Matius Pokoilaan
Pokoilaan
Tomod-o po nu Abar Owarong Nituturan ni Matius iitu no, paabar nu kopogboya'an ni Yisus, onu yo po obana suat so Iyo om nituduk Niyo ri. Kinologa'an ni Yisus oono yo su ponondu'an nu notuman-o ongo janji nu Kinoringan om kologa' yo pogkuosaan Niyo.
Obulit si Matius pokoilo so buuk iitu no nu “notuman-o” onu yo po nokojanji yo nu Kinoringan so lobuw Niyo so iya nu Porojonjian Laid-i. Pointolang po si Matius so buuk iitu nu dai minongowaid ongo lobuw-i nu ukum, iya nu inowit nosiro si Yisus so tiningkuangon nu Poongobisora'an nu Ugama (26:57-68). Om pokoilo po iyo nu kosola'an nu ongo lobuw Parisi om moomontuduk nu Ukum poorati nu totongaron so Porojonjian Laid (15:1-9).
Ido po oogot om musondiang nu tuturan ni Markus, Lukas om ni Yuanis so buuk nosiro, ono yo minomakai si Matius limo pontudukan.
1. Suat nu kogoyaan otoop so lobuw poimaid (pasal 5-7).
2. Suat nu gogoma'on otoop so lobuw poimaid paabar nu Abar Owarong so pilolongkop nu wonuo (pasal 10).
3. Salig-salig ni Yisus suat so Pogkuosaan nu Kinoringan (pasal 13).
4. Suat nu kogoyaan om kopogboya'an nu lobuw poimaid (pasal 18).
5. Suat nu Pogkuosaan nu Kinoringan om pongukuman so lobuw so pongoowi'an nu wonuo tu (pasal 24-25).
Buuk ni Matius iitu no monuturan kiat nu kinopuonakan so si Yisus, pinongodiu'an om pinonginaman so Iyo ri, om ginama' Niyo so Galilia. Dii so Galilia, minontuduk om minomali' si Yisus nu lobuw momakai nu kuasa nu Kinoringan. Noopod ono, buuk iitu potuturan nu pomponowan ni Yisus kiat so Galilia mian so Yirusalim, kinosonsora'an Niyo sampai minatoi so salib, om kinoluli'an Niyo ri.
Niabar ni Matius so buuk iitu no nu si Tuhan Yisus-o su Moomontuduk obana om kikopogboya'an Iyo poorati nu Ukum nu Kinoringan om montuduk suat so Pogkuosaan nu Kinoringan, nu mogkuasa Iyo soko raja.
Asuw nu Buuk
0. Ponimpuunan (1:1-2:23)
a. Daptar nu porookian ni Yisus (1:1-17)
b. Kinopuonakan so si Yisus (1:18-2:23)
1. Kologa'an nu Pogkuosaan nu Kinoringan (3:1-7:29)
a. Ponimpuunan nu Pogkuosaan ni Yisus (3:1-4:11)
– Diniu' si Yisus ni Yuanis Moongodiu' (3:1-17)
– Kininaman si Yisus nu Wowaidon nu Moinat (4:1-11)
b. Pontudukan suat so Pogkuosaan nu Kinoringan (4:12-25)
c. Pontudukan togna: Minontuduk si Yisus suat nu kogoyaan otoop so lobuw poimaid (5:1-7:29)
2. Gogoma'on nu Pogkuosaan nu Kinoringan (8:1-10:42)
a. Minomali' si Yisus nu lobuw sumakit om minomili' nu mompomaid Niyo (8:1-9:38)
b. Pontudukan koduo: Subai paabar nu Abar Owarong so pilolongkop nu wonuo (10:1-42)
3. Kogoyaan nu Pogkuosaan nu Kinoringan (11:1-13:58)
a. Isai si Yuanis om si Yisus (11:1-12:49)
b. Pontudukan kotolu: Salig-salig suat so Pogkuosaan nu Kinoringan (13:1-58)
4. Kopogboya'an nu Pogkuosaan nu Kinoringan (14:1-18:35)
a. Kogoyaan om kopogboya'an ni Yisus (14:1-17:27)
b. Pontudukan koopat: Kogoyaan om kopogboya'an nu lobuw poimaid (18:1-35)
5. Borakat om ukuman nu Pogkuosaan nu Kinoringan (19:1-25:46)
a. Kiat so Galilia mian so Yirusalim (19:1-20:34)
b. Minasuw si Yisus so Yirusalim soko raja (21:1-23:39)
c. Pontudukan kolimo: Pogkuosaan nu Kinoringan om pongukuman (24:1-25:46)
6. Kinosonsora'an om kinoluli'an ni Yisus (26:1-28:20)
Currently Selected:
Matius Pokoilaan: TomPWPgLgPn
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.