Yiib 3
3
Wina'am nie o mɛŋi pa'al Moses
1Moses da kemnɛ o diem Jetro kɔnbid. Jetro da anɛ Midian maanmaan. O da kem kɔnbid la lalig hali keŋ paae Wina'am zuor linɛ yʋ'ʋri buon Horeb la. 2Anina ka o nyɛ Wina'am maliak ka o nie o mɛŋ bugumini bɛ tituugin. Ka Moses nyɛ ka bugum la bɛ tituugin la dit ka li pʋ kanbida. 3Ka Moses tɛn'ɛs ye, “M na keŋ gɔs nyalim kanɛ kɛ ka bugum bɛ tituugin dit ka li pʋ kanbid la.” 4Ka Zugsɔb la nyɛ ka o kenna ye o gɔs la, ka Wina'am buol tituugin la ye, “Moses, Moses!” Ka Moses siak ye, “Manɛ nwa'.” 5Ka Wina'am ye, “Da li'el naa! Pidigimi fʋ ta'ada la, ka zin'ikanɛ ka fʋ zi'e la anɛ kasi.” 6Ka o yɛl ye, “Manɛ aan fʋ yaanam Wina'am la, m anɛ Abraham Wina'am, nɛ Isaak Wina'am, nɛ Jakob Wina'am.” Ani ka Moses su'a o nindaa bɔzugɔ o da zɔtnɛ on na kpa' gɔs Wina'am.
7Ka Zugsɔb la yɛl ye, “M sid nyɛɛm nidib la namisid Egipt si'em. M wʋmi ba kaasig ban namisidi ba la zug ka li yɛla daamim. 8M kena ye m faaɛn ba yi Egipt dim nu'usin mɔri ba keŋ teŋ kanɛ yalim, ka an sʋm, ka bin'isim nɛ siind pʋbid la. Teŋ kan ka Keenan dim nɛ Hitti dim nɛ Amor dim nɛ Perizi dim nɛ Hivi dim nɛ Jebus dim bɛ la. 9Israel dim la fabʋlʋg paae mam na ka mam mɛ nyɛ Egipt dim la maannɛ ba si'em. 10Dinzugɔ, kem ka m tʋmif nɛ Faaro san'an ye fʋ mɔr Israel dim la yi Egipt teŋin na.” 11Amaa ka Moses bu'os Wina'am ye, “Ka mam mɛ aan anɔ'ɔnɛ na keŋ Na'ab Faaro san'anɛ yis Israel dim la Egipt teŋinɛ?” 12Ka Wina'am ye, “Man na bɛ nɛf. Ka lina na an zanbin ye manɛ tʋmif. Fʋ ya'a mɔri ba yina ya na pʋ'ʋs mam Wina'am zuokaŋa ni.”
13 #
Yib 6:2-3
Ka Moses bu'os Wina'am ye, “Ka m ya'a keŋ yɛl Israel dim la ye, ‘Ya yaanam Wina'am la tʋm mam ya san'an na,’ ka ba bu'osim ye, ‘O yʋ'ʋrɛ?’ M ye m lɛbisi ba ye anɔ'ɔnɛ?” 14Ka Wina'am yɛl Moses ye, “Yɛlimi ba ye, man yʋ'ʋr anɛ ‘Manɛ an Man.’ Yɛlim Israel dim la ye, ‘Manɛ’ tʋmif na.” 15Ka Wina'am lɛn yɛl Moses ye, “Yɛlim Israel dim la ye, Zugsɔb onɛ aan ba yaab Abraham Wina'am, nɛ Isaak Wina'am nɛ Jakob Wina'am la tʋmi mɛ ya san'an na. M yʋ'ʋkaŋa ye li bɛ nɛ saŋa wʋsa, ka zʋmaana wʋsa na zaŋi li ka tɛnri m yɛla saŋa linɛ ka' naarɛ. 