Romye 8
8
Nzatə a vor gəta Pitə
1Gə-angɨn taayə ɓashitɨ wo a nə myee nza sɨtɨ Yesu Ma Həmɨnpwa a Yaɓwarən, 2gəkɨlə dɨ hakan gəta ɓashita Pite dɨ vədə myentə a dɨmdi gə ɓashita səhasa dɨ shi ka we. 3Sa ɓashita Musa aa mban a ɗa gəkɨlə kadawo sɨtə a mɨndən ɓaa, sɨnə sa Həmɨnpwa a ɗa a ite nda lyana nzəngɨn nda nggur sɨte pasa kada sɨtɨ ɓwaara gə nda luwarəm gə səhase. Dɨ hangɨn nda lɨbadə kadawo səhasa nza sɨtɨ ɓwaara. 4Həmɨnpwa a ɗa angɨn sə gə nda naadə sə pepeya ɓashitə a dɨ mwo dɨ hakam, hɨm myee aawa koɗə kadawo sɨtə, shezə mya nzam dɨ ha gwadəha da Pitə.
5Wule myee dɨ koddə kadawo sɨtə, tənə myee ɗyangale darən a kangə nə sa kadawo sɨtə a dɨ mwo. Shezə tən myee dɨ koddə Pitə, ɗyangale darən nee kangə nə sa Pitə a dɨ mwo. 6Ma ɗɨkdə ɗyangale dan kat a nə kadawo sɨtə, kpawsən nə we. Ma mgban ɗyangale dan a kangə nə sa Pitə a dɨ mwo, kpawsən nə ɗɨm myentə ka nzaa ɗoltə. 7Ma ɗyangale dan a kangə nə kadawo sɨtə, nzə-nyaagə Həmɨnpwnə nə, kadawo sɨtə aawa və nəngrə a nə ɓashita Həmɨnpwa, nggaa dɨ mba angɨn a ɗa. 8Wule myee kat dɨ koɗə sa kadawo sɨtə a bɨlərən, haa a dɨ nɨngə Həmɨnpwa kaarən.
9Kat ka angɨn hwunaawa koɗə kadawo sɨtə, hwuna dɨ koddə sa Pitə a dɨ mwo, gəkɨlə diyalə Pita Həmɨnpwa nee ɓwaa kəwnə. Gə ma tam ka Pita Ma Həmɨnpwa a Yaɓwarən, mangɨn aa hɨnggən nə. 10Shezə gə Ma Həmɨnpwa a Yaɓwarən nee ɓwaa kəwnə, sɨsəwnə nee a kwaamɨ we gə səhase, kat ka angɨn Pita Həmɨnpwa nee dɨ vəwnə myentə gəkɨlə ndi bəltəwnə hwun mi pepeyi. 11Anda diyalə Pita Həmɨnpwa ite maddə Yesu gə we nee ɓwaa kəwnə, Həmɨnpwatɨngɨn nə ɓa vəwnə myentə a nzaasəwnə a sɨtɨ soɓwa nə dəwnə dɨ haka Pitɨ dan ite ɓwaa kəwnə.
12Gə-angɨn ji-nuwo, le nə bə nəngəm, shezə aa ləmə koddə la kadawo sɨtə a dɨ mwo nə. 13Hwun kana nza a dɨ koddə sa kadawo sɨtə a dɨ mwo, hwun ɓa mbərə. Shezə dɨ ha gwadəha da Pitə hwun kana ɓəl shee kadawo sɨtə a dɨ mwo, hwun ɓa ɗɨm myentə. 14Gəkɨlə myee Pita Həmɨnpwa a dɨ koɗə kaarən, tənə je da Həmɨnpwa. 15Wule Pite Həmɨnpwa a vəwnə, aa gəkɨlə Pitɨngɨn a mɨndəwnə kɨse nza vor kala ɓə, shezə nda vəwnə Pitɨngɨn gəkɨlə hwuna gəə hwunə je dan. Dɨ haka Pitɨngɨn mye ɓa sam kan atɨ, “Abba, Baatə.” 16Pita Həmɨnpwa ka hɨnggəm takale atɨ hɨm nə je da Həmɨnpwa. 17Sə mgban gə hɨm nə je dan, hɨm nə ɓa mɨnə shee nda bwe ləngrən ɓwaa ka Ma Həmɨnpwa a Yaɓwarən, hɨm kana gəm ɓwaa kan a vor tənətɨ dan sə mgban hɨm ɓa gəm ɓwaa kan a vor fukatɨ dan.
Fukate ɓaga shi
18Hɨn leyə mbak-mbak atɨ wule tənəte mya gəmə vorsə ɓəgəng, myaa dɨ kanatɨrə ka wule fukate mya və miye a humwa. 19Ɓəgəng a nzatɨnə nagi ndo sə a Həmɨnpwa a ɗarən a vor vɨratə nee dɨ kula ka hɨmnə sate atɨ Həmɨnpwa ɓa bɨldə je dan bwang. 20Gələ Həmɨnpwa a mɨndə shee nda ɗatɨrən a vɨratə kat təna yakə, aa atɨ ka mwotɨ shingɨn. Shezə ka mwosən ka bəə myentɨ dan ndi ma ɗatɨrən 21ka sate atɨ a fərə nee də vɨratə kat ɓa ɗɨm nəngrə a dɨmgə mbətɨ ɓaatə. Təna ɗɨm nəngrən a pɨrə vor wule fukate Həmɨnpwa ɓa və je dan.
