IILONGA 1
1
Omusimanekwa Teofilus
1Membo lyandje lyotango onda nyola nokuhokolola iinima mbyoka Jesus a ningi nokwe yi longo aantu okuza kethimbo ndyoka a tameke iilonga ye 2sigo okesiku ndyoka a falwa megulu. Manga inaa falwa megulu, okwa pe aayapostoli mboka e ya hogolola, omalombwelo koonkondo dhOmbepo Ondjapuki. 3Methimbo lyuule womasiku omilongo ne konima yeso lye, okwe ya ihololele olwindji pomathimbo gi ili nogi ili e te ya ulukile sha yela kutya ye okwa yumuka noku na omwenyo. Oye okwe ya ihololele nokwa kundathana nayo kombinga yOshilongo shaKalunga. 4Ano sho ya li ya gongala, okwe ya lombwele a ti: “Inamu za mo muJerusalem, ihe tegeleleni, mu pewe omagano ngoka Tate e ga uvaneka, ogo tuu ngoka ngame nde ge mu lombwele. 5Oshoka Johannes okwa shasha aantu nomeya, ihe konima yomasiku gamwe otamu ka shashwa nOmbepo Ondjapuki.”
Jesus ta yi megulu
6Aalongwa manga ya li ya gongala pamwe naJesus, oye mu pula ya ti: “Omuwa, uunake ano to ka pa Aaisraeli Oshilongo?”
7Jesus okwe ya yamukula a ti: “Tate oye awike e na oonkondo okutokola, iinima mbyoka uuna tayi ka ningwa. Ne itamu vulu okutseya, uuna tashi ka ningwa. 8Ihe one otamu ka pewa oonkondo, uuna Ombepo Ondjapuki ta ka tililwa mune. Nena one otamu ka ninga oonzapo dhokuhokolola ndje paantu ayehe mboka ye li muJerusalem, muJudea alihe nomuSamaria sigo omiilongo ayihe yokombanda yevi.” 9Jesus sho a mana okupopya oohapu ndhika, okwa yeluthwa pombanda montaneho yaalongwa. Oye okwa yi moshikogo, yo inaye mu mona we.
10Ano aalongwa sho ya li ya tongolola natango kegulu, taa ligamene, Jesus sho ta yi, ohaluka opwa holoka aalumentu yaali ya zala oonguwo oontokele e taa thikama puyo. 11Aalumentu mboka oya ti kuyo: “Aalumentu ne Aagalilea, omolwashike mwa thikama mpoka nomwa tala kegulu? Jesus tuu nguka a kuthwa pune a falwa megulu, ota ka galuka pamukalo naanaa ngoka mwe mu mono, sho ta yi megulu.”
Omupingeni gwaJudas
12Nena aayapostoli oya zi kOndundu yooholivi, ndjoka yi li popepi noshilando, oshikako shuule wokilometa yimwe, e taa yi kuJerusalem. 13Sho ya thiki muJerusalem, oya yi mondjugo yopombanda moka ya li haa kala shito. Oyo Petrus, Johannes, Jakob naAndreas, Filippus naTomas, Bartolomeus naMateus, Jakob yaAlfeus, Simon omulaadhi naJudas yaJakob. 14Oyo ayehe oya kala nokugongala olwindji nokugalikana mongundu pamwe nooitaali aakiintu naMaria, yina yaJesus, naamwayina yaJesus aalumentu.
15Omasiku gamwe sho ga piti po, okwa ningwa oshigongi shooitaali, aantu ye thike pethele limwe nomilongo mbali. Petrus okwa thikama mokati kawo e ta ti: 16“Aalumentu ne ooyakwetu, enyolo ndyoka Ombepo Ondjapuki ye li popi mokana kaDavid, oli na okugwanithwa. Olyo otali popi Judas, ngoka a ningi omuwiliki gwaantu mboka ya kwata Jesus. 17Judas okwa li gumwe gwomongundu yetu, oshoka oye okwa li a hogololwa, a longe pamwe natse.”
18(Iimaliwa mbyoka Judas e yi pewa, sho a longo oshilonga shuukolokoshi, okwe yi landa epya, nomepya tuu moka okwi ihata po e ta si. Oye okwa topa niinima ayihe yomela lye oya tika mo. 19Aantu ayehe mboka ya kala muJerusalem, oye shi uvu. Onkee epya ndika ohaye li ithana melaka lyawo Akeldama, tashi ti “Epya lyombinzi”.)
20“Oshoka membo lyOmapisalomi omwa nyolwa:
‘Egumbo lye nali ninge oshithigwapo,
mwaa kale nando omuntu.’
Okwa nyolwa ishewe:
‘Oshilonga she nashi pewe omuntu gulwe.’
21-22“Onkee ano omulumentu gulwe na ninge onzapo yokuhokolola eyumuko lyOmuwa Jesus pamwe natse. Oye oku na okukala gumwe gwaamboka ya li ya kala mongundu yetu ethimbo alihe ndyoka Omuwa Jesus a li te ende pamwe natse, okuza kethimbo ndyoka Johannes a li tu uvitha e ta shasha, sigo okesiku ndyoka Kalunga a kutha po Jesus putse nokwe mu fala megulu.”
23Nena oyo oya yoolola mo aalumentu yaali: Josef, ngoka hi ithanwa Barsabas, oongoka haku tiwa wo Justus, naMatias. 24Opo ihe oya galikana ya ti: “Omuwa, ongoye wa tseya omitima dhaantu ayehe. Tu ulukila ano, Omuwa, oguni po paalumentu mboka yaali ngoka we mu hogolola, 25a ninge omuyapostoli peha lyaJudas, ngoka a thigi po oshilonga shika nokwa yi kehala ndyoka e li ilongela.” 26Konima yaashika oyo oya longitha oshihogololitho okuhogolola po gumwe. Oshihogololitho osha kwata po Matias, oye nokwa yalulilwa ihe mongundu yaayapostoli mbeyaka omulongo nagumwe.
Currently Selected:
IILONGA 1: ONDB
Highlight
Share
Copy
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.