LYI 1
1
Khanan Wvng Das Cho
1Haih buk mas gas Israel jens Yodan lvng buisthuq tvp mhanhdyvp mas nghuot uhlyis Moshe taiq dang tsain nghuot. Nyamoq gas Paran wus dvshot, gohtoeu dvshot pheh Tophel, Laban, Hazerot yahge Dizahab wus jens jo, Sup nvm Yodan Langhkhau mha tsain nghuot. 2Sina boms masyah Edom boms mau cho yah Kadesh Barnea jweh shoq dvci dvnyeih suh. 3Israel jens Egutu masyah thuq zis nyeici vzvn, dvci das vkhyvp cangxeih vnyeih lyis Moshe ka Yhensain Israel jens lyis taiq aq ge nyang lyis tyingtoh dang dvnganh nyamoq lyis taiq. 4Houka Yhensain Heshbon mas guon dah Amori hwankti Sihon yahge Ashtarot yahge Edrei wus lyis guon dah Bashan hwankti Og moq lyis ung thang lhyi nghuot.#Gyu 21.21-35 5Houka dius jens Yodan lvng buisthuq tvp, Moab pa mha nyeis uhlyis Moshe ka Mangso lyi yahge jyauh cho phui kyoh zoh loh. 6Nyang taiq, Yang Sina boms mas nyeis lyis, Yhensain, yah Mangso yang lyis taiq, Haih boms mas nyeis zis nyangh goeus. 7Thoenggus thyoq las gyung dyens toq lo geh. Amori boms mau, vyvm vwi janggyon, Yodan langhkhau, boms mau janggyon, mautyi pa, Mediteranean thomh yvm chank yah loh. Houmha zis Khanan mau yahge Lebanon boms thyitvp Uphrat lvng jweh shoq loh geh. 8Hai dvnganh gas Ngos Yhensain namoq dah phauh thyeih Abraham, Isak, Yakop moq yahge nyamoq dah vnyau vshih lyis dyei das ge dangthoengh toh dah mau nghuot. Namoq houmha loh wvng nyeis geh.
Moshe Soetuon bang Toh
(Dyu 18.13-27)
9Moshe dius jens lyis taiq zis gas, Yang Sina boms mas nyeis shih lyis ngos namoq lyis taiq goeus. Namoq lyis shwih dah yvwons gas ngah xiklyis sunk lyei. Ngos dvyuk kyingh ma yoh kuot. 10Yhensain, namoq dah Mangso ka namoq lyis maukhung kyi nyhoq jebais los nhang goeus. 11Yhensain namoq phauh thyeih moq dah Mangso ka, nyang dang thoengh toh vgus namoq lyis khyoengh huon je los nhang shih las, nyeisgis yaplhoq nhang bas jungh. 12Nghuot laus eq namoq dah dyoqgoh nyensgoh cho lhyi tamp das dah lyei yvwons lyis ngvnyang kyingh khasoeh yoh wons das lah? 13Namoq dvkoq dvkoq mas joeui bos, yik las cho jeis seq bang dvyhamh lyis khyen toh geh, ngos nyamoq lyis namoq thoq mas wus nhaiqbos toeuq toh dyei bah, oen. 14Namoq eq hauh zis kuot gis ge xamxonh goeus. 15Housoeh las ngos namoq vkoq masyah tsain khyen toh dah joeui bos las cho jeis seq dah uhshe bang lyis shwih las namoq lyis yoeuh nhang toh. Dvyhamh gas dius dvkhyoengh lyis yvwons yoeus, dvyhamh gas dvxo, dvyhamh gas oengci, dvyhamh gas dvci lhyi yvwons yoeus. Hauh vkoq jens lyis yoeuh guon das zis gohtoeu zau jens eq toeuq toh.
16Hauh uhlyis ngos nyamoq lyis taiq shet zis gas, Namoq dah dius jens mas soe thuq los zis lyis gyo las, namoq nyang dius jens yah sen yvmas laus eq, namoq mas nyeis dah lvbaus yah bos sen yvmas laus eq soe khanghmuh lyis lyi bos khyvlyis soetuon. 17Nvng nghamh thyet yvmas hank nyoqnho lhyi eq ma gis yoeuh. Hank lyis laus eq yuk khanghmuh lyis dvlyi masyah soetuon chah. Hank lyis eq vgyuk: khasoeh ge lyis hau nghamh thyet cho ka Mangso jyank masyah los. Namoq xiklyis nyo yau dah soe dvja ja bos lyis ngah jyank mas chi los geh, ngos thyet das. 18Hauh shishenh lyis ngos namoq kuot das zis dvnganh taiq shet cho dyei toh.
Kadesh masyah Joh yoeuh Loh
(Gyu 13.1-33)
19Yang gas Yhensain, yah Mangso yang lyis tying toh zis kuot. Yang Sina boms masyah thuq las gyukphoh mhanhdyvp zainsmuh lai las Amori boms mau pheh loh. Yang Kadesh Barnea mas jweh lyis, 20-21ngos namoq lyis taiq, Gvshih namoq gas Yhensain, yah Mangso, yah phauh thyeih moq dah Mangso yang lyis dyei dah Amori boms mau mas jweh goeus, yoeuh aq hauh zis nghuot. Nyang tying toh vgus houmha loh wvng nyeis geh. Vgyuk goh, vsheq nyeis goh, oen.
22Nghuot laus eq namoq ngah jyank mas los taiq zis gas, Hauh mau lyis joh yoeuh das zis, yah xik pheh dius dvyhamh nhang goh, housoeh nyamoq gas yang lyis khacho yah loh lyis zes gis das zis yahge wus khasoeh teh zis tsain joq zis yang lyis yoh taiq das, ge.