22Mye leyəm kat atɨ baa a tɨla a nzatɨnə ɓəgəng, nagi ndo sə a vɨratə kat nee dɨ 'yesəwi ka sɨtɨ otə ɓətɨ mete a kwa-mwasati. 23Aa shi vɨratə nə ɓəmbə dɨ 'yesəwo vor sɨtɨ otə, kat ka hɨm myee luu həmtɨ Pitə, sɨnə kwamətɨ sa Həmɨnpwa a vəm. Hɨm nə dɨ 'yesəwo vor hubosəm ka hɨmnə sate atɨ Həmɨnpwa ɓa lurəm a gəədəm hɨm nə je dan, dɨ hangɨn hɨm ɓa piyamgə 'yesəwtə ka sɨtɨ otə. 24Gə a vor bəə myentɨnə hɨm a ɗɨməm mbətə, shezə bəə myentə a nə sa ma a nan aayə bəə myenti. Ɓə wonə ɓa bəə myensən a nə sa nda gə kan? 25Hɨm kana bəmdə myensəm a nə sa mye tam kan, mye ɓa kulam səngɨn ka mbasɨtə.
26Sə mgban Pitɨ Ɗəmɗəmtə a dɨ gwadəm gə taa mbarəti kam, hɨm aa leyəm ɗate kana hɨm a ɗam hiwtə, shezə Pitɨngɨn ka nənəngrə nə dɨ gwadəm dɨ nyisə Həmɨnpwa gə le dam ka 'yesəwtə ka wule kormye ɓwaara aa dɨ mbarən a boyo. 27Həmɨnpwa a dɨ pyel vor hubo ɓwaare kat, ɓə lee wule ɗyangale da Pitə gəkɨlə Pitɨngɨn a dɨ nyisə ɓətɨya Həmɨnpwa a dɨ mwo a nə myee nda vomiyərən.
28Hɨm leyəm atɨ a vor nagi ndo sə kat, Həmɨnpwa a dɨ ɗa lyentɨ fyemtə gə le darən tən myee dɨ mworən, a myee mya watɨrən a vorsa nda kana ɓa ɗa. 29Myee Həmɨnpwa a leetɨrən kɨnɨnɨng, tənə myee mgban nda tattɨrən gə təna pasa Nze dan, gəkɨlə Nze da Həmɨnpwa a gəə sɨnə ma kwamətə, a nə ji-nuwotə a tən ji-kottə kat. 30Myee Həmɨnpwa a tattɨrən, tənə nda wagatɨrən a hakan, myee nda wagatɨrən tənə nda bəltɨrən mi pepeyi, myee nda bəltɨrən mi pepeyi mgban, tənə myee nda fukadərən.
31Ɓə a shiya mya sam ka lana? Anda Həmɨnpwa nee ɓwaa kam, wonə ma ɓa mwamdiya a kanggəm? 32Həmɨnpwa aa kərdə Nzəngɨn Yesu, nda vədən gə le dam kat. Gə-angɨn ndaa dɨ hasə kam, ndi ɓa və miye shee kat. 33Wonə ka a lə som a nə myee Həmɨnpwa tattɨrən? Aɓə Həmɨnpwa nə bəltɨrən mi pepeyi! 34Wonə ma ɓa ɗam ɓashitɨ we? Aɓə Yesu Ma Həmɨnpwa a Yaɓwarən ndi ma mbɨri gə le dam, a nə angɨn, sɨnə Həmɨnpwa a maddən gə we ka myentə, sɨne a tɨfə zɨməngə Həmɨnpwa. Sɨnə mgban dɨ nyisə Həmɨnpwa gə le dam. 35Ɓə mɨnə ɓa mbam a takam ka mwote Ma Həmɨnpwa a Yaɓwarən a mworəm? Otɨ nzaa vɨrangnə nə ma? Tənəti? Tənədəha? Myati? Poriti? Shi hashi vɨrangnə nə ma? Naasə mgban wo ma? 36Ɓətɨya mya doro,
“Gə le dəw mya dɨ tənəə denə,
fərə-fərə hinə a kwaamɨ we,
hinə ɓətɨ kwa mbagee mya kəsə
ɓa por kwakasərən.”#8.36 Naasə: Dyemshe 44.22.
37Ə'ə, kat ka shi hashingɨn, hɨm pɨrgə myee kɨt ne dɨ hakan ndi ma mworəm. 38Gə mbak-mbak hɨn mwaka sate atɨ taa asə də ɓa takam ka mwoha dan. Nagi wo, nagi myenti, nagi malyeni, nagi pɨle, nagi a nzatɨnə, nagi a nzate ɓaga shi. Nagi itɨ gəti, 39nagi gaarə a fintɨ pwa, nagi ganə a vɨratə. Taa asə də a vor vɨratə a ɓa mba takatə a takam ka mwote Həmɨnpwa a mworəm, a wule mwoha mya ɗɨməm dɨ haka Yesu Ma Həmɨnpwa a Yaɓwarən ndi Həmɨmiye dam.
Currently Selected:
Romye 8: bcy
Highlight
Copy
Compare
Share
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
