Pogsiog Nang 28

Paulus Malta so'oag wamogha

1Magti opsiog komba, mag alip toman agha mag longoro kanektop so'o abolag piburi, wamububa nimi tanekori, “Malta so'oag yalom,” aro ambatsiekpa el tabu. 2Malta so'oag nimi sisa wamek nimi tanekori nu sembe o'ona maikno sembahiekti yeplamsiek. Mag telamogpa, son lelem nimi tanekori auk lolbaek. 3Auk lolbaekpa, Paulusti kal toro polbaogti, aukag talamogpa, auk ogti paghae nhon lambaogti, Paulus saeag si sabog. 4Saeag si singkamogpa, nimi sisa wamek nimi tanekori kembaekti seneraglamekti, “Nimi ene mag laut longorop mag alip toman yalamlaba, magti opla kom aghana, paghaeri si saplaba tebalul. Nimi nhon samenag opsiog ane sembe, nimi ene kamag wamnep kom. Wene malia uaonge sembe memne tam karebanepne neneri yingkina el lunuro opla,” alamek.

5Wene alamekpa, Paulusti paghae aneko saeag agha pelebom agha aukag tabog. Paghaeri si sabog aneko nona babe olog nobaog kom. 6Paghaeri si sabog aneko sembe nimi wamek nimi tanekori, “Paulusti sae usa olog sae babe nobalul to, tepna babe tebalul to?” aro kemero wamek. Sindi wene sembamekti, kemero wamek aghana, “Uro yabilul,” aro seneraglamekne olog uro yabiog kom. Uro yabiog komba, sindi el sembe, “Elna nimi kom aghana, memne mikiba wamla,” senelamek.

7Malta so'oag wamubua peramag so'o enekoag mog so'o ngainge nubunge mag longo kanektop so'o saelbamogne sina Publius wamog. Publius ponekori nu eldi wana wali uro aeag topsiogpa, ik wilindi wamubu. 8Wamububa Publius ili nong boboap, naiknaap, ti haoapti naiklamogti, aeag malamog. Malamogpa Paulus aeag wa'ina el sembe Allahag molona molbarogti, el nongag sae pibogpa, Publius ili wali taog. 9El poneko wali nembaogpa, nimi orange naikna naiklamekne mag longo kanektop mog so'o enekoag wamekne yalamekpa, wali nenelamsiog. 10Wali nenelamsiogpa, awi maikno uro kiplamsiek. Sindi nu sembe wali senelamsiekti, “Mag alip toman kabongag agha palamikpa, teko uahinep,” senena sindi nu sembe wero palilamsiek.

Paulus as Roma piogha

11Mag longoro kanektop so'o Malta wamubu mog so'o enekoag kabong as Aleksandria agha mag alip toman yaog kabong nhon wamog. Samenag as Aleksandria laploa palamogpa, khao li taogpa, Malta so'oag kabong pabalingkirobag aneko haing kerekaekti, ta'ap wamek. Wamekpa so'o anekoag yaburi, wal wilindi wamubua khao aingniamogpa, as Aleksandria agha yaog kabong anekoag waelbabu. Waelbabu kabong anekoag mema phende si Kastorap Poluksap#28:11 Yunani nimiri mema phende sina Kastorap Poluksap sembe, “Mag alip toman palamebeag yepsurukang,” aro kabong eneko sobaek. usog yame sunuro kabong whingag sip sobaekpa, kabong anekoag yalamubu. 12Yalamuburi as Sirakusa aneko yingkina ik wilindi wamubu. 13Aneko ik wilindi wamubua mag alip toman palamuburi, as Regium yabu. Mabubua kwelekaogne neneko phoana wali uro yalamubuag siba yangaro yalamogpa, ik nhon ningki palamubua, as Putioli pibu. 14Putioli aneko pibuba, nungkabo Yesusag sikne aro seneraglamek nimiri, “Nunap nhon wamukap,” aro nunag molbahiekpa, ik saekpare sinap nhon wamubu. Aneko wamubua nen as Roma palamubu. 15Nungkabo Roma nimi Yesusag sikne aro seneragtop nimiri nu yanepne sembe yubu ka'ebaekti, nu wamubuag yaek. Roma agha nu wamubuag yalamek nimina, nu kamna kapto tol torobag as Apius wamubuag yaekpa, nen tipto palamuburi, as si Tres Taberne wamubuag babe nunag yalamek. Sin nunag yalamekne sembe Paulusti kembahiogti, wana aingnibaogpa Allahag, “Wali yeplamsilam,” aro omekto kiplamog. 16Nu as Roma aneko piburi, Paulus kop aeag tolongoro koma el mo aeag wamogpa, yin saleropne nhondi yae wamog.