23Hauh dang gas kuot lyis gis teh nghuot, housoeh las ngos namoq dvkoq mas dvyuk mulas dvci aiq yuk khyen. 24Nyamoq eq boms mau cho wvng loh las Eshko langhkhau jweh shoq loh yoeuh. 25Nyamoq hauh mau mas nyvng dah shih dvkhamh thyoq wons los las taiq zis gas, Yhensain, yah Mangso yang lyis dyei dah mau gas, nyeis coeu bos dah mau gis nghuot, ge.
Yhensain Lhyi Gomloeus Toq
26Nghuot laus eq namoq gas Yhensain, namoq dah Mangso dah tyingtoh dang yah tyi lha gomloeus toq zis yah hauh mau mas ma wvng loh.#Lyi 9.23; Heb 3.16 27Namoq nyang changh hoeu zis yah, Yhensain yang lyis hoeng lha Amori loq mas kyauh las sat das ge yang lyis Egutu masyah shwih thuq los. 28Ngamoq chamus houmha loh das? Ngamoq gyuk.Yang nhang kat bang taiq lyis, Hauh mau mas dius jens gas yah thoq lyis yom zes bos, zes nyhang, nyamoq nyeis dah wus eq mau lyis thuk dah wusciank bos. Nyamoq houmha dam dius lyis nyvng, ge.
29Nghuot laus eq ngos taiq zis gas, Hauh bang lyis vgyuk goh. 30Yhensain namoq Mangso ka namoq lyis shwih das. Nyang gas Egutu yahge mhanhdyvp mas kuot zis namoq nyvng vgus namoq nyhenshang jeszan dyei das. 31Nyang namoq lyis haih joqyos mas jweh shoq dvcho gonh jesluiq shohluiq, uwus gas vlo lyis shwih teh khasoeh shwih los zis nyvng goeus.#Lgy 13.18 32Ngos taiq laus eq namoq gas Yhensain lhyi ma loms shih.#Heb 3.19 33Nyang vjangh namoq xik mas loh las namoq thoeng dah joqyos xo dyei. Namoq lyis cho shet das zis namoq xikkhonh mas, nyenh lyis nyiduk yah, nyeih lyis jyommauh punk yah choshe dyei laus eq namoq ma loms.
Yhensain Israel lyis Joeng
(Gyu 14.20-45)
34 Yhensain ka namoq lop zis xauhgyo las nhaiqyo zis yah maukhi lha taiq zis gas,#Heb 3.18 35Ngos namoq dah phauh thyeih moq lyis dyei das oen maukhi toh, nyei coeu bos mau mas ma gis dah dius caiq mas bang dvyuk eq ma xauh wvng das. 36Yephun lo Khaleb kyingh xauh wvng das. Nyang gas ngos lyis lomluk goeus las, hau nyang loh yoeuh khoq dah mau nyang yahge nyah vnyau vshih lyis ngos dyei das. 37Namoq gvng mas Yhensain ngos lyis eq nhaiqyo las, Moshe, nvng yangh hauh mau mas ma xauh wvng das, ge. 38Nghuot laus eq nah zainsthuk, Nun lo Yoshua lyis yomdyei aq. Nyang gas Israel jens lyis hauh mau mas shwih wvng nyeis das.
39Hauh thang lhyi Yhensain yang dvnganh lyis taiq. Nyo ngis shih las gis gang ma seq shih dah namoq loshang jens yahge jeswus yah nyhik loh das ge namoq taiq dah loshang jens hauh mau mas xauh wvng das. Ngos nyamoq lyis hauh mau dyei las nyamoq houmha wvng nyeis das. 40Nghuot laus eq namoq gas tauh las, Mhanhdyvp cho chank yah Thomh Nes pheh loh geh, ge.
41Namoq phuk taiq zis gas, Moshe eh, ngamoq Yhensain lhyi tyi lha yaunos kuot goeus. Nghuot laus eq gvshih Yhensain tying toh zis yah dvyhangteh, ngamoq zan das, ge. Hauh thang lhyi namoq yuk khanghmuh gas hau boms mau lyis lwis lwis yoh nyhenh wvng das ge tsain nghamh las zan das zis cicont tsain kuot. 42Nghuot laus eq Yhensain ngos lyis taiq, Ngos nyamoq yah ma nghuot das yvmvyah, nyamoq lyis vzan-goh, oen zaih nhang aq. Zan lyis nyamoq dah jeswus nyamoq lyis ung das, ge. 43Yhensain taiq zis ngos namoq lyis taiq goeus laus eq, namoq ma gyo. Namoq gas nyang lyis tyi lha gomloeus toq. Namoq khwank zis yah boms mau pheh tsain jens loh. 44Hauh boms mas nyeis dah Amori jens gas dyowhom teh namoq lyis thuq zan. Nyamoq gas namoq lyis Horma wus jweh shoq chank khat las Edom boms mau mas namoq lyis ung tyamp. 45Housoeh las namoq Yhensain lhyi pangh aq ge kaiq ngaus. Nghuot laus eq nyang ma xauhgyo dyei, gyo eq ma gyo dyei.
Mhanhdyvp mas Nyeis Zvnlom
46Housoeh yang Kadesh mas nyangh nyangh nyeis.
Currently Selected:
LYI 1: NCB
Highlight
Share
Copy
Want to have your highlights saved across all your devices? Sign up or sign in
Ngochang Common Language Bible © Bible Society of Myanmar, 2010.