16Kem la'as Israel kpɛɛmnam la, ka yɛli ba ye Zugsɔb onɛ aan ya yaanam Wina'am, Abraham Wina'am nɛ Isaak Wina'am nɛ Jakob Wina'am la, nie o mɛŋi pa'alif ka yɛlif ye o nyɛ Egipt dim la maannɛ ba si'em. 17M kaanb ya ye, ‘M na mɔri ya yi namiskanɛ ka ya nyɛt Egipt teŋin la keŋ teŋ kanɛ ka Keenan dim nɛ Hitti dim nɛ Amor dim nɛ Perizi dim nɛ Hivi dim nɛ Jebus dim bɛ, ka bin'isim nɛ siind pʋbid la ni.’ 18Fʋ ya'a ti tu'as ala, Israel kpɛɛmnam la na wʋm tisif, ka fʋn nɛ ban na keŋ Egipt na'ab Faaro san'an yɛl o ye, ‘Zugsɔb onɛ an Hibiru dim Wina'am la, yɛli ti ye ti nɔk daba atan' keŋ mɔɔgin maal malʋŋʋ tis on Zugsɔb Wina'am.’ 19Amaa mam mi' ye Egipt na'ab la kʋ bas suor ka ya keŋi, asɛɛ ka si'el maal ka o nyɛ. 20Ka m na tiɛn m nu'ug ka dam Egipt dim la nɛ nyalima banɛ ka m ye m tʋmmi ya san'an la; ka li nya'aŋ ka o na basi ya ka ya keŋ. 21#Yib 12:35-36 M na kɛ ka Egipt dim gɔsi ya sʋ'ʋŋa, ka ya ya'a ti yi teŋin la m kʋ kɛ ka ya yinɛ nu'uzaalisɛ. 22Ya pu'a wʋsa na yɛl o kpi'a nɛ onɛ bɛɛ o yin wʋsa ka o na tis o anzurifa nɛ sanlima nɛ fuud; ka ya na zaŋi ziili o ya biribis nɛ ya bipumisi keŋ. Ala ka ya na paam la'ad Egipt dim la san'an.”
Currently Selected:
Yiib 3: kus_gh
Highlight
Copy
Compare
Share
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
Yiib 3
3
Wina'am nie o mɛŋi pa'al Moses
1Moses da kemnɛ o diem Jetro kɔnbid. Jetro da anɛ Midian maanmaan. O da kem kɔnbid la lalig hali keŋ paae Wina'am zuor linɛ yʋ'ʋri buon Horeb la. 2Anina ka o nyɛ Wina'am maliak ka o nie o mɛŋ bugumini bɛ tituugin. Ka Moses nyɛ ka bugum la bɛ tituugin la dit ka li pʋ kanbida. 3Ka Moses tɛn'ɛs ye, “M na keŋ gɔs nyalim kanɛ kɛ ka bugum bɛ tituugin dit ka li pʋ kanbid la.” 4Ka Zugsɔb la nyɛ ka o kenna ye o gɔs la, ka Wina'am buol tituugin la ye, “Moses, Moses!” Ka Moses siak ye, “Manɛ nwa'.” 5Ka Wina'am ye, “Da li'el naa! Pidigimi fʋ ta'ada la, ka zin'ikanɛ ka fʋ zi'e la anɛ kasi.” 6Ka o yɛl ye, “Manɛ aan fʋ yaanam Wina'am la, m anɛ Abraham Wina'am, nɛ Isaak Wina'am, nɛ Jakob Wina'am.” Ani ka Moses su'a o nindaa bɔzugɔ o da zɔtnɛ on na kpa' gɔs Wina'am.