Paulusti Yahudi nimi as Roma wamek nimiag Allah yubu ambatsiogha

17Wamubua ik wilindi wamuburi, Paulusti Yahudi nimi sikini yabo yopsiogpa, poloro winip taek. Poloro winip taekpa, Paulusti yubu lelamogti, “Nangkabo, nu Yahudi nimi sembe suknuna suknubano kom. Nu Yahudi nimiri ul palamapne saelba uropne irikna sembe babe phibano kom aghana, na Yerusalem wamnoba saelbaneongdi, Roma nimi saeag nembaneong. 18Roma nimi saeag nembaneongdi, nanag tam pibongne sembe Roma nimiri, ‘Tam karebaukap,’ aro haibaneong. Haibaneong aghana, tam nari unne sunsunum uro tam ikinne na tepnange palinne orogti, ‘Sae libukap,’ seong. 19Undo wene seong aghana, Yahudi nimiri, ‘Sae haing lopto lambaheng kom,’ seong ane sembe, nari lemnepneog wamlange, ‘Kaisarag yoplamnaba, el mori tam karebalul,’ seno. Wene seno aghana, Yahudi nimi na nimi sisa nik nimi ane sembe, ‘Sindi ulamangne sembe tam Kaisar whingag ambarel pinun,’ aro lemno kom. 20Ane sembe a'unag moloro, ‘Haiptaberi yubu lebukap,’ aro yopsin. Nu Israel nimiri, ‘Amik uro yabilul,’ aro nang-nangaro tilamapne sembe na sae kaupto wamnange nene imnelom,” aro ambatsiog.

21Wene aro ambatsiogpa, sindi elag yubu lelamekti, “Nun nungkabo Yudea wamang nimiri mome an sembe pibongne nunag yao kom. Nungkabo Yahudi nimi yogne babe nunag yaong nimiri andi malia ualumne sembe tam nhon babe ambatsiong kom. 22Yahudi nimi tane yaong nimiri an sembe nunag ambatsiong kom aghana, nu ka'elamapne andi ambarelamsilam yubu ene sembe tala-tala nimiri, ‘Ekel ina ambatsirop yubu wamla,’ alamangba ka'elamap. Ane sembe, andi seneraglamlamdi, ulamlamne nene nuri ka'ebaukapti, ik nhon sum ambatsululam,” seek.

23Wene seekti, “Ik nhon longop taberi, yubu tam kembaukap,” aro Paulusap sinap yubu saekag lebek. Sum eneko taogpa, Paulus ua ulamoghag aneko nimi maikno elag yaek. Elag yaekpa, lukunap alnibaogti, Allah yubu ambarelamsiog paghabog ae sin taog. Ambarelamsiog nena, Musari aruksirop yubuap, Allahri yubu silimu tiptop nimiri mome toro pibek yubuap agha kiliro sikne lag nenero ambarelamsiog. Allahri mog so'o nimi saelba uhiroba sembe, “Yesusag sikne aro seneraglamlulom,” aro olnoro ambarelamsiog.

24Wene aro ambarelamsiogpa, ka'elamek nimi nenneri Paulusti ambatsiog yubu sembe sikne aro seneraglamekpa, nimi nenneri sikne aro seneraglamek kom.

25Wene aro seneraghek komne sembe Yahudi nimi taneko yubu lel dalamekti, anam lamban komag sindi seneragna wana taongkwahiogne kembahiogti, Paulusti yubu kiki nhon ambatsiog. Yubu ambarelamsiogti, “Samenag Allah Eldamne Yame Walingeri eldi yubu silimu tiptopne Yesayaag sikne aghabog lebog. Yubu lebog nena, Yesayari yubu tipto a'unisag yabo ambarelamsiogti,

26-27‘Israel nimi taneko usog mikip nimi talamek.

Sin ao lep tangkamekti, haing babe up tangkamek.

Sindi ao leptan koma babe haing uptan koma babe wamseng tanena,

haingdi imnepti, aori ka'ebanepti, wanaag babe seneragnep andarina,

nadamne Allahag samoro yaheng.

Nadamne Allahag samoro yahengpa, wali nembahisene.

Aghana Israel nimi usog mikip tangtop nimi tanekoag pimendi, sinag uro yabilulne ambarelamsimendi,

“A'undi sop-sop, ‘Ka'ebahane,’ aro aori ka'elamlulom aghana,

wanaag agha seneraglulom kom.

‘Kembahane,’ aro haingdi kemelamlulom aghana,

wanaag agha iplulom kom,”

aro ambatsululam,’

aro Allahri ambarogne Yesayari sik uro mome toro pibog.#Yesaya 6:9-10

28Allahri a'un Yahudi nimi sembe, ‘Ka'ebaukang kom,’ aro ambarogne sembe, ‘El wamlulom,’ aro tibin nenero ambarelamsin. Allahri samenag, ‘Mog so'oag nimi taulbahinun,’ aro salag pibog nena, ‘Yahudi sisa kom nimiag ambarel palamsululom,’ aro pogsiog. Pogsiogpa wene ambarelamsiapba, sin wali ka'elamukang,” seog.

[29Wene aro ambatsiogpa, Yahudi nimi yaek nimi taneko palamekti, sin mamun yubu lel dalamekti, yubu leple palamek.]

30Piekpa Paulus poneko nimiri ae agha kamna toro ua ulamoghag anekoag ua ulamogti, nimi elag yalamekne sembe wana yeng sembamog. Nimi elag maiknoro yalamekpa, wali uro kiplamsiogpa, hengkun phende taog. 31Hengkun phende as Roma wamogha log kom uro Allahri mog so'oag nimi saelba uhiroba sembe ambarelamsiog. Yubu ambarelamsiogpa, nimiri iriknange orog wamogpa, Allahri nu Saelba Uhiropne Yesus wepto poghol aogne Kristus sembe Paulusti amoro ambarelamsiog.

Currently Selected:

Pogsiog Nang 28: kklKOS

Highlight

Copy