Lucas 1
1
1'Loj napo i'nio' ilisantaja'ni siuniwa iyopi ki awoki ti sa'am, ti iyotaja ka insesk'iyi, 2iyopi siojopo ti i'winis ti 'nelanjie'e, ti jlamis ti iyo wosa' kiwa inamtis. 3Teófilo#Hch 1.1 ti i'nes, kia'awo ti atemayi ti a'ye'en ti alesaniji, ti atajlap'e siuki iyo ti 'nelanjie'e. A'wen'ne ti 'esi'n siukia alesane pet, sekyi'i ti awoyeyi ka ijliu'wa. 4Ja 'nakayeyijna'a ka intant'iejeje pet, ti ijiatk'i siuki iyo kia ti 'neyasanaja ti 'nelanjie'e.
Injlojwanik poli jlele ijwi'il pa Juan inajiejnawo ti k'iejli janejyi'n
5Pakajanijk'ipe ti Herodes#1.5 Herodes siupa jlamt'iyijipe (1.5) yi'i ti iyo anechiyasa', siojopa ajnat Judea, 'yina po' pa i'nio' jle' iyo'ate Zacarías ti pa'yi, ti tajla'm napo i'nio' Abías ti pa'yijis.#1 Cr 24.7-18 Siojopa jik'iemjla jle' iyo'ate Elisabet, tajla'm pet siupa i'nio' t'ipi Aarón. 6Wuj ti isisi'n jitieyi'i pa Sinia', jla'yi ti yamjliyi ti yame ki iyo kiwa Sinia' jlamtis, siu'neje kiwa iyo ka tiwoki pa Sinia', jak je iyoyiji ka poye paka injwe'el, ka k'iejliyeyi paka ijnotkina paka woyisi. 7'Yina laj jilisa', kajeyepa ti jla'am kia'iyo ta'a japa Elisabet ti je iyo jilisa', lapakawo ti kijilas.
8Po' japa jloma ti Zacarías ti jlama pet ti isijme'n, ti iyo pa jikijmaye ti Sinia' ijniejiet'e pet. 9Iyo jla'am ni jikijmayejes napo pa'yijis, Zacarías itiejayi ka iwu'un pa incienso siupa jini inkajk'i, ti tiliakinieyits'i ape'e, ts'e kiajwe japa 'najla'wet, siupa ji'wet'ni pa Sinia'. 10Ti tiwuniejata siupa jini inkajk'i, siupapo i'nio' ininenisi pet kisie'e, ti iyoyis t'ajlayeja'. 11Pakayi'ne pa Zacarías ti Saka'niona jijliujwanik poli jlele ti inikajanitia'm, ti takasitiape'n 'niji jijweye japa altar, siupa tenaja'a'ni siupa jini inkajk'i, ti tiwuniejata. 12Zacarías, ti i'wina pa injlojwanik poli jlele, jnots'inayiji'ni, ti je ijwiye. 13'Yina injlojwanik poli jlele iyone'ate:
—Zacarías, jweyiti. Sinia' ipi'yayi ki iyo ki asts'ajlaye. Siojona ak'iemjla Elisabet jlas japoye. Jle' jawo'ate Juan siupa jajlasa'. 14Ja ke jlasiye ni jawoyi ti ja inkaja'ni, ja ke amkataja jla'yi napo i'nio' wuj ti ja inkasaja'n ka inetiejenie'e. 15Kajeyepa ti Sinia' jawojwa'n anechiyasa', ja ke in'yaje pa at'es ja lajak'iyipa siuniwa ti'yakits'i at'esis.#Núm 6.2-3 Sinia' jikimet ti 'es jampoyiji ti jane tiowiji japa jlet. 16Ja ke jlasiye napo Israel jika kia'lis napo janekiajle pa Saka'niona. 17Jawo'ate iyot'iyipi pa injwejlanik jiwo Elías t'ipi, ti jijweye tiwenaja'm, ti janajne'n k'iye ni Saka'niona. Janekiajle wita'm napo i'nio' napo jilis;#Mal 4.5-6 siunapo kakiujnietas janoyeyijna'a pet siunie iyo napo isis ti iyoyi ni 'es; kiak jawo ni jikijmayeja' ni Juan, ti janwakajlanit siunapo i'nio' janki'm ilia'm ni Saka'niona.
18Zacarías iyo'ne 'ate ti i'yase'n pa injlojwanik poli jlele:
—¿Tent'itie siupa kawo, ka je 'yakakiuniji? Tiwet'ianaja ka je kijilasats'e'm wata'a, jla'yi jli its'iemjla.
