YOEL 1
1
1Heika Pethuel dah lo Yoel jyank mas jweh los, Yhensain dah loeus nghuot.
Jyo Dyoqbis loh cho Kuk
2Logis jens eh, kamp gyo geh.
Yuda mau mas nyeis bang yuk khanghmuh gyo geh.
Heiteh zis namoq caiq lyis,
nghuot ya namoq phauh thyeih moq caiq lyis bweh ku lhyeh?
3Hauh cho namoq lo jens lyis taiq kyoh geh.
Nyamoq gas nyamoq lo jens lyis taiq kyoh das.
Tsai nyamoq gas nyamoq lo jens vcaiq caiq lyis taiq kyoh das.
4Janghgyik dvphung thang lhyi dvphung jyo zains mas nyeis.
Dvphung zo nyhet zis gas gohtoeu dvphung nyhau tyamp.
5Yhei pauhzoe jens eh, yhet soh las ngaus geh;
zvbiq shuk bang eh, ngaus geh;
zvbiq saiq xiklyis dah zvbiq shih gas monh goeus.
6Yah mau mas dius dvnyau dah jesphung los zan goeus.#Nyoq 9.8
Nyamoq gas yomsoq bos las ma thoq suon lo shoq nyo;
nyamoq dah zwis gas khangkhyi dah zwis teh zuk.
7Nyamoq gas yah zvbiq nwis lyis mhont tyamp goeus,
yah maiphang zains lyis zo tyamp.
Nyamoq gas saiq ko jens thyoeu joq shoq
vkuk cwe lha tyamp.
8Dius jens eh, nyang yah phoengh wvng das yukgis shei tyamp las
kuk dah lonyi teh, ngaus geh.
9Yhenmuh mas dyei das jyo yahge zvbiq ma joq lo.
Phudyei bang gas Yhensain xiklyis jyungshuk dyei das zis ma yoh lo yvmvyah tsain kuk nyeis.
10Nyang zungs vkom dvtsain nghuot.
Jyo yonh goeus,
zvbiq shih kyuk goeus,
tsanlun zains nyhauh goeus yvmvyah
maunyeis kuk nyeis.
11Yos zwi bang eh, kuk geh.
Zvbiq khyam dyangh bang eh, ngaus geh.
Khasoeh ge lyis sunghso yahge yoh,
nghuot goeus jyo dvnganh monh goeus.
12Zvbiqnwis yahge maiphang zains tsain nyhauh goeus.
Shih dvnganh nyhauh shei goeus.
Dius dah gauslaus cho dyuk loh.
13Phon mha phuqsoe dah phudyei bang eh,
yanghthung dyi wuot las ngaus geh.
Yhenmuh mas loh las dvnyens gonh kuk geh.
Yah Mangso lhyi dyei das jyo, zvbiq ma joq lo.
14Womkyi das xiklyis vmingh dyei geh;
moqphung zop huom das zis lui geh!
Uhshe bang lyis tsainh las
Yuda dius jens dvnganh Yhensain
namoq Mangso dah Yhenmuh mas wvng las
nyang lyis kaiq sang geh.
15 Yhensain dah buisnyeis ni goeus.#Esa 13.6
Maukhung Jesphung
dyoqbis cho she los buisnyeis nghuot das.
Houka khateh gyukphoh buisnyeis nghuot das lah!
16Yang yoeuh nyeis lyis yah jyo yonh loh.
Yah Mangso dah Yhenmuh mas gauslaus cho ma bos lo.
17Jyo nyau gas nyeis kyuk khau mha shei tyamp;
toh das jyo ma bos las
jyi ka vkom tsain dyoq gyoh joq
18Noeu jens gas nyamoq xiklyis katjang ma bos yvmvyah
shanghsenh las tsain ma nyeis.
Yvng phung jens eq xauh kham zo nyeis.
19 Yhensain eh, ngos nvng lyis lui;
khasoeh ge lyis katjang yahge
saiqzains jens gas nyi ngeh teh kyuk tyamp.
20Yewus jens yangh nvng lyis kaiq lui nyeis.
Khasoeh ge lyis jeislo lvng jens kyuk loh goeus.
Currently Selected:
YOEL 1: NCB
Highlight
Share
Copy
Want to have your highlights saved across all your devices? Sign up or sign in
Ngochang Common Language Bible © Bible Society of Myanmar, 2010.