Yiib 17

Ku'om yi tampiingin la yɛla

(Kal 20:1-13)

1Ka Zugsɔb la kɛ ka Israel dim yi Sin pipirigin la keŋ paae Refidim na, zin'ikan la ku'om da kae ka nidib la na nuu. 2Ka nidib la pin'ili nyɔn ka yɛt Moses ye, “Tisimi ti ku'om ka ti nu!” Ka Moses lɛbisi ba baanlimm ye, “Bɔ ka ya nwa'asid nɛ mam? Bɔɔ maal ka ya makid Zugsɔb la?” 3Amaa ku'onuudi wʋmi ba la zug ka ba zan'as ka nyɔn. Ka ye, “Bɔɔ pʋn maal ka fʋ yis tinam Egipt mɔri ti kɛn kpɛla na ye fʋ kɛ ka tinam nɛ ti biis nɛ ti bʋnkɔnbid wʋsa kpi ku'onuudɛ?” 4Ka Moses bɛllim Zugsɔb ka yɛl ye, “M na niŋ nidib nwa' wala? Ba yʋ'ʋn kʋdim bɔɔd ye ba lɔb mam nɛ kuga!” 5Ka Zugsɔb yɛl Moses ye, “Nɔkimi fʋ kɔnbkem dansaar kanɛ ka fʋ daa nɔki tiesi kpa' Nail ku'om la, ka buol Israel kpɛɛmnam ka ya gaad nidib la tuon. 6M na sia'ali ya Sinai zuor la ni. Nwɛ'ɛm tampiing la ka ku'om na yina ka nidib la nu.” Ka Moses maal wʋʋ on wʋm si'em la ka kpɛɛmnam la nyɛ ka ku'om yit na. 7Ka Moses pʋd zin'ikan la ye Masa nɛ Meriba,#17:7 Masa gbin anɛ makir ka Meriba gbin an yʋyʋnlʋg zin'ig. bɔzugɔ Israel dim la nwa'asnɛ Moses ka mak Zugsɔb ka yɛt ye, “Zugsɔb la sid bɛɛ ti nii?”

Ban zabi nyaŋ Amalek dim la yɛla

8Israel dim la da nam bɛ Refidim la, Amalek zabzabidib la da kena zab nɛ ba. 9Ka Moses yɛl Josua ye, “Buolim Israel zabzabidib la na ka ba zab nɛ Amalek zabzabidib la. Bɛog m na nɔk Wina'am dansaar la m nu'uginɛ duoe zi'e zuor la zug.” 10Ka Josua tʋm wʋʋ Moses yɛl o si'em la ka dɔl o zabzabidib la yii zab nɛ Amalek zabzabidib la. Amaa ka Moses nɛ Aaron nɛ Hur lɛɛ duoe zi'e zuor la zug. 11Ka Moses ya'a ʋk o dansaar la agɔl ka Israel zabzabidib la paam paŋ. Amaa o nu'ug la ya'a ti sigid la ka Amalek dim mɛ paamid paŋ. 12Ka Moses nu'us gɛn ka pʋ lɛn nyaŋidi ʋkid dansaar la ka Aaron nɛ Hur bɔ kugiri tis o ka o zin' ka ban zi'e o baba ka mɔr o nu'us la, hali nɛ zaam. 13Ka Josua nɛ o zabzabidib la nyaŋ Amalek zabzabidib la.

14 # Zie 25:17-19; 1Sa 15:2-9 Ka Zugsɔb yɛl Moses ye, “Sɔm nwa' digil ka li na an kasɛt, ka karim tis Josua ye m na san'am Amalek buudi hali ka sɔ' kʋ tɛnri ba yɛla dunia nwa' nii.” 15Ka Moses mɛ maan bimbim anina ka buoli li ye, Zugsɔb la An Mam Nyaŋir Tuuta. 16Ka ba ʋk nu'us Zugsɔb la tuon ka pɔ ye, “Din yi zina ken, Zugsɔb la na zabid nɛ Amalek buudi la zʋmaana wʋsa.”

Currently Selected:

Yiib 17: kus_gh

Highlight

Copy

Compare