Matius 22

Salig-salig suat so rami-rami muontun

(Luk 14:15-24)

1Musolig-soligo po si Yisus montuduk nu lobuw suang-i nu, 2“Bang mogkuasa yo Kinoringan soko raja, gama' Niyo soko ido raja murami-rami nu montun anak niyo no. 3Suuo yo niyo kouriponan niyo ri pokoilo nu lobuw nosogina yo laid nu poianon so rami-rami oono nga dai ya minian. 4Monuuo po iyo nu kouriponan niyo wokon-i, om kinodawan nu, ‘Pokoiloo muyu yo lobuw nosogina yo laid iiri nu nosodia' yo kookanan tu, pinugaras ku yo kiawi' uyog om nosukod nu sapi owarong-i su nipolak ku. Poiano muyu yo nosiro tuui!’ koo. 5Nga dai ya pinoduli' nu lobuw nosogina yo laid oono, ala' nai' wokon minian so umo, wokon minian mupori, 6om wokon-i minongaakom nu ongo uripon sinuu' nu raja iri, linubak om pinatoi. 7Norongou-o po iri nu raja ri, sobana ko minungot iyo. Suuo yo sono niyo ongo soujar niyo ri, popomatoi nu lobuw minomatoi nu ongo uripon sinuu' niyo ri, om poponusul nu bandar nosiro. 8Paawo yo sono niyo kouriponan niyo ri, om tongaro yo nu, ‘Nokosodia' ku yo kiawi' kosukupan nu rami-rami ku tu, nga lobuw sinogina ri dai otoop lumoga'. 9Kosiono ian kou yo so pilolongkop nu bandar om soginaa muyu isai-a osambat muyu,’ koo. 10Momponowo yo sono kouriponan oono monogina nu lobuw so pilolongkop nu bandar-i. Nopupus iri, impugo yo nosiro kiawi' lobuw nosambat nosiro ri, dai tuna owarong ko' oraai om owito yo muli', sampai nodasok nu tombuoi waloi pinuromi-romian oono.

11Mosuwo yo sono raja ri monsiou nu tombuoi-i, nosiou sono niyo ido koyuwan dai minupokakas nu mutoop nu rami-rami muontun. 12Duato yo sono niyo lobuw iiri nu, ‘Oo lakitu, onu k'ikau ka masuw tuui so' dai ko ya minupokakas nu mutoop nu rami-rami muontun?’ koo. Dai ya sinumambut lobuw iiri. 13Tongaro yo sono nu raja ri kouriponan niyo ri nu, ‘Kogosi muyu akod longon nu lobuw oono om odai muyu so kotuongan. Nai yo iyo tumangi' om osonsara',’ koo,” koo si Yisus.#Mat 8:12; 25:30; Luk 13:28

14Ompusi yo ni Yisus salig-salig Niyo ri nu, “Osuang sinogina maid so Pogkuosaan nu Kinoringan, nga owako ya opili' masuw so Pogkuosaan oono,” koo.

Musingkoduat-duat suat so mongobarai nu sukai

(Mrk 12:13-17; Luk 20:20-26)

15Soko iri po, muupokato yo lobuw Parisi ri ong onu koo gama' mongoburunsut so si Yisus. 16Suuo yo sono nosiro ongo mompomaid nosiro ri om lobuw kiat so puimpugan ni Irudis mutangar so Iyo nu, “Oo Guru, oilaan mai nu Ikau-o po otulid inowoon. Montuduk Ko suat so koinginan nu Kinoringan nipogama' so lobuw, om dai Ko moominig. 17Pagka soko ono, obari kai yo onu pikiran Mu, suat so Ukum ni Musa nu kowasa toko ya ka mongobarai nu sukai so Raja Maayo nu Ruum#22:17: Raja Maayo nu Ruum, ono yo Kaisar. Siowan Kamus Kitab. ko' dai?” koo.

18Noilaan-a Niyo padu-padu oraai nosiro iiri, mutongaro yo sono Iyo nu, “Oo su lobuw musingkopoimaid-poimaid. Nokuro su mongoborunsut kou so Aku? 19Posiowo muyu Aku nu siin pongobarai muyu nu sukai oono!” koo.

Suloyi yo nosiro songkaping siin pirok dii so Iyo. 20Duato yo sono Niyo nosiro nu, “Isai ka so gambar om ngaran itu?” koo.

21Sumombuto yo nosiro nu, “Ni Kaisar, ono yo Raja Maayo nu Ruum,” koo.

Mutongaro yo sono Iyo so nosiro nu, “Bang soko ono, taaki muyu yo so wowaidon nu Ruum ong songapan niyo, om taaki muyu yo so Kinoringan ong songapan nu Kinoringan,” koo.