19Injlojwanik poli jlele isiujlie ti iyo'ate:
—Ya'am Gabrielk'i'm, ti anoyeje ni Sinia'. Jla'am ti sijliu' ka ijwi'la siu'nie inka'niye ti 'es. 20Siuti jikakiu siunie ajwelta'm, 'nakayi a'lej ja ká a'yaka'n, ijiatjliyijna'a jla'am ka netiejenie'e janak jloma siunie iyo niwa ajwe'la'm, jiwekie'ejana'a ka a'lej a'yaka'n.
21Jlam'ne papo i'nio' its'iuyistajan'ni k'iye ka ino kisie'e, ininekiajlayisi ti ini'yasis ti iyo'ate:
—¿Yot'iyi'ni ti je ta'a ka ino kisie'e ja Zacarías?
22Paj ti 'nesat'ipi jiwekie'e, jlampa je k'iejeyeyik'i'ni ti yi' kiajwe japa 'najla'wet, 'yina 'wena iyoyeyi'ijyi ji'lij je i'yaka'n, sekyi'i itijnisieyisi papo ti po' pa i'wi'in ts'e jik'ioyi japa ji'wet'ni pa Sinia'. Puwakata jla'am puwa jikioye ti isiene, ti ijwil ka inkamtijniene papo i'nio', jlam kia'iyojliyi ti je 'esiji ka intamti.
23Jlampa itimat'iyijpe siupa jikijmaye, jikijmaye iyo ti iniuyeje pa Sinia', sekyi'i yapilie. 24Jak je iyoyiji'ni jlomas 'nak nojwaja'm, pakat'iyijpe ti iyoyeyi siupa iyo ti isiu'ujnie'n japa jik'iemjla. We'lajas ijwienjli sikio' itij'we ti je iniu kisie'e ti yi'i pa ji'wet. Jitienkiujnieye iyone 'ate: 25“'Nakap'ane ti sip'elisi'n pa Saka'niona, ka je siliaki napo i'nio'.”
Injlojwanik poli jlele ijwil ta'a pa Jesús ti janejyi'n
26Ijwienjli sikio' itij'we ijwienjli tom'niji puwa we'lajas tomk'i ti k'iejli poyeje pa Juan, ti Sinia' ijliuye pa jijliujwanik poli jlele Gabriel yi'i jlaja isi' jle' iyo'ate Nazaret, yiji jlaja ajnat Galilea. 27Ijliuyi siojopa jlosie jle' iyo'ate María ka ijnoyi, ti ayinie t'ale' je yi'i, 'yina jlampa initemayi pa José ti janeyi, tajla'm papo anechiyas David jika kia'lis. 28Injlojwanik poli jlele 'yuyi'ni siupa yi'i jlaja María, sekyi'i ti iyonayi 'ate:
—¡Ampey! ¡Sinia' ijniejiet'a'm ni jikap'ijliuskiye! ¡Saka'niona yi'ajap!
29Siojopa jlosie, ti ipi'ya pa injlojwanik poli jlele ti kia'iyo, jlam jnots'iniji'ni. Jlam yini kiowe'e pi jitienkiujnieye ti iyo'ate, “¿Yot'iyi'ni ti kia'iyo ti itijwilk'i'm?” 30'Yina injlojwanik poli jlele iyo'ne 'ate:
—María jweyiti, 'esieyi ka 'naka'a siunie jikap'ijliuskiye na Sinia'. 31'Yejne'n, jakiu'ujnie'n. Siupa ja asa ti japoye, jle' janwo 'ate Jesús.#Mt 1.21 32Janakaye ni siunie ti ja ke jlasiye ni jijweyeja', jle' ja tiwonaja 'ate Sinia' ti Wuj Jlas. Saka'niona ti Sinia' jawojwa'n anechiyas wujwa, jawo'ate siupa tajla'm jla'am David, anechiyas t'ipi, 33ti jawo anechiyasa' k'iye napo Israel jika kia'lis. Jajnok'i'ni ti jawo anechiyasa'.#2 S 7.12,13,16; Is 9.7
34María i'yasen'ne pa injlojwanik poli jlele ti iyo'ate:
—¿Tepat'e jawo ka kia'iwo, ti je enjli'ijyi ijiap pa ayinieja'?
