OMAPISALOMI 1
1
EMBO LYOTANGO
(Omapisalomi 1-41)
Uunelagolela
1Aanelago oomboka ihaaya landula oondunge dhaagoyoki,
ihaa holele iilonga yaalunde
yo ihaa kala pamwe naashekedhi.
2Ndele ohaa nyanyukilwa okuvulika kompango yOmuwa
nohaye yi ilongo omutenya nuusiku.
3Oyo ya fa omiti dha mena mooha dhomatondokelo gomeya,
hadhi imi pethimbo lyu uthwa,
nomafo gadho ihaga ganya.
Ashihe shoka taye shi longo otashi eta eyambeko.
4Aakolokoshi hasho ye li ngeyi;
oya fa etutu tali falafalwa kombepo.
5Aalunde otaa ka tsakaneka epangulo lyaKalunga
e taa ka yoololwa mo maantu yaKalunga.
6Aayuuki otaa wilikwa notaa gamenwa kOmuwa,
ihe ondjila yaagoyoki oyu uka mekano.
Currently Selected:
OMAPISALOMI 1: ONDB
Highlight
Share
Copy
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.