sʋ'ʋŋa
ka nwɛnɛ ku'okanɛ yɛŋim nɛ.
Fʋ gbɛn nɛ mam pu'a san'ami m gadʋg.
Linzug fʋ kʋ lɛn an girima sɔba.
5Simeon nɛ Levi anɛ mabiis nɛ taaba,
ba lɛɛ mɔri ba zaba la'adi tʋ'ʋsid nidib.
6M kʋ zaŋi m nu'ugʋ kpɛn'ɛsi ba yɛla nii.
M mɛ kʋ la'as nɛ baa,
bɔzugɔ ba sʋnya da duoe ya ka ba kʋ nidib,
ka kɛns lɔlis gada ka li ka' gbinnɛ.
7M nɔpɔɔr bɛɛ ba zug, ba sʋnya zabid hali ka pʋ ya'asid duor la zug.
Ba sʋnkanɛ ɛɛnti duoe ka ba bɔɔd ninkʋʋsim la.
M na widigi ba Jakob buudi ni bas
ka widigi ba yaas Israel buudi la ni.
8“Juda, fʋ ba'abiis la na wɔ'ɔgif,
ba na vanbini fʋ tuon fʋn na nyaŋidi fʋ dataas la zug.
9 #
Kal 24:9; Nie 5:5 Juda, fʋ anɛ gbigimbil
onɛ kʋʋdi o ni'im ka lɛbid o gbɛɛnsigin.
Fʋ anɛ ninzɔtir wʋʋ gbigim kʋdig nɛ
ka sɔ' kʋ daami fɔ.
10Na'am dansaar kʋ maligin yi Juda nu'ugin,
bɛɛ na'am zan'an la yii fʋ san'anɛ,
hali ka onɛ sʋ'oe na'am la ti kena
ka tɛɛns wʋsa na siak o nɔɔr.
11O na nɔk o bʋŋʋ lɔ vain tiig,
ka nɔk o bʋŋbili lɔ tikanɛ willi wal pamm.
Daam na bug wʋʋ ku'om nɛ ka o mɔri pied fuud,
tiwala daam na buk wʋʋ ku'om nɛ.
12Fʋ nini na mu'oe gaad daam,
ka fʋ nyina pɛligi gaad bin'isim.
13Zebulun, fʋ na bɛ nɛ ku'om nɔɔrin
ka tʋm anrima tʋʋma.
Ka fʋ teŋ titɔndig na yaligi
keŋ hali paae Sidon teŋin sa.
14Isaka, fʋ nwɛnɛ bʋŋ kanɛ mɔr paŋ nɛ,
fʋ na tʋm ka pʋ gɛɛnda.
15Fʋ ya'a nyɛ ka fʋ vʋ'ʋsʋm zin'ig la an sʋm
ka teŋ la mɔr kʋ'ʋlʋm pamm tisif,
fʋ na basi fʋ mɛŋi tis tʋʋma
ka ba kɛ ka fʋ lieb yammʋgʋ tʋm tʋʋm kpi'ema.
16Dan, fʋ anɛ onɛ na kati fʋ nidib la saria nɛ sida.
Fʋ dɔɔg nidib na zem wʋʋ Israel dɔɔg wʋsa an si'em la.
17Fʋ na nwɛnɛ waafʋ dig suorin,
ka na dum wief nɔbir,
ka kɛ ka onɛ ban'ad o la lɛb nya'aŋi lu.
18“M Zugsɔba, mam gu'usidnɛ bɔɔdi fʋ faangir la.
19“Gad, nidib bɛdegʋ na zabi nyaŋif,
amaa fʋn mɛ na tuligi zab nɛ ba wʋsa.
20Aser, fʋ na mɔr disʋma
ka na tis na'ab la dikanɛ sʋm nɛ o.
21Naftali, fʋ na nwɛnɛ walig kanɛ mɔr yɔlisim,
ka du'ad bivɛnla hali.
22Josef, fʋ na nwɛnɛ tikanɛ
bɛ ku'om nɔɔrin nɛ,
ka wan walsʋma
ka zaŋguom na gu' fʋ lɛbis.
23Fʋ dataas zabid nɛf nɛ sʋnpɛɛn,
ka dɔllif nɛ tiraad nɛ piema.
24Amaa fʋ kpɛn zi'enɛ kiŋ-kiŋ nɛ fʋ tiraug
ka tʋ'ʋsidi zabidi ba nyaŋid,
ka li anɛ Jakob Wina'am la zug,
onɛ aan fʋ Kɔnbkem
onɛ an Israel Tampiing la.
25Fʋ saamnam Wina'am la na sʋ'ʋŋif,
Wina'am Onɛ Galis la na niŋi fʋ zug bareka.
O na tisif albareka linɛ an saa
nɛ teŋin albareka linɛ an ma'asim nɛ kʋ'ʋlʋm,
albareka linɛ an du'am nɛ biis nɛ bʋnkɔnbid bɛdegʋ.
26Ɛɛn, fʋ saam albareka zu'oe gaad zʋʋd linɛ yit zuoya
nɛ kʋkʋna banɛ da dɛŋin bɛ kʋdimin sa la ni.
Albareka nwa' wʋsa na bɛ Josef zugin,
on an tuongati o ba'abiisin la zug.
27Benjamin, fʋ na nwɛnɛ zaŋku'ar kanɛ an bʋnzɔtire,
kʋʋdi fʋ bi'emnam bɛogʋn nɛ zaam.”
28Bama an Israel dɔɔd pii nɛ ayi' la, ka ba saam Jakob da niŋ albareka niŋi ba yinne-yinne zug. O da tis sɔ' mɛkama o albareka linɛ nar nɛ o.
Jakob kum yɛla
29Ka dina nya'aŋ ka Jakob yɛl o biis la ye, “M yʋ'ʋn bɔɔd ye m paae nɛ m yaanam san'an. Mumminimi m saamnam yaad linɛ bɛ tampinlɛuŋʋn, Efiron onɛ an Hitti nid la pɔɔgin la. 30Li anɛ Makipiela linɛ bɛ Mamir baba Keenan teŋgbauŋʋn la. Linɛ ka Abraham da da' nɛ li paalʋ wʋsa Efiron san'an la. Ani ka ba su'adi ba kum. 31Anina ka ba mum Abraham nɛ o pu'a Sara, anina ka ba mum Isaak nɛ o pu'a Rebɛka, anina mɛn ka m da mum Lea. 32Hitti nidib la san'an ka ba da da' pɔɔg nɛ li tampinlɛuŋ la. Mummi mam anina.”
33Jakob n da pa'ali ba on bɔɔd si'em naae la o da lɛbi digin ka kpɛm bas o mɛŋ.
Currently Selected:
Pin'ilʋg 49: kus_gh
Highlight
Copy
Compare
Share
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