35Injlojwanik poli jlele isiujlie ti iyo'ate:
—Siojona Sinia' jikimet ti 'es jana'm atepe'e ka 'nesta, ti jajno'wa, sekjane'yi ni jijweye ni Sinia' ti wuj jantej'w atepe'e 'yiniyijna'a na pe'el. It'imina ti kiak ja jleye naka kia'le kanetiejena'a T'otata, siu'neje ni jikiecha ni ja jleye Sinia' Jlas. 36Siujlieja akiecha Elisabet kia'iyo isiu'ujnie'n, 'wanjliyi kijilayeta, siujlieja tijwela'ni jlam je isiu'ujnie'n. Jika we'lajas ijwienjli sikio' itij'we ijwienjli tom'niji niwa yiji ti isiu'ujnie'n. 37Kajeyepa pa Sinia' lajk'iyi pa jla'am ka instayija'm.#Gén 18.14; Jer 32.17,27
38Ti María ipi'yaye pa injlojwanik poli jlele ti kia'iyo, sekyi'i iyo'ne 'ate:
—'Esiji, yam ti Saka'niona jikipinkik'i'm. 'Esiji ka kiak iwonk'i siukia jiwo ti jijwelk'i'm.
Pakayi'ne ti injlojwanik poli jlele tajlayi.
María ijioyi japa Elisabet
39Puwak siupuwa jlomas ti María ijliuni siujlieja ajnat tikijnakiyis yi'i, jle' iyo'ate Judea. 40Ti 'nesat'ipi, 'yuyeyi pa Zacarías, sekyi'i ti itijwilayi japa Elisabet. 41Ti Elisabet ipi'yaye jlaja María ti itijwila, siupa kia'le ti'wesiyet'ipi jits'iji japa jlet. Pakayi'ne ti Sinia' jikimet ti 'es tipoyeyiji japa Elisabet, 42'yina kia'iyone'ni ti 'yakets'ijiap:
—¡Jika'm ape'e napo asejnia ijia, siunie ti Sinia' iwi'na'm ti 'es, kia'iyojliyi ni as! 43¿Tent'ipa akiowe jiwone ti jlok'i, ti 'Yaka'niona jlet'a'm? 44Ti ape'yaye ti jitijwilk'i'm, pesiejayi pi kia'le ti ini'wesin'ni itiowiji, ti inkaj'ni. 45¡Jitime a'am jiwekie'e, lapakawo ti je kakiu pa Sinia', siunie iyo'napi ti ijwi'la'm, siuniwa 'yakaja 'nakayi!
María ijiunit pa Sinia'
46'Yina María iyo'ne 'ate:
“'Ni isiak'al iyunit pa Saka'niona,#1 S 2.1-10; Sal 113.5-9
47siunie ijiusik inka'a pet na Ijwiejieti ti Sinia'.
48Lapakawo ti sip'elisi'n, ya'am ti jikipinkik'i'm,
ti sip'elisie, 'nakayi ti sijwela, jajnok'i'ni,
ti Sinia' iwink'i'm ni 'es, siu'nie a'we'en.
49Kajeyepa ti jijweye po', je wekie'e siuniwa iyonk'i ti ya'am.
'Es na jle'.
50Ip'ilisi'n siunapo its'iuye, kajeyepa ti je ijwiyisie,
paj ti yiyeyi siunapo jika kia'lis pet ti ink'iejyis.
51'Yakawisi'n siunie jijweye ti je jlase'.
Initiajnat ape'e 'ni ajnat ni jitienkiujnieye siunapo i'nio' inikawisijne'n.
52Ijiale napo i'nio' anechiyasas wus niwa ji'wetis ti iyo anechiyasisa',
siunapo i'nio' lajk'iyipa kawo yikiajlayi pet ti iyo jijweyeja'.
53Siunapo p'ijliusis jwajla'a i'winkine,
jlampet siunapo i'nio' jwajla'a i'wi'in lajk'i pet pa ka inejni kiojyi ti ijliuye'ni.
54Iniuyeje napo Israel jika kia'lis napo jikawos,
ka kia'iwo ka inkiwaliyi'i ti ip'ilisijne'n.
55Kiakjini iyonijipi ti ijwijla'm papo sitise'l t'ipi, siupa Abraham,#Gén 17.7
siu'neje papo jilis tomik'i pijia'm, 'yina jajnok'i'ni.”
56María yijap'ni japa Elisabet paj ti najapeja puwa jika we'lajas, ti jiwekie'eja ti yapi.
Ti k'iejli yiyeje'n pa Juan inajiejnawo
57Ti yiyet'iyipi siupa k'ie ti Elisabet ti jlas janejyi'n, 'yina yijin'ni pa kia'le. 58Siupapo ijia jla'yi papo ji'wetijwas, ti 'yijenayi pi iyone ti Saka'niona ip'ilisi'n, yam'ni'ne ti ijioyisi, kajeyepa ti inkajats'i.
59Ti jika jlomas ijwienjli sikio' itij'we najape tom'niji puwa yiji, sekyi'i ti tikiniejayi ti jatejwak'i pa t'isie'n jlase' pa kia'le.#Lev 12.3 Pot'ipi papo iyotaja ka inekiajlits'i pa jinia' jle', siupa iyo'ate Zacarías. 60'Yina tamti'ne japa jlet ti iyo'ate:
—Je'e, siunie jleye ni kia'le iyo'ate Juan.
