Pinongoorapan 27

Linumayag si Paulus so Ruum

1Notapus-o po ni Pistus nu subai lumayag kai si Paulus so Ruum so wonuo Italia, si Paulus om tinu-tinu lobuw tinaan wokon-i nipaarap sono so si Yulius wowaidon nu posukan nu soujar nu Ruum, iri ingoranan nu Posukan nu Raja Maayo. 2Sumokoyo kai yo so kapal iri nokologa' kiat so Aduramitium, om uyud-o mian so dududulan so Asia. Si Aristarkus, kiat so bandar Tisalunika so wonuo nu Makadunia, nokowaid-a so kai. 3Susuab-i nokologa' kai yo so Sidun. Sobana ko owarong si Yulius so si Paulus, om linila'an iyo sumambat nu kouna'an niyo dii su' otaakan nu onu ya kosukupan. 4Kiat dii, lumombuso kai yo lumayag, nga pagka nosunsulakan mai uos-i, linumayag kai ya sono yumuyuw so imbing nu puru Siprus, nu dai otouruk. 5Kiat dii, sinumondipau kai so otingkuangan nu Kilikia om Pampilia, om nokodudul kai so Mira so wonuo nu Likia. 6Dii yo kinooyangan nu wowaidon nu soujar-i nu kapal kiat so Aliksandria, nu uyud-o lumayag so Italia. Nadi popindaa kai yo sono so kapal iiri.

7Kotinu-tinuan kai mayag-layag nu obuut sobana, om osuang kosonsora'an mai, nga nokologa' kai ya so bandar Konidus. Pagka opogon sobana su uos, dai kai nokolombus lumayag tumolunda' so sunduran mai. Indadi linumayag kai sono umpak so puru Kiriti, tumalib so tomui ingoranan nu Salmuni, su' dai kai otouruk. 8Sobana ko orogonan kai lumayag yumuyuw so puru oono, nga nokolulut kai ya lumoga' so tontong ingoranan nu Dududulan Oparu', orani yo so bandar Lasia.

9Olaid kai mudul-dudul dii sampai notaiwan kai nu iya okon ko owarong loloyagan, ono yo nokotalib-o Rami-Rami Pongompunan nu Koraayan.#27:9: Rami-Rami Pongompunan nu Koraayan (Siowan Kamus Kitab). Runat oono romayon nu uyud-uyud pongoowi'an nu wulan kosiwoi intawa ponimpuunan nu wulan kopulu, iya nu kopogonan nu uos om kolaa'-laa' lumayag. Pagka soko iri, mutongaro yo si Paulus nu, 10“Oo su kosusulodan, so pomikiran ku, sobana ko aagut ong lumombus toko yo lumayag, so' okon ko gonggamon toko ya intawa kapal toko tu su obinasa, nga insan toko matoi,” koo. 11-12Dinudulan mai ri dai owarong ong kodarun. Iri yo ko' kosuangan nu lobuw so kapal-i mokilolaiw kiat dii om mokilologa' so Pinikis, mogol dii musingkotalib nu kodarun-i. Pinikis oono yo dududulan so puru Kiriti, umpak so lidopan. Nga dai nopoimaid wowaidon nu soujar oono nu tinangar ni Paulus, toroido ya niyo poimaid so moomongkuyut nu kapal-i om songapan nu kapal oono.

Uos opogon so raat

13Muos-o sono kiat so solatan nu dai ya opogon bana. Iri yo ko', ponontaman nu kukumoraja so kapal-i nu kolayag-a nosiro koimbagu. Nadi pudiko yo nosiro su jangkar om lumombuso kai yo lumayag yumuyuw so puru Kiriti. 14Nga dai po olaid om muos-o sono nu opogon kiat so tidong, ingoranan nu Uos nu Raat Pusitan, 15nokotouruk nu kapal mai. Pagka dai kai kosundur, pinosimaidan mai ya kapal mai ri otouruk. 16Laid mai tumalib umpak so diipau nu puru Kouda oworos-i, dai kai otouruk bana, om dii yo pinogkori'-kori'an mai posakoi nu alud woros-i. 17Nokosakoi mai yo po alud-i, pioto mai yo pokogos. Pagka lumaa' kai kodampar so bolintang Sirtis so wonuo Libia, luluno mai yo layag-i om pinosimaidan mai ya otouruk. 18Nga pagka kakal-a opogon su uos, sampai nologa' yo susuab, tobungi mai yo sono gonggamon so kapal mai ri. 19So kotolu ri, tobungi yo nu kukumoraja so kapal oono kolongkapan nu kapal-i. 20Kotinu-tinuan dai kai nokosiou nu runat om korombituon, om kakal-a opogon su uos, sampai d'ado yo tontam mai nu miau kai po.

21Olaid-o nosiro dai nokookan, mundiio yo sono si Paulus om mutongaro yo nu, “Oo kosusulodan, bang minongimaid kou nu tangar ku nu adang toko po lumombus kiat so Kiriti, dai toko ya kobambor nu koogutan om korugian iitu. 22Nga kosiono tu, mindamo aku so kou nu pototogo muyu yo inawo muyu no, so' d'ado ya opatoi so kou, sondiang ko kapal toko tu su ousiba'. 23Minutangar aku soko ono so' siawi linumoga' susuu'on nu Kinoringan so aku, iri Kinoringan usaa'on ku om minonongapan so aku ri. 24Minutangar susuu'on iiri so aku nu, ‘Oo Paulus, ikod-a kilaa', so' tantu tumingkuang ko dii si Raja Maayo Ruum, om maid nu koowarong nu inawo nu Kinoringan so ikau, osopulan-a kiawi' kouna'an mu no,’ koo. 25Indadi, pototapon-o inawo muyu no, so' koimaid aku so Kinoringan nu otuman-a onu yo po tinangar so aku oono, 26nga kodampar toko ya ong wagu so ido puru,” koo si Paulus.

27Kiro-kiro tonga' nu awi nu koopulu om opat runat-i, mantung-lantung kai yo so Raat Lintonga'. Kukumoraja so kapal oono koirasa nu mompit-rompit kapal mai so imbing. 28Nopouluw sono nosiro nu watu kinogosan nu tali, monukud ong komuro po kolalom, om noilaan sono nosiro nu koolalom-i duo po nopulu rinopaan. Dai po olaid sinukud-o nosiro koimbagu, om kolalom-i opulu po om limo rinopaan sono. 29Pagka lumaa' nosiro nu kososod kapal-i so watu, nopotobung sono nosiro nu opat jangkar umpak so muri nu kapal-i, om murosiou bana nosiro nu susuab-o sono. 30Mokisosolinok sono mulaiw kukumoraja so kapal oono om nopotobung-o nu alud woros, soko potobung kolaai nu jangkar umpak so dulung nu kapal-i. 31Nga tongaro yo ni Paulus wowaidon nu soujar om soujar wokon-i nu, “Bang dai tumotog kukumoraja so kapal tu, olosod kou kiawi',” koo. 32Indadi totoko yo sono nu soujar-i kogos nu alud woros-i pooba'.

33Duruk sumuab-i, ingoli yo ni Paulus nosiro mongokan om mutongaro yo nu, “Duo yo nominggu laid muyu mongimat, om d'ado onu-onu inokan. 34Mindamo aku so kou nu pongokan kou po insan sabat-a, su' osigag kou koimbagu, om osopulan kou, om d'ado ido so kou opolisasa,” koo si Paulus. 35Mongolapo yo sono iyo nu baang-baang, om mongunsopoto yo so Tuhan so tiningkuangon nosiro ri. Noopod iri, boogio yo sono niyo baang-baang-i, om mongokano yo. 36Nosiou-o po nosiro nu soko iri winaal ni Paulus, aarap-o sono nosiro, om mongokano yo. 37Koosampuw nu lobuw so kapal iiri duo naatus turu nopulu om onom. 38Noopod-o po nosiro mongokan, odai yo nosiro gandum so kapal-i su' oinggaanan.

Nokososod su kapal

39Susuab-i po, nokosiou-o sono kukumoraja so kapal-i nu tona'on, nga dai otondu'an nosiro. Nokosiou-o nosiro nu linsuk noosakan su pantai, mokidududul sono nosiro dii. 40Totoko yo nosiro tali pinongkogos nu jangkar-i, om pinosimaidan-a ololok. Uyado yo nosiro pinonawur nu bonsaan-i, om kokaro yo nosiro layag umpak so dulung, su' otouruk so imbing-i. 41Nga nokososod dulung nu kapal-i om dai muad gumuyu'. Muri nu kapal-i nga nouyas nu gumbang ologod.

42Mokipopomatoi sono soujar-i nu lobuw notaan-i so' lumaa' nosiro ong wokon-i tumoyog mulaiw. 43Nga pinogos-a nosiro nu wowaidon nu soujar-i so' mokipoponapul-a iyo so si Paulus. Suuo yo niyo lobuw wokon-i popogulu tumoyog rumapit, 44om wokon-i sumusuut-a tumoyog kumuyut so papan nodinsar so kapal-i. Soko iri yo korapit-rapit mai.

Currently Selected:

Pinongoorapan 27: TomPWPgLgPn

Highlight

Copy

Compare