7Ka Zugsɔb la yɛl ye, “M sid nyɛɛm nidib la namisid Egipt si'em. M wʋmi ba kaasig ban namisidi ba la zug ka li yɛla daamim. 8M kena ye m faaɛn ba yi Egipt dim nu'usin mɔri ba keŋ teŋ kanɛ yalim, ka an sʋm, ka bin'isim nɛ siind pʋbid la. Teŋ kan ka Keenan dim nɛ Hitti dim nɛ Amor dim nɛ Perizi dim nɛ Hivi dim nɛ Jebus dim bɛ la. 9Israel dim la fabʋlʋg paae mam na ka mam mɛ nyɛ Egipt dim la maannɛ ba si'em. 10Dinzugɔ, kem ka m tʋmif nɛ Faaro san'an ye fʋ mɔr Israel dim la yi Egipt teŋin na.” 11Amaa ka Moses bu'os Wina'am ye, “Ka mam mɛ aan anɔ'ɔnɛ na keŋ Na'ab Faaro san'anɛ yis Israel dim la Egipt teŋinɛ?” 12Ka Wina'am ye, “Man na bɛ nɛf. Ka lina na an zanbin ye manɛ tʋmif. Fʋ ya'a mɔri ba yina ya na pʋ'ʋs mam Wina'am zuokaŋa ni.”
13 #
Yib 6:2-3
Ka Moses bu'os Wina'am ye, “Ka m ya'a keŋ yɛl Israel dim la ye, ‘Ya yaanam Wina'am la tʋm mam ya san'an na,’ ka ba bu'osim ye, ‘O yʋ'ʋrɛ?’ M ye m lɛbisi ba ye anɔ'ɔnɛ?” 14Ka Wina'am yɛl Moses ye, “Yɛlimi ba ye, man yʋ'ʋr anɛ ‘Manɛ an Man.’ Yɛlim Israel dim la ye, ‘Manɛ’ tʋmif na.” 15Ka Wina'am lɛn yɛl Moses ye, “Yɛlim Israel dim la ye, Zugsɔb onɛ aan ba yaab Abraham Wina'am, nɛ Isaak Wina'am nɛ Jakob Wina'am la tʋmi mɛ ya san'an na. M yʋ'ʋkaŋa ye li bɛ nɛ saŋa wʋsa, ka zʋmaana wʋsa na zaŋi li ka tɛnri m yɛla saŋa linɛ ka' naarɛ. 16Kem la'as Israel kpɛɛmnam la, ka yɛli ba ye Zugsɔb onɛ aan ya yaanam Wina'am, Abraham Wina'am nɛ Isaak Wina'am nɛ Jakob Wina'am la, nie o mɛŋi pa'alif ka yɛlif ye o nyɛ Egipt dim la maannɛ ba si'em. 17M kaanb ya ye, ‘M na mɔri ya yi namiskanɛ ka ya nyɛt Egipt teŋin la keŋ teŋ kanɛ ka Keenan dim nɛ Hitti dim nɛ Amor dim nɛ Perizi dim nɛ Hivi dim nɛ Jebus dim bɛ, ka bin'isim nɛ siind pʋbid la ni.’ 18Fʋ ya'a ti tu'as ala, Israel kpɛɛmnam la na wʋm tisif, ka fʋn nɛ ban na keŋ Egipt na'ab Faaro san'an yɛl o ye, ‘Zugsɔb onɛ an Hibiru dim Wina'am la, yɛli ti ye ti nɔk daba atan' keŋ mɔɔgin maal malʋŋʋ tis on Zugsɔb Wina'am.’ 19Amaa mam mi' ye Egipt na'ab la kʋ bas suor ka ya keŋi, asɛɛ ka si'el maal ka o nyɛ. 20Ka m na tiɛn m nu'ug ka dam Egipt dim la nɛ nyalima banɛ ka m ye m tʋmmi ya san'an la; ka li nya'aŋ ka o na basi ya ka ya keŋ. 21#Yib 12:35-36 M na kɛ ka Egipt dim gɔsi ya sʋ'ʋŋa, ka ya ya'a ti yi teŋin la m kʋ kɛ ka ya yinɛ nu'uzaalisɛ. 22Ya pu'a wʋsa na yɛl o kpi'a nɛ onɛ bɛɛ o yin wʋsa ka o na tis o anzurifa nɛ sanlima nɛ fuud; ka ya na zaŋi ziili o ya biribis nɛ ya bipumisi keŋ. Ala ka ya na paam la'ad Egipt dim la san'an.”
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation