Lyenta 25
25
Festus a ɓashiyə Bulus
1Ite Festus a tɨla a vor njiya Yawudiya, beetɨ bətə mwaakɨn nda ɗaka Kesariya a pɨrə a nggɨrə Urshelima. 2A vor Urshelima nda pa kɨsehəmi kpanye kat ka mi kpan-kpanye da Yawude, təna paya a humwasən a kaadə Bulus. Təna nyisə Festus 3atɨ a nda ɗarən humwa-shengtə a mɨnadə Bulus a Urshelima gə təna ɓodəkrən a tɨfe a ɓɨltən. 4Nda sarən atɨ, “Bulus nee a gbərəwe a Kesariya, hɨn mgban hɨne ɓa zə də a vor bətɨnə. 5Gələ angɨn anda a səhasə nə də Bulus a ɗa, a imi dɨ vor mi kpan-kpanye dəwnə a shi hina kpapə kaarən a zə Kesariya, təna dɨ bwegə səhasa Bulus a ɗa mya kɨlə.”
6Wakaa bətə fwa-fwat zə bəw, Festus a mɨnə Kesariya. Ite nda bə haa kɨɗa, nda wuna ɓashitə, nda ɗɨkə mya dɨmaadə Bulus a humwasən. 7Bulus ta pɨra a vor vɨnə ɓashitə, mi kpan-kpani Yawudee shi dɨ Urshelima a kangə a takadən kat ta bwe wule sɨhashi kɨr-kɨrye hananang Bulus a ɗatɨrən, ɓə tən ka nənəngrən tənaa bɨldə diyalə sɨhashe nda ɗatɨrən.
8Də Bulus a maɗə a kangə a bwegə kormingɨn gə nda dɨm nəngɨn, nda sa, “Taa ɗa ndəng səhasə, hɨn taa kɨɗa ɓashita Musa, taa bwe alə hasə a nə Shafe, taa bwe alə hasə mgban a nə Kaisar həmə kpanə Roma.”
9Ndi Festus sɨne dɨ mwi atɨ nda ɗa Yawude humwa-shengtə gə hanɨngərən kan, səngɨn ɗa nda ɗiyə Bulus atɨ, “Hye ɓa mwa a mɨnə vor Urshelima gə mya wudə a ɓashiyu a humwashi a nə ləməgina?”
10Bulus a luwa a san atɨ, “Hɨnə kanggə vor vɨnə ɓashita Kaisar, hangɨn nə kana mya ɓashiyi də. Taa ɗa Yawude a səhasə, hye ka nənanga hye leyə twa. 11Anda mgban hɨn ɗa a səhasə a kəni mya ɓɨlti, taa kwi. Anda mgban ləməgyee Yawude asɨ kaadi kaarən taa diyalə də, taa ama də ka gətə nda vədi a tɨfəngrən. Ndɨka na pɨrdə ɓashitɨ de a haka Kaisar nda ɓashiyi.”
12Ite Festus a peyə ka ji-shalale dan, nda sa Bulus atɨ, “Na hye ɓə sa atɨ a haka Kaisar hye ɓa zə, də hye ɓa zə.”
Nggwamna Festus a byala ka həmɨn Agripa
13Beetɨ bətə ɓyeləng, həmɨn Agripa ka mwafɨrən Barnis a shi Kesariya gə təna wunaka Festus ka pɨrə humwate nda ɗɨmə njiyangɨn. 14Gə tən ɓa ɗa bətə hananang a vor Kesariya, Festus a nggura le da Bulus a boyərən. Nda sarən atɨ, “Ama nə ganə Felis a ɗakan a gbərəwe a muɗə, ndaa ɓashiyən a paran. 15Ite na zə Urshelima, kɨsehəmi kpan-kpanye ka mi kpan-kpanye da Yawude a shi ka ləməgye furi-furi a nyishi gə mya ɓashiyən a lɨbadən gə mya ɓɨltən.
16“Na sarən atɨ, kwatəfəgi ɓashita mi Roma a sa atɨ, myaa dɨ vədə ɓwaara tee ɗəng. Mye ɓa ɗakan nda kangə vɨnə ɓashitə a humwa myee kaadən nda bwegə kormingɨn a dɨmdə nəngɨn. 17Ite na mɨna ganə a Kesariya, Yawudengɨn a kwaɗe a shi. Taa ɓwanga le mgban, hɨn ɓe bə haa kɨɗa, na wagatɨrən gə hina nzaa ɓashitə. Na lyenshe mya dɨmaadə mangɨn a shikan a vɨnə ɓashitə. 18Tən myee kaadən, təna maɗə a bwegə kormi kaadəha darən. A vor ləməgyee təna boyo kat, taa kɨla a səhasə a nda ɗa ɓətɨ na dɨ kana. 19Ləməgyee təna boyo kat, ləməgingɨn a nə kottɨ darən nə, təna dɨ məntəmətə kan a nə ama mya wa atɨ Yesu, atɨ nda mbɨrə. Ndi Bulus mgban nda sa atɨ mangɨn nee ka myentə ɓəgəng. 20Hɨn taa lee ɗate hɨn ɓa ɗa ka ləməginə a koɗərən a lee diyale. Na ɗiyə Bulus atɨ anda ndi ɓa mwa a mɨnə Urshelima gə mya ɓashiyən a nə ləməgingɨn. 21Ite Bulus a kwo le, a pɨrdə ɓashitə a haka makpane dam, na sa mgban atɨ, a mya ɗakan a gbərəwe a dɨmə fəra hɨn ɓa lyenshe kan a haka Kaisar.”
22Də Agripa a sa Festus atɨ, “Ɓa wula na kɨla ləməgyee mangɨn ɓa boyo.”
Festus a luwa a san atɨ, “Kɨɗa hye ɓa kɨltən.”
Bulus a kangə humwa həmɨn Agripa
23Ite haa kɨɗa, yə Agripa ka Barnis a pɨrə a vɨnə petə ta nggaara ka nggərsɨtɨ həmne, ka fəwkade, tənə pɨra ka gyanye kpan-kpanye, ka mi kɨr-kɨryee a vor vɨra Kesariya. Festus a ɗɨkə mya pɨra ka Bulus a vɨnəngɨn. 24Festus a sa, “Həmɨn Agripa, ka hwun minə kenə ganə kat, hwun naa mangɨn nee. Sɨnə ma Yawude kat a shi ka le dan a hake a vor Urshelima ka Kesariya ganə a kaadən. Ta gəə gaawe atɨ ɓə kana mya ɓɨltən gə ndaa kana nda mbə. 25Hɨn nidən ka nəna, taa pan ka asə hashi-hashi a nda ɗa a kəni mya ɓɨltən. Shezə nda pɨrdə ɓashitə a humwa makpane dam. Sə mgban na bənggə le atɨ hɨn ɓa lyenshe kan a haka Kaisar a Roma. 26Shezə hɨn tam ka daasə la na doro vor malɨmtə a nəngɨn, gə-angɨn na shikan a humwasəwnə, ɓətɨ hye həmɨn Agripa, gə mya ɗiyən ləməgye, ndəng hɨn ɓa ɗɨm diyalə la hɨn ɓa dor malɨmtə a nəngɨn zə haka makpane dam. 27Gə na niyə aa wula mya lyenshe ka nzə-gbərəwe tee ɗəng, myaa bwelə səhasa mangɨn a ɗa.”
Currently Selected:
Lyenta 25: bcy
Highlight
Copy
Compare
Share
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