22Noiranan nosiro nu norongou sambut Niyo iiri. Soko iri po, linaiwan-a sono Iyo nosiro.

Musingkoduat-duat nu koluli'an kiat

so pinotoyan

(Mrk 12:18-27; Luk 20:27-40)

23Runat-a iiri, lumogaa yo dii si Yisus tinu-tinu lobuw Saduki. Lobuw-o po nu Saduki dai poimaid nu oluli'an lobuw minatoi. Indadi musingkoduat-duato yo nosiro so Iyo nu,#P'rapan 23:8 24“Oo Guru, minontuduk si Musa nu, ‘Bang kuwai kusoi kisawo yo om minatoi nu d'ado po anak, subai ontunon nu sulod niyo balu oono, su' kisolusuk kusoi minatoi iiri,’ koo.#Pom 25:5 25Indadi, gulu ri kuwai turu sonsulod tuui nu nokoontun ongko ri, nga d'ado po anak, minatoi-o. Balu niyo ri inontun nu sulod koduo ri, 26nga ado po anak, minatoi-o. Soko iri ya sulod kotolu sampai so koturu ri. 27Woinoi iiri nga minatoi-o sono. 28Na, bang ologa' yo pongoluli'an nu lobuw minatoi, isai gaam sono sawo nu woinoi iiri, so' turu sonsulod iiri nga nokoontun-a so iyo?” koo nosiro.

29Sumombuto yo si Yisus nu, “Sobana ko osala' pomikiran muyu so' dai kou koorati nu pontudukan so Buuk nu Kinoringan intawa onu yo po owaal Niyo. 30Mutangar Aku soko oono, so' lobuw minatoi-o oluli'an koimbagu. Nosiro soko susuu'on nu Kinoringan so surga sono, dai yo muontun. 31Indadi suat so koluli'an nu lobuw minatoi, tantu nokobasa' kou nu tinangar nu Kinoringan nu, 32‘Aku yo Kinoringan usaa'on ni Abraham, ni Isak, om ni Yakub,’ koo ri. Indadi, Iyo yo su Kinoringan nu lobuw miau, okon ko minatoi,” koo si Yisus.#Kin 3:6

33Sobana ko noiranan lobuw suang-i nu norongou pontudukan ni Yisus iiri.

Ponuu'an oogot sobana

(Mrk 12:28-34; Luk 10:25-28)

34Norongou-o po nu lobuw Parisi ri nu dai nokosambut lobuw Saduki ri so si Yisus, muimpugo yo sono nosiro muupakat mongoburunsut so Iyo. 35Mongoduato yo sono so Iyo ido moomontuduk nu Ukum mongoburunsut nu, 36“Oo Guru, ombo ka nu ponuu'an oogot sobana so kiawi' ponuu'an nu Ukum?” koo.

37Sumombuto yo si Yisus nu, “ ‘Somodi yo Kinoringan so onu yo po inowoon, kiro-kiroon om gogoma'on muyu,’ koo ri.#Pom 6:5 38Ono yo su ponuu'an oogot sobana. 39Soko ono ya ponuu'an koduo nu, ‘Somodi yo inong muyu, soko monamod kou nu kondiri,’ koo ri.#Ot 19:18 40Kiduo nu ponuu'an iitu no impuunon nu kiawi' Ukum nituduk ni Musa om pontudukan nu ongo poo'abar wokon nu Kinoringan,” koo si Yisus.

Musingkoduat-duat suat so Raja Nijanji

nu Kinoringan

(Mrk 12:35-37; Luk 20:41-44)

41Dai po noongoias lobuw Parisi minuimpug iiri, duato yo ni Yisus nosiro nu, 42“Ponokod muyu, isai ka so solusuk Raja Nijanji nu Kinoringan oono?” koo Iyo.

Sumombuto yo nosiro nu, “Solusuk ni Raja Daud!” koo.

43Mutongaro yo si Yisus nu, “Bang soko ono, nokuro su tinudukan si Daud nu Atod nu Kinoringan mongingaran so Iyo nu, ‘Tuhan’? So' minutangar iyo nu,

44‘Minutangar TUHAN Kinoringan

so Tuhan Ku nu,

Ogom-o umpak so wanan Ku,

om kiawi' alod-alod Mu no

ipodoog Ku so Ikau!’

koo ri.#Lgu 110:1 45Sobana ko nosala' kou, so' monokod kou nu Raja Nijanji nu Kinoringan oono, solusuk-a ni Raja Daud so' paawon niyo Raja Nijanji nu Kinoringan oono nu ‘Tuhan ku’,” koo si Yisus.

46Ado ido nokosambut so si Yisus, om kiat-o nu runat iiri, d'ado yo sono kooku' mongoduat so Iyo nu onu-onu ya.

Currently Selected:

Matius 22: TomPWPgLgPn

Highlight

Copy

Compare