Matius 2

Ongo tombuoi kiat so wonuo so pusitan

1Nopuanak-o po si Yisus so Baitlahim so wonuo nu Yudia, iya ni Irudis nosiliw nu raja so tontong oono, lumogaa yo so Yirusalim ongo lobuw ungkiat so pusitan koorati nu korombituon, gama' nosiro kaalap nu pongoilaan. 2Mongoduato yo nosiro nu, “Siombo ka lolaing nopuanak sumiliw nu raja nu lobuw Yaudi? Nosiou mai korombituon Niyo minusit umpak so pusitan, om lumoga' kai mongusaa' so Iyo,” koo.

3Norongou-o po iri ni Raja Irudis, inumagut sono inawo niyo ri, om soko iri ya pudi kiawi' lobuw so Yirusalim-i. 4Impugo yo sono niyo kiawi' wowaidon nu imam om moomontuduk nu Ukum om duato yo niyo nu, “Siombo ka kolongusan nu Raja Nijanji nu Kinoringan oono?” koo.

5Sumombuto yo nosiro nu, “Dii so bandar Baitlahim so wonuo nu Yudia, so' ono yo su sinurat nu ido poo'abar nu Kinoringan gulu ri nu,

6‘Ikau Baitlahim, so wonuo nu Yudia,

ikau-o su obantug po ko'

ongo bandar maayo so Yudia,

so' lumoga' ido koyuwan kiat nai so ikau ourug nu wowaidon,

mogkuasa nu lobuw Israil,’

koo ri,” koo nosiro.#Mi 5:2

7Indadi mokimuupokato yo sono si Irudis nu kolobuwan kiat so pusitan iiri, siro ya siro, om duato yo niyo ong sombiya kinousitan nu korombituon nosiou nosiro ri. 8Nopupus iri, suuo yo sono niyo nosiro poian so Baitlahim om kinodawan nu, “Ian kou yo om diumo muyu yo lolaing oono. Ooyangan muyu yo, obari muyu sono aku su' aku nga mian-a mongusaa' so Iyo,” koo.

9-10Mungkoyaso yo sono nosiro. Laid nosiro manou-panou, nosiou-o nosiro koimbagu korombituon minusit umpak so pusitan-i, om sobana ko osudu' nosiro nu iiri! Minsid korombituon iiri so sunduran nosiro, om minintoron so tontong kinopolakan nu lolaing-i. 11Mosuwo yo nosiro so waloi iiri, om nosiou-o sono nosiro Anak-i maid nu ino Niyo, si Maria. Sumurukudo yo sono nosiro mongusaa', om yoyaso yo nosiro niongotungkap nosiro ri, ono yo omas, komanyan, om muur.#2:11: komanyan om muur: Siowan Kamus Kitab.

12Tolangi yo sono nu upian ongo lobuw kiat so pusitan iiri nu Kinoringan, nu dai popululi'on dii si Irudis. Pagka soko iri maido ya nosiro nu lalan sondiang muli' so wonuo nosiro.

Linaiwan so Masir

13Nokopanou-o po lobuw koorati nu korombituon iiri, mutongaro yo sono susuu'on nu Kinoringan so si Yusup so upian niyo nu, “Diumon ni Irudis lolaing iitu nu potoyon. Indadi rioso, owito yo duo muino ono mulaiw so Masir, om molak kou po dii musingkopululi' Ku pokoilo so kou koimbagu,” koo susuu'on-i.

14Norios-o po si Yusup, owito yo sono niyo duo muino oono mungkayas so Masir nu awi ya iiri. 15Minogol nosiro so Masir musingkopatoi ni Raja Irudis. Notuman-o sono tangar nu Kinoringan nituturan nu poo'abar Niyo gulu ri nu, “Paawon Ku Anak Ku no kiat so Masir,” koo ri.#Us 11:1

Pinomotoyan nu kololaingan

16Noilaan-o po ni Raja Irudis nu inokalan iyo nu lobuw ungkiat so pusitan-i, minungot sobana iyo. Monuuo yo sono iyo nu lobuw niyo ri popomatoi nu kiawi' lolaing kusoi so wonuo nu Baitlahim, ungkiat so lolaing koopuanak om umur duo notoun. Ginama' niyo iri musuat nu norongou niyo so ongo lobuw kiat pusitan-i nu iya kinousitan nu korombituon iiri.

17Soko ono yo nourug tayon ong otuman tinangar ni Yirimia, poo'abar nu Kinoringan gulu ri nu,

18“Kuwai lobuw tumangi'

orongou so Rama.

Mongusoi si Rahil

nu inonakan niyo

om dai oinsosomodan,

so' kiawi' inonakan niyo no nopatoi,”

koo ri.#Yir 31:15

Minuli' si Yusup kiat so Masir

19Minatoi-o po si Raja Irudis, tolangi yo si Yusup so Masir nu susuu'on nu Kinoringan so upian niyo. 20Mutongaro yo susuu'on-i nu, “Rioso om owito yo duo muino no muli' so Israil, so' minatoi-o ongo lobuw mokipopomatoi nu Anak oono,” koo. 21Rumioso yo si Yusup, om owito yo niyo duo muino ri muli' so Israil.

22Nga lumaa' si Yusup mogol dii, so' norongou niyo nu iri ya anak ni Irudis, si Arkilaus su nokoganti' nu amo niyo nosiliw nu raja so tontong iiri. Notudukan po iyo so upian niyo, murongkato yo sono iyo so wonuo nu Galilia, 23om minogol iyo so bandar Najarit. Indadi, notuman-o sono tinangar nu ongo poo'abar nu Kinoringan gulu ri nu, “Paawon Iyo nu lobuw Najarit,” koo ri.#Mrk 1:24; Luk 2:39; Yns 1:45

Currently Selected:

Matius 2: TomPWPgLgPn

Highlight

Copy