Tito 1
1
Pablo itijwile pa Tito
1Ampey isiecha Tito,#2 Co 8.23; Gl 2.1-3 ya'am Pablok'i'm ti ip'isinik atate'a. Ya'am ti ijiate ti Sinia' jikawok'i'm, jla'yi ti Sijwajieti Jesús jijliujwanik'i'm. Sijwajieti Jesús sijliuyi napoka ti Sinia' pajk'i ti it'iajats'i, ka iyo yamtikie' k'iye napoka, 'nakayi ka intankiunisi pi Sinia', jla'yi ka intant'ieje siu'nie akinieje ti ijiatk'i. 2'Naka siunie awoki ti je niliak, tajle naka ti ijiate ti 'yaka ti anejejwiyejenk'iye, ti kasjatoni jana si'wasankiye ti t'o'n. Si'wasankiye siojona ti Sinia' pajk'i ti ijwi'il ti 'nelanjie'e lajlik'iji pa 'ni ajnat. Sinia' je nak i'nio' ti iyo sintiye. 3Siuti yiyeyi janak jloma, jlam ti Sijwajieti, 'yakajanit ti ijiate ti jitiej iyomik'i'm siuniwa jlamtis ti iyo ka yamtiyi k'iye.
4Tito, a'm ti awo yasa'a'm, siu'nie awoki ti ijiate ti 'es. 'Esiji ka Sinia', jla'yi pa Saka'niona Jesús ti Sijwajieti imp'elisimpe, jla'yi ti ja akama.
Tito jikimet yi'i japa Creta, ajnat ti i'niat itijwape'n
5Siukia ti i'wanjlipe Crétaja, jlam sek aleyi'ipe, 'yina ti awo ka iliyi ajap siukia isijmaye ti awo, ka ateme pet siukia 'wanjle'e jota iyoyi. Nakape ti awo ka awojyi'n papo ka intajlits'i niwa isi'il ka ekiaj'le ka inkie'e pet napo ijia Sinia' jilis. 6Siupapo jaki'mik'i, janapokaye ti ja lajk'i paka k'iejliyeyi paka jitis iwo, 'nakayi ti ja lajk'i paka inamiteje'n; jla'yi ti jijwa'yis ja ke 'lojwa; siupapo ti jilis ti po', janwoyi ki inamtik, jank'iuye papo jiniewot, 'nakayi ti ja lajk'i paka tiliakiki, ka iwoyi ni je 'es.
7Tepa jawo ka kiak je iwo ka nakataja ka'ye'en siunie Sinia' yikiajle, kajeyepa ti naka ti jikijmaye. It'imina ti ti'yenatajats'i, siunapo ti inilesaniji'ni wata'a. Siunie ti je initoniti ti jwajla'a ti 'yije'en. Ja ke nakaye ni siunie jiwak je tojwi'. Ja ke nakaye siunie 'yata. Ja ke nakaye siunie ti yimi'n ti inilanejen'ni napo ijia; ja nakaye siunie ti ja ke inteliaja siojona wikiniet'aj ti inkajlajnat. 8Ja nakaye siunie ti t'oniye je ijwisi'ne ilia'm siunapo ijioyi'ni. Ja nakaye siunie ti janemi'n ni 'es. Ja ke nakaye siunie ti je i'yene siunie jawoyi; ja 'esieje'n ni i'nio'; janilesaniji jitieyi'i pi Sinia'; nakaye siunie itiant'ieje ti je 'esta ni iyoyi. 9Ja nakaye siunie i'nio' ti je paj ka inkiwaliyi'i ni inamtik ti ijiatk'i, siunie ti t'eyasanaja, ja'nakayeyi pet ti jankajli ti jankelaja ni inka'neyasajnaye ti 'es ti tajle ni Sinia', napo ijia. Sek jane'yi siunapo ti tejetie ilia'm ja jlamape wek ti jank'iuyisie.#1 Ti 3.2-7
10'Yina je pini' siunapo ti iwit'iane siunie ijiate ti 'es, siuniwa jlamtis iyo laj lajaye, ik'emijiet napo i'nio'. Siunapo Judíojos ti yame pet pa iyot'iyipi pet pa Saka'niona Jesús, napoka ti iyo'ate, “Wikie'eyi siunapo Sinia' jilis pet je 'esiji ka lajak'ipa ka ineyi siunie tiwonaja ti t'isie'n jiwa tejwak'i ni i'nio'.”
11Ya'am awo'ate, ¡kiejak'i ape'e niwa jikiwitawa napoka!, 'yina ti najata jla'am i'yenis ti ka jikaja poyeyis ape'e siunie ti taka'neyasane, jlam'ne je 'es siunie ijwi'il ka'neyasane napo i'nio', 'wenajliyi ti initiajnatk'iji'n napo i'nio' wikie'eyi napo ji'wet jlele.
12Creta jlelejimpe paka ti iyo'ate ti ijwi'il papo ijia tajla'm, “Jlam kia'iyo napoka Creta jlele, sintijyis, iyo'ate siuniwa pini' yi 'lajni ti jwesis, jlak je iliatk'iji'n, jla'yi ti kajlojoties.” 13'Yina jlam je iyo ti ijwi'l. Jak je iyo ti kiak awo'nase, 'esiji ka a'lej t'onitiapk'i siuti jajloyi napoka i'nio'. Kiak iyoyi, ja 'nakayeyijna'a ti jiwa ja ke inlane ni jitienkiujnieye ti 'es, 14ja'nakayeyijna'a ka je ineki siuniwa iyot'iyipi papo inia'an sik'ioye ti tajle napo Judíojos, siu'neje niwa ye'laja tajle pit siupapo ti pajk'i ti iliyi siukia ijiatk'i.
15Siunapo i'nio' ti 'esk'i ni jitienkiujnieye je ijwil ka jiniliajaye pet siupuwa i'wi'in. Jlampet siunapo ti takakiunisi kiwa Saka'niona jlamtis, je 'es ni jitienkiujnieye, kia'iyo pit ijwilis niwa wask'i'nelaja je isis. Tepa jawo ka kiak je iwo ti yamayi'i pet ni jitienkiujnieye jla'yi ni jlosik, ti wuj ti t'ojli. 16Ijwil ka intant'ieje pi Sinia', jlam'ne siunie jikijmaye iyo 'yakajanit ti jla'm iyo ti ijwil ka intant'ieje. Ikama ape'e ni jike' iyo, ti teje'yi ilia'm niwa Sinia' jlamtis. Je paj ka inkajli ka woyi paka 'esiek'i.
Currently Selected:
Tito 1: CRT97
Highlight
Share
Copy
Want to have your highlights saved across all your devices? Sign up or sign in
Nuevo Testamento en Chorote © Sociedades Biblicas Unidas, 1997.