Гъэсэпэтхыдэхэр 27
27
ТӀОЩӀРЭ ЕБЛАНЭ ӀЫХЬЭ
1Пщэдейрей махуэхэмкӀэ узыщымытхъуж,
пщӀэркъым абы къыпхуахьыну псор зыхуэдэр.
2Узыщымытхъуж, умыхъу щытхъущхьэхуэӀуатэ,
нэгъуэщӀым уи цӀэр кърыреӀуэ,
ирехъу ар уи фӀыщӀэӀуатэ.
3ХьэлъафӀэщ мывэр,
псынщӀагъуэу щыткъым пшахъуэр,
ауэ акъылыншэм къуит бампӀэгъуэр нэхъ
хьэлъэжщ.
4ГущӀэгъу ищӀэркъым губжьам,
губжьыхри ӀэубыдыпӀэншэщ,
ауэ гурыщхъуэщӀыр псоми ятокӀуэж.
5Лъагъуныгъэ мыӀуатэм нэхърэ
гие нахуэр куэдкӀэ нэхъыфӀщ.
6Жагъуэгъум и фоупс псалъэу#27:6 Журт. «и ба пщтырхэу». узытхьэлэм нэхърэ
ныбжьэгъу пэж и псалъэ пхъашэхэр
нэхъыфӀщ, уауӀэу щытми.
7Ныбэизым фо хьэкӀуэри щыкӀуэркъым,
мэжэщӀалӀэм дыджри ӀэфӀ къыщохъу.
8Абгъуэхъуэж зыщӀа бзум хуэдэщ
и унэ зыбгына цӀыхур.
9Дыхумрэ щыхуэн дагъэ гуакӀуэмрэ гум
зэрыӀэпихым хуэдэу
гухэхъуэщ ныбжьэгъу и чэнджэщыфӀхэм
уедэӀуэнри.
10Уи щауэгъурэ уи адэ и ныбжьэгъужьрэ
умыбгынэ;
ущыгузавэми Ӏыхьлым я деж умыжэ,
къуэш жыжьэ нэхърэ ныбжьэгъу гъунэгъур
куэдкӀэ нэхъ къыпщхьэпэнущ.
11Тет дунейм цӀыху Ӏущу, щӀалэ, сигу хэгъахъуэ,
сщӀэнущ мис итӀанэ жесӀэнур сызижагъуэм.
12ЩилъагъукӀэ цӀыху губзыгъэм къыпэщылъ
шынагъуэр – зыхуещӀ пэӀэщӀэ,
жыӀэзыфӀэщым и гъуэгу и занщӀэщ –
къекӀынщ и лажьэ бзаджэр.
13Хамэм шэс хуэхъуам и щыгъын щӀыӀутелъыр
тхьэкъу,
шэсыпӀэ къинам ар уи шэс щӀыхуэм пэкӀуэу
фӀэубыд.
14Пщэдджыжь нэмэзым и макъ къызэрихькӀэ
и гъунэгъу фӀэхъускӀэ жьэхыхьэм
гыбзафэкӀэ щӀигъанэущ абы зэрилъытэнур.
15Уэшх къешхым и Ӏэуэлъауэ зэпымыужым хуэдэу
фыз жьэмыгъэпсэхури шэчыгъуейщ;
16ар зыубыдыну иужь ихьэр – жьыбгъэр иубыдыну
е ӀэкӀэ дагъэр зыӀэщӀикъузэну елӀалӀэм хуэдэщ.
17ГъущӀыр гъущӀым егъэжан,
цӀыхури цӀыху щӀыжщ.
18 Ахъуэ жыг хадэр елӀалӀэу зыщӀэм и бэври
кърихьэлӀэжынщ,
зи унафэщӀ хуэмыбэлэрыгъми пщӀэ иӀэнщ.
19Псым хэплъэм и нэгур къызэрытещым хуэдэу
цӀыхум и гум еплъым ар зищӀысыр
къилъэгъунщ.
20Хьэдрыхэ лъахэм ищӀэкъым зыгъэнщӀ жыхуаӀэр,
цӀыхум и хъуапсэхэри икӀкъым.
21Дыжьыныр ягъэджылри япщэж,
дыщэри ягъэткӀури якӀыщтэ,
цӀыхури щытхъукӀэ ягъэунэху.
22Гуэдзым ещхьу делэр гухъукӀэ бгуми,
и делагъэр къыхэбгуфыкӀынукъым.
23Уи хъушэхэм кӀэлъыплъ зэпыт,
уи Ӏэщхэми уи нэӀэ ятегъэт:
24мылъкур уэсэпсым хуэдэщ, мэкӀуэдыж,
тетыгъуэри адэжь щӀэину игъащӀэкӀэ
зэӀэпахынкъым.
25Мэкъу Ӏэнэр ящтэжу удзыщӀэр
къыщызэщӀэрыуэжкӀэ,
мэкъупӀэхэм аргъынэр щыхадзэжкӀэ,
26укъахуэпэнщ уи щынэщӀылъхухэм,
бжэн хъушэри къыпхуэхъунщ уэ щӀапӀэ уасэ.
27Уи щхьэм щхьэкӀи, бынунэм папщӀи,
унэӀут цӀыхубзхэми Ӏыхьэ къахухэкӀыу
уиӀэнщ бжэнышэр мис итӀанэ уэ къолыжу.
Currently Selected:
Гъэсэпэтхыдэхэр 27: АдгФЛ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2009, 2018, 2021