61Iyo'ne 'ate ti isiujlisie:
—Lajiek'ipa ka kiak jleye, ka ne'yi pa ti asa'am.
62Sekyi'i ti i'yasat'iyisimpe pa Zacarías paka ineye ka inemi'n ka jleye pa kia'le. Ejlot'ipi jiwekie'e ti jikioye 'nejie'e puwa isiene ti takamtijniene papo, kajeyepa ti iyo ji'lij je i'yaka'n. 63Sekyi'i pa Zacarías t'ajlayijin'ni pa a'la' t'aja ka i'nete'e. Iyo'ne 'ate puwa jlamtis siupuwa yi'ne pa a'la' t'aj, “Juan kiak jle' janwo.” Jnots'inayijits'i'ni jiwekie'e papo i'nio'. 64Paka'ne siupa ti kia'iyo ti Zacarías i'yakana'aja pi ji'lij, 'esieyiji ti tamti, iyunitie pa Sinia'. 65Wikie'eyi siupapo ji'wetijwas jnots'ijnits'i'ne ti i'winayis ti kia'iyo, ta'a t'ipi ti itijwi'ni siujlieja ajnat tikijnakiyis yiji, siujlieja jle' iyo'ate Judea. 66Siupapo t'ijieyisi, jitienkiujnieye iyonisieyi 'ate:
—¿Nit'i siu'nie jawo 'ni kia'le?
Kajeyepa ti 'yakaja siupa iyo ti Sinia' yijap.
Zacarías iyunit pa Sinia'
67Siupa jinia' pa kia'le, ti jle' iyo'ate Zacarías, ti Sinia' jikimet ti 'es tipoyet'iyijipi, jlam jla'am japaka ti yamtijie'n ti iyo'ate:
68“¡Tonitie pa Sinia' ti Saka'niona, Israel Jinia',
'nese napo jika kia'lis, ti janjwajiete'n!
69Ijliuts'e ni Sijwajieti ti wuj ti t'on'ni,
jikawo jla'am siupa David t'ipi jika kia'le ti tomi pijia'm.
70'Naka'ne siu'nie pajk'i ti ijwi'il pa Sinia',
ti jijwejlanawos ti isis ijwilt'ipi.
71Jla'am ti ja kasjwajiet ka inamta'nina'a napo sakojwas,
siu'neje napo i'nio' ne'wats'e'm.
72Ip'ilisi'n siupapo sitise'l t'ipi.
Je kia'iyo ka inkiwali'yi'i puwa jlamtis ti isis, siupuwa iyot'iyipi.
73'Naka'ne siu'nie iyont'iyipi
ti ijwijla'm siupa sinia' Abraham t'ipi,
74ti ijwi'il ti janoyits'e'm ka inetiets'e papo sakojwas,
ja 'nakayeyijna'a pet ti janiukieje, ja ke kassots'ina paka k'iejliyeyi.
75Janilesanaja siuti jawiek jitieyi'i,
jla'yi ti jajniejietaje siunie jayoki,
ti awak jitieyi'i 'ne ajnat'e.
76Siuti a'am, yas, siunie e'e ti iyo'ate Jijwejlanik Jiwo pa Sinia' Wuj,
kajeyepa ti a'am ti janajne'n k'iye ni Saka'niona, ti ja 'nakajlanit ta'a k'iye siunie jano'we.#Mal 3.1
77Jajwejla'm napo jika kia'lis ti Sinia' initiajnat niwa jikeyis iyo,
jla'yi ti iwijna'm jana jijwajieti.
78Siunie Sinia' wuj ti kasp'elisi'n,
namets'eje siunie jloma ink'ie'
79ka inkajanitk'i ape'e, i'nio' siunapo ti je t'ekijyi na ajnatiok,
na jipe'el na siliaye,#Is 9.2
ka inajne'n k'iye siuniwa sisietis awonaja siunie jano'we,
ti ja kassokiji jana inkamankiye.”
80'Yina siuti je iliyi ti ijlias'ni pijia'm pak kia'le; jijweye t'oniek'i, pi iyo pi jlosik. Yi'i'ni siupa ajnat laj i'nioye'e, paj ti yiyeyi pa jloma siupa ti inikajanitia'm papok Israel jika kia'lis.
Currently Selected:
Lucas 1: CRT97
Highlight
Share
Copy
Want to have your highlights saved across all your devices? Sign up or sign in
Nuevo Testamento en Chorote © Sociedades Biblicas Unidas, 1